Pag-ighit 34

Ti Bag-u pag Malapad pag manga Batu

(Diyut. 10:1-5)

1Magkun ti Panginuun sa kan Muysis, “Pagbagasbas kawu duwa ka malapad pag manga batu parihu sa kabag-u, dahil suratan niku inda manga bagaw nakasurat sa un-an pag manga batu kanmu ginipak. 2Pag-alistu kawu aldaw surip, pagtukad kawu sa Bantud Sinai. Pagpasampak kawu sa kangku ati sa babaw bantud. 3Kailangan unman may kumuyug sa kanmu; una si unu balaw gid dapat kumakit sa una naan pag bahagi bantud. Una manga karanidu ngatay baka balaw gid mahimu manharab sa bantud.”

4Nakan namagasbas ngani si Muysis duwa ka malapad pag manga batu parihu sa kabag-u. Kinaaldawan, surip waya tinmukad yi siya sa Bantud Sinai angay sa pag-isugu Panginuun dara ti duwa ka malapad batu. 5Dinmugsun ti Panginuun sa panab-anan rurum bag-u sinampit niya kay ngaran Panginuun habang matindugan si Muysis sa kay atubangan. 6Linmawuy ti Panginuun sa kay atubangan ni Muysis magkun, “Aku ti Panginuun, ti maawaun ag mainawatun pag Diyus. Mapagmahal ag matinupadun aku, ag balaw madali magkagalit. 7Pag-ipakakit niku kang pagmahal sa mayamu tawu, ag pagpatawadun niku kanda kadautan, hanggan paglabag ag kasalanan. Dapat pagparusahan niku ti manga magkasala, hanggan yi kanda lahi tugka sa ikatlu ag ikap-at pag sinulput.”

8Linmuhud si Muysis sa daga ag sinmamba. 9Magkun siya, “Duy Panginuun, nu magbaya kawu sa kangku, magpakihampang duy aku ibahi nimu kami. Una maganit kay ulu inda pag manga tawu, patawada duy kami sa kanmi kadautan hanggan kasalanan. Tanggapa duy nimu kami bilang kanmu nasakupan.”

Inutru ti Kasunduan

(Pag. 23:14-19; Diyut. 7:1-5; 16:1-17)

10Magkun ti Panginuun, “Pagpatingi! Mamuwat aku kasunduan sa kanmu. Sa atubangan tanan kasimanwa nimu, mamuwat aku makadululaw pag manga bagay balaw waya niku nabuwat una naan pag nasyun sa buu kalibutan. Ti tanan nasyun sa kanmu palibut makakit nu aku, ti Panginuun bumuwat makadululaw para sa kanmu. 11Tupada kang pag-isugu sa kanmu kainda pag sirang. Palayasun niku ti manga Amuriyu, Hitiyu, Pirisiyu, Hibiyu ag manga Hibusiyu ginan sa itinaratu niku pag daga sa kanyu. 12Pihuun nimu balaw kawu mamuwat kasunduan sa manga tawu sa tunda pag daga kanyu atihan, dahil bumaliw dit-ag tunda para sa kanyu. 13Bagkus ngap, dautun niyu kanda manga harandugan, runuta kanda aramirawan pag manga batu, ag pamulda kanda manga tulduk tanda nida diyusa si Asira. 14Danga gid kamu magsamba sa tuhay pag manga diyus dahil aku, ti Panginuun, dayu may pagsambahun kamu tuhay. 15Danga gid kamu magbuwat kasunduan sa manga tawu mag-uli sa daga kanyu atihan. Dahil barang matuksu kamu mangaun kanda manga ihinandug nu binan-awan kamu nida sa kanda maghandug ag magsamba sa kanda manga diyus. 16Barang maasawa niyu manga anak kanda manga anak, imaw ti gumarya sa kanyu manga anak hampay mansamba sa tuhay pag manga diyus.

17“Danga kamu magbuwat manga diyus-diyusan.

18“Idaus niyu ti Pista Tinapay Unman may Pamadaka. Angay sa kang pag-isugu sa kanyu, pagkaun kamu tinapay unman may pamadaka sa sulud pitu ka sirang. Buwata niyu inda sa itinagka pag udas sa bulan Abib, dahil tida pag bulan kamu pag nakalwas sa Ihiptu.

19“Kangku ti tanan panganay anak lalaki, hanggan ti panganay lalaki manga hayup niyu. 20Mahimu lukatun ti panganay lalaki manga asnu niyu kay balyu karanidu. Dapat nu balaw lukatun kailangan matyun ti asnu bariun kay liug. Mahimu diman niyu lukatun ti manga panganay niyu anak lalaki.

“Unman may makapakarani sa kangku unman may dara handug.

21“Pagtarabahu kamu sa sulud unum ka sirang, dapat sa ikapitu pag sirang pumahari kamu, una sa udas tig-aradu ag tig-arani.

22“Alalahana niyu ti Pista Tig-arani, dumara kamu sa kangku kanyu un-an inani tirigu, ag alalahana diman niyu ti Pista Uryan Ani sa katapusan timpu.

23“Kada timpu, ti tanan niyu kalalakihan kailangan umatag sa inda pag tulu ka pista pagsamba sa kangku, ti Panginuun kanyu Amu, ti Diyus Israil. 24Palayasun niku ti manga nasakupan sa pag-ipakaun niku pag daga sa kanyu, padakaun niku kanyu magkaakupahan. Ag unman may gumira sa kanyu ngatay sumakup sa kanyu nasyun sa udas pumakarani kamu sa kangku, ti Panginuun niyu Diyus, sa inda pag tulu ka pista kada timpu.

25“Danga kamu maghandug sa kangku dugu may lakay tinapay may pamadaka. Danga diman kamu magsawad taguban para sa sunud pag sirang kanyu ihinandug sa udas Pista Pag-alaala sa Karibrihan.

26“Daran-a niyu sa Balay Panginuun kanyu Diyus ti pinakamarinu pag huray niyu un-an naani.

“Danga niyu pagtamaa ti anak kambing sa gatas niya sadili ina.”

27Magkun ti Panginuun sa kan Muysis, “Isurat nimu inda kang manga sinabi, dahil inda ti surundanun niku kasunduan sa kanmu hanggan sa Israil.” 28Napatayak ati si Muysis kaibahan ti Panginuun sa sulud upatpulu ka sirang ag upatpulu ka yabi unman siya may kinaun ag ininum. Isinurat Panginuun sa malapad pag batu ti manga surundanun kasunduan — ti Sampulu ka Sugu.

29Pagka linmus-ug si Muysis sa Bantud Sinai, dara niya ti duwa ka malapad pag batu sinuratan Kasuguan. Balaw niya alam masilaw maaw kay uyahun dahil sa kay naghampang sa Panginuun. 30Pagka nakitan ni Aarun hanggan tanan Israilita masilaw kay uyahun ni Muysis, nadala sida magpakarani sa kanya. 31Dapat tinawagan sida ni Muysis, nakan nagpakarani sida ni Aarun hanggan ti manga takinan manga Israilita, bag-u nanhampang si Muysis sa kanda. 32Igu dugay napakarani ti tanan Israilita sa kanya. Ag itinultul niya sa kanda ti tanan sugu ipinakaun Panginuun sa Bantud Sinai.

33Pagka natapus kay hampang ni Muysis sa kanda, pinatakipan niya kay uyahun. 34Dapat kada paslud sa Turda Taragbuan hampay pumakihampang sa Panginuun, pagbul-un niya kay patakip sa kay uyahun tugka sa makaluwas sa Turda. Nu nakaluwas yi siya, pagsabihun niya sa manga Israilita ti tanan pagsabihun Panginuun sa kanya, 35ag magkasilaw yi maan ti manga Israilita sa kay uyahun. Nakan pagpatakipan maan ni Muysis kay uyahun tugka sa makabalik siya sa Turda Taragbuan hampay pumakihampang sa Panginuun.

Currently Selected:

Pag-ighit 34: HNN

Highlight

Copy

Compare