Pag-ighit 27
27
Ti Harandugan Pagsunugan Panagda
(Pag. 38:1-7)
1“Pagpabwat kawu kudradu pag harandugan human sa kayu akasya. 5 ka luk-an siku kay aba, 5 ka luk-an siku kay lapad, ag 3 ka luk-an siku kay abwat. 2Pabwati inda ga manga sungay sa upat ka suuk, kaibahan yi sa pagbuwat harandugan. Saputun nimu galang ti harandugan. 3Ti tanan garamitun sa harandugan kailangan human sa galang — ti manga sukadan dapug, pala, malukung, lalaun pag panubuk para sa taguban ag sukadan baga. 4Pagpabwat diman kawu inalawat galang para sa harandugan, ag paulii inda talinga galang sa kada saruy. 5Bag-u ipaslud inda sa turungbawan baliwa sa karaw-an harandugan. 6Pagpabwat diman kawu yayungan pamas-an sa harandugan. Kailangan human inda sa kayu akasya, ag sinaputan galang. 7Ipasulung ti yayungan sa talinga sa kada saruy harandugan hampay makabyaw ti harandugan. 8Ti ipabwat nimu pag harandugan kailangan human sa tabla bag-u may ukang sa sulud. Pabwatan inda angay sa ipinakakit niku pag gayak sa kanmu sa bantud.”
Ti Sugkadan Turda Tiripnan
(Pag. 38:9-20)
9“Paulii sugkadan ti Turda Tiripnan, ag palibuti inda limbun human sa pisahan linu. Ti aba limbun baliwa sa salatan 100 ka luk-an siku. 10Isad-ang ti limbun sa 20 ka tulduk galang nakasul-ud sa 20 ka paratukawan galang. Ti sad-angan limbun imaw ti manga kaw-it pilak madamitan sa kay bantuyan#27:10 bantuyan: sa Inglis, iron bar. pilak sa manga tulduk. 11Ti limbun baliwa sa kanaway 100 ka luk-an siku kay aba. Isad-ang diman inda sa 20 ka tulduk galang nakasul-ud sa 20 ka paratukawan galang. Ti sarad-angan limbun imaw ti manga kaw-it pilak madamitan sa bantuyan pilak sa manga tulduk. 12Ti limbun baliwa sa isalpan may sukat 50 ka luk-an siku kay aba madamitan inda sa sampulu ka tulduk nakasul-ud sa sampulu ka paratukawan. 13Ti sugkadan baliwa sa butlakan 50 diman ka luk-an siku kay aba. 14Ti sabian baliwa sa butlakan paulian diman manga limbun sa baliw-baliw saruy. Ti limbun sa sikun 15 ka luk-an siku kay aba, ag madamitan sa tulu ka tulduk nakasul-ud sa tulu diman ka paratukawan. 15Ti limbun sa wala 15 ka luk-an siku kay aba, ag madamitan diman inda sa tulu ka tulduk nakasul-ud sa tulu ka paratukawan.
16“Kay ngapu sabian paulian nimu limbun manga 20 ka luk-an siku kay aba. Kailangan ti limbun pisahan linu binurdahan bunang malatuy, dungun ag marara. Kailangan mayad gid kay nagburda tunda. Bag-u isad-ang ti limbun sa upat ka tulduk nakasul-ud sa upat ka paratukawan. 17Kailangan may kaw-it ag bantuyan pilak ti tanan tulduk sa sangput sugkadan, ag kailangan diman may manga galang turungbawan. 18Ti kabuuhan sukat sugkadan 100 ka luk-an siku kay aba ag 50 ka luk-an siku kay lapad. Nasangputan inda limbun pisahan linu, 5 ka luk-an siku kay abwat ag kay manga paratukawan inda galang. 19Kailangan galang ti tanan garamitun sa Turda Tiripnan hanggan ti tanan patuk para sa Turda ag manga limbun sa kay sugkadan.
Ti Pag-asikasu sa Sulul-an sa Turda Tiripnan
(Pag. 24:1-4)
20“Suguun nimu ti manga Israilita kuntay darahi kawu nida lunsay pag lana ginan sa pin-ga ulibu para sa manga sulu Turda, hampay parargu marayaw kay magduag inda. 21Ipauli kay sukadan sulu sa luwas limbun magtakip sa Kaban Kasunduan. Si Aarun ag kay manga anak lalaki ti mangasikasu sa manga sulu sa Turda Tiripnan. May duag kailangan inda sa kang atubangan ginan sa yabi tugka sa surip. Inda pag surundanun kailangan sundun manga Israilita hanggan sa sunud nida pag manga sinulput tawu.”
Currently Selected:
Pag-ighit 27: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
