Pag-ighit 33
33
1Magkun ti Panginuun sa kan Muysis, “Pag-ighit yi kawu sitay pag rugar kaibahan ti ipinalwas nimu pag manga nasakupan ginan sa Ihiptu, pag-ati kamu sa kang itinaratu pag daga sa kanda ni Abraham, ni Isaak ag ni Hakub. Magkun aku sa kanda kaybi ipakaun niku inda pag daga sa kanda linahi. 2Paunahun niku ti anghil sa kanyu, tabugun niku ti manga Kananiyu, Amuriyu, Hitiyu, Pirisiyu, Hibiyu, ag Hibusiyu 3sa ati pag daga marinu ag abunda.#33:3 daga ... abunda: sa Hibriyu, daga magbulus ti gatas ag daykut. Kamu lang ti umati; balaw niku kamu ibahan dahil maganit kanyu ulu, barang matyun waya niku kamu sa dalan.”
4-5“Maganit kanyu ulu. Nu ibahan niku kamu una lang diit pag udas, barang matyun waya niku kamu. Taynguna, lukasa kanyu manga bisti tugka sa makapasya aku nu hintay kang buwatun sa kanyu.” Pagka nadnugan manga tawu inda pag marasakit bagaw, masyadu sida naruku ag kanda sinunud ti sugu Panginuun; 6linukas ngani nida kanda manga kulintas ati sa bantud Hurib.
Ti Turda Taragbuan
7Naugalian yi ni Muysis magpatindug Turda arayu sa kampu. Inda pag Turda pag-ingarnan Turda Taragbuan. Mag-atag sa inda pag Turda una si unu ti may gustu maalaman ti nalub-anan Panginuun. 8Kada sumulud si Muysis sa Turda Taragbuan, magtindug ti manga tawu sa sabian nida turda. Pagbantayan nida si Muysis tugka sa makasulud siya sa Turda. 9Nu ati si Muysis sa sulud, magpaababa ti rurum ga tulduk sa sabian Turda habang maghampang ti Panginuun sa kanya. 10Nu mag-akitan manga tawu ti rurum ga tulduk sa sabian Turda, magtindug sida magsamba sa Panginuun sa may sabian nida turda. 11Nu maghampang ti Panginuun sa kan Muysis, mag-aratubangan sida, parihu sa magmarayadan pag tawu magharampangan. Bag-u magbalik si Muysis sa kampu, dapat kay manugsirbi si Huswi, kay anak ni Nun magpatayak di sa Turda.
Nakitan ni Muysis ti Makamaskihan pag Kadayawan Diyus
12Magkun si Muysis sa Panginuun, “Pirmi duy nimu pagsabihun sa kangku pangunahi niku inda pag manga nasakupan sa pag-atag sa itinaratu nimu pag daga, dapat unman waya nimu pag-ipaalam nu si unu kanmu pakuyugun sa kangku. Kanmu waya sinabi sa kangku magkakilala gid nimu aku ag magbaya kawu sa kangku. 13Nu tutuu duy magbaya kawu sa kangku, tudlui aku kanmu palakaw hampay makilala niku kawu ag hampay makabaya waya gid kawu sa kangku. Alalahana nimu inda pag nasyun kanmu pag manga nasakupan.”
14Sinmagut ti Panginuun, “Aku gid ngap ti kumuyug sa kanmu, ag pakan-an niku kawu kahusayan.”
15Magkun si Muysis sa kanya, “Nu balaw kami kanmu ibahan, danga yi lang duy nimu kami pagpaighita sa inda pag rugar. 16Dahil kabitay maalaman iba kuntay magbaya kawu sa kangku hanggan sa kanmu nasakupan nu balaw kami kanmu ibahan? Kabitay duy nida maalaman kuntay nituhay kami pag manga nasakupan sa iba pag manga nasakupan sa kalibutan.”
17Sinmagut ti Panginuun sa kan Muysis, “Buwatun niku ti pag-ipakihampang nimu, dahil magbaya aku sa kanmu ag kilala gid niku kawu.”
18Magkun si Muysis, “Ipakakit duy nimu sa kangku kanmu kadayawan.”
19Sinmagut ti Panginuun, “Ipakakit niku sa kanmu ti tanan kaayadan niku, sambitun niku sa kanmu kang ngaran Panginuun. Pagkaawaan niku ti gustu niku kaawaan. 20Dapat bukun niku ipakakit sa kanmu kang uyahun dahil unman may tawu mabuhi nu makakit sa kang uyahun.”
21Magkun ti Panginuun, “Pagtindug kawu sitay sa batu arani sa kangku. 22Ag habang maglawuy kang kadayawan, ipaslud niku kawu sa buslut batu bag-u patakipan kawu niku kamang tugka sa makalawuy aku. 23Bag-u bul-un niku kang kamang ag makitan nimu kang dayu, dapat balaw kang uyahun.”
Currently Selected:
Pag-ighit 33: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
