Pag-ighit 32
32
Ti Gintu pag Baka-baka
(Diyut. 9:7-29)
1Pagka nakitan manga tawu dugay maglus-ug sa bantud si Muysis, nagtipun sida sa kan Aarun ag magkun, “Ta, buwati kami diyus#32:1 diyus: ngatay, manga diyus. pumanguna sa kanmi, dahil balaw nita alam nu hintay yi ti nangyari sa tunda pag tawu sa kan Muysis ti nagpalwas sa kanta sa Ihiptu.” 2Sinmagut si Aarun, “Bul-a kanyu manga parungpung gintu isinulung niyu asawa ag anak, bag-u daran-a niyu sa kangku.” 3Nakan bin-ul ngani nida tanan ti manga parungpung gintu bag-u dinara inda sa kan Aarun. 4Tinipun inda ni Aarun, tinunaw, ag kinurtihan parihu sa ibun baka. Magkun ti manga Israilita, “Inda kanta diyus ti nagpalwas sa kanta ginan sa Ihiptu.”
5Pagka nakitan ni Aarun magbaya gid ti manga tawu, namabwat siya harandugan sa atubangan baka ag magkun, “Aldaw alalahanun nita ti pista para sa Panginuun.” 6Nakan pagkanasurip, madlum surip nagbangun yi ti manga tawu ag namakaun manga handug pagsunugun hanggan handug sa mayad pagpakiusa. Nansararuhan sida ag nanginuman, bag-u ilinubus kanda kabayaan sa pagsamba sa gintu baka.
7Magkun ti Panginuun sa kan Muysis, “Paglus-ug yi kawu kadali dahil nagpakadaut kanmu manga kasimanwa ti ipinalwas nimu ginan sa Ihiptu. 8Madali sida magpatlikud sa kang pag-isugu sa kanda. Namuwat sida diyus-diyusan baka ag kanda sinamba. Nanagda ti manga Israilita sa inda pag diyus-diyusan magkun, ‘Inda kanta diyus ti nagpalwas sa kanta sa Ihiptu.’ ”
9Magkun waya gid ti Panginuun sa kan Muysis, “Nakitan niku nu kabitay kaganit kay ulu inda pag manga tawu. 10Nakan pabay-ani nimu rurisun niku sida; buwatun niku inda sa masyadu niku pag pangagalit. Kawu yi lang ag kanmu magtal-anakan ti buwatun niku daka pag nasyun.”
11Dapat nagpaawa-awa si Muysis sa Panginuun sa kay Diyus, “Duy Panginuun, hayga duy pag-ipasamit nimu kanmu isug sa ipinalwas nimu pag nasakupan sa Ihiptu sa panab-anan nimu makadululaw pag kamaskihan? 12Unu yi lang duy ti sabihun manga Ihipsiyu? Bin-ul nimu kanmu nasakupan sa Ihiptu hampay matyun sa kabantudan agud madura sida sa kalibutan? Duy Panginuun danga pag patarusan kanmu masyadu pag-isug sa kanda, ag danga sida pagmatya. 13Alalahana duy nimu kanmu itinaratu sa kanmu manga manugsirbi sa kanda ni Abraham, ni Isaak, ag ni Hakub, kuntay kanmu payamuun kanda linahi parihu kay kayamu sa manga pamgasan sa langit, ag ipakaun nimu sa kanda lahi ti tanan kadagaan kanmu itinaratu sa kanda, bumaliw kanda yi inda hanggan aban.” 14Nakan balaw yi ipinatarus Panginuun kay gayak rurisun kay manga nasakupan.
15Linmus-ug si Muysis sa bantud dara ti duwa ka malapad pag batu sinuratan sugu Diyus. Nakasurat ti manga sugu Diyus sa atubangan hanggan sa dayu sa inda pag batu. 16Ti Diyus gid ti nagbuwat ag nagsurat inda.
17Pagka nadnugan ni Huswi ti karaguluhan manga tawu, magkun siya sa kan Muysis, “Bilang ga may iringayan girahan sa kampu.” 18Sinmagut si Muysis, “Bukun iringayan girahan kang mag-adnugan nu unman iringayan karantahan.”
19Pagka arani yi si Muysis sa kampu, nakitan niya ti diyus-diyusan baka hanggan ti magtararukan manga tawu, nakan nangisug siya masyadu. Iyinamut niya sa sugkad bantud kay dara malapad pag manga batu, ag nabka gid tunda. 20Bag-u bin-ul niya ti diyus-diyusan baka kanda binuwat, ag sinunug inda sa apuy. Rinunut niya inda ka pinu ag sinawug sa danum, bag-u ipinainum sa nasakupan Israil.
21Magkun si Muysis sa kan Aarun, “Hintay lugud ti binwat tunda pag manga tawu sa kanmu nakan kanmu pinasnuan sida sa laun pag kasalanan.”
22Sinmagut si Aarun, “Danga kawu magkagalit sa kangku. Alam diman nimu nu kabitay sida kay ka dali magbuwat kadautan. 23Magkun sida sa kangku, ‘Buwati kami diyus manugpanguna sa kanmi, dahil unman nita alam nu hintay yi ti nangyari sa kan Muysis tunda ti nagpalwas sa kanta sa Ihiptu.’ 24Nakan magkun aku sa kanda daran-a nida sa kangku kanda manga bisti gintu. Pagka dinara nida inda sa kangku, iyinamut niku inda sa apuy ag nabilug baka.”
25Nakitan ni Muysis ti manga tawu magkaraguluhan ag pagpabay-anan lang sida ni Aarun. Dahil siyun, nagbaliw sida karasarin-an nida manga kalaban sa kanda sangput. 26Nakan tinmindug si Muysis sa sabian kampu ag nanhugyaw, “Una si unu sa kanyu ti pumabliwa sa Panginuun, pagpakarani sa kangku!” Nagtipun atag sa kanya ti lahi ni Libi.
27Magkun si Muysis sa kanda, “Inda ti pagsabihun Panginuun, ti Diyus Israil, ti kada usa sa kanyu pagsabak baladaw palibuta niyu ti buu kampu, bag-u panmatya niyu inda pag manga daut tawu una kanyu waya patar-ari, kakilala ngatay kamalay.” 28Sinunud lahi ni Libi ti isinugu ni Muysis sa kanda, tunda katpung pag sirang manga 3,000 ti namatay pag tawu. 29Magkun si Muysis sa manga lahi ni Libi, “Ipinasaman kamu Panginuun taynguna pag sirang, dahil kanyu pinanmatay una kanyu manga anak ag manga patar-ari. Nakan papaladan niya kamu taynguna pag sirang.”
30Pagka sa dumasun pag sirang, magkun si Muysis sa manga tawu, “Nakabuwat kamu daka pag kasalanan. Dapat tumukad aku taynguna sa bantud, ati sa Panginuun; barang maawatan niku kamu maipatawad kanyu kasalanan.”
31Nakan binmalik si Muysis sa Panginuun magkun, “Duy Panginuun, daka gid pag kasalanan ti binwat inda pag manga tawu. Namuwat sida gintu pag diyus. 32Dapat taynguna, patawada duy nimu sida sa kanda kasalanan. Nu balaw nimu sida patawadun panasa yi lang nimu kang ngaran sa ribru kanmu sinuratan sa ngaran nimu nasakupan.”
33Sinmagut ti Panginuun sa kan Muysis, “Nu si unu ti nagkasala sa kangku, kanya pag ngaran ti panasun niku sa kang ribru. 34Paglakaw yi kawu, giyahi ti manga tawu atag sa pagsabihun niku sa kanmu pag rugar, giyahan kamu niku manga anghil. Dapat rumas-ug ti udas parusahan niku sida sa kanda manga kasalanan.”
35Namadara ti Panginuun sarut sa manga Israilita dahil kanda sinamba ti baka pag diyus-diyusan ti binwat ni Aarun.
Currently Selected:
Pag-ighit 32: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
