Pag-ighit 26
26
Ti Turda Tiripnan
(Pag. 36:8-38)
1“Pagpabuwat kawu Turda Tiripnan. Ti gamitun sa pagpabuwat sampulu ka pulud pisahan linu may burda dilana malatuy, dungun, ag marara. Ag paburdahi inda kirubin sa madunung pag manugburda. 2Kailangan parihu kay sukat ti kada pisahan kay aba 28 ka luk-an siku ag 4 ka luk-an siku kay lapad. 3Sugdung-sugdungun niyu inda tig lima; bali duwa ka tig lima. 4Bag-u pabwatan nimu talinga human sa pisahan malatuy ti kada saruy dinugpak-dugpak manga pisahan, 5tig 50 ka histuda singsing ti ipauli sa kada saruy ag kailangan turupadan inda. 6Pagpabuwat diman kawu 50 ka kaw-it gintu, bag-u dugpakun nimu ti manga pisahan sa panab-anan inda pag manga kaw-it hanggan talinga hampay mausa ti Turda Tiripnan.
7“Pabwati panabun ti Turda. 11 ka pulud pisahan binwat sa bulbul kambing ti gamitun sa pagbuwat inda. 8Kailangan kay aba 30 ka luk-an siku ti kada pisahan ag 4 ka luk-an siku kay lapad. 9Dugpak-dugpakun nimu ti lima ka pisahan ag katida diman ti buwatun sa unum ka nasawad. Ti ikan-um pag pisahan tiplukun sa atubangan Turda. 10Paulian diman nimu 50 ka pisahan talinga ti kada suru duwa ka dinugpak pisahan, 11ag idugpak siyun ti 50 ka galang kaw-it, para usa ka pisahan ti taklub. 12Ipalaylay niyu sa dayu Turda ti katunga sawad pisahan, 13ag ipalaylay diman sa kada habig ti usa may tunga ka luk-an siku pisahan kay sawad sa tabun Turda. 14Kay babaw tabun Turda tungbawan lukub lalaki karanidu tinagum marara, ag tungbawan waya marinu pag kalasi lukub.#26:14 marinu pag kalasi lukub: Mahimu kay ibug sabihun inda sa Hibriyu, lukub dulpin.
15“Kailangan kay lingub turda akasya pag manga tabla. 16Kay aba ti kada tabla 10 ka luk-an siku kay lapad 1 ka luk-an siku may tunga. 17Ti kada tabla lahaban duwa ka pansugdung agud misugdung sa usa waya ka tabla. Kailangan katunda ti buwatun sa tanan tabla. 18Ti 20 sa inda pag manga tabla ilingub sa Turda baliwa sa salatan. 19Inda pag manga tabla idugpak sa 40 ka paratukawan pilak — duwa ka paratukawan sa kada tabla. 20Ti baliwa sa kanaway Turda lingban diman 20 ka tabla, 21ag isul-ud diman sa 40 ka paratukawan pilak — duwa ka paratukawan sa kada tabla. 22Ti baliwa sa isalpan waydi Turda lingban unum ka tabla, 23ag duwa ka tabla sa kay manga suuk. 24Sugdungun kaayad ti manga tabla sa manga suuk ginan sa sirung tugka sa tungud sa panab-anan talinga. Kailangan parihu gid katunda ti buwatun sa duwa ka tabla sa manga saruy. 25Nakan may walu ka tabla sa inda pag bahagi Turda, ag nakasul-ud inda sa 16 ka paratukawan pilak — duwa ka paratukawan sa kada tabla.
26“Pagpabwat diman kawu manga pangagad human sa akasya — lima para sa kanaway baliwa Turda, 27lima diman baliwa sa salatan, ag lima diman baliwa sa isalpan sa dayu Turda. 28Ti pangagad sa karaw-an tabla ginan sa saruy Turda tugka sa baliw saruy. 29Saputun gintu ti manga tabla ag paulian talinga gintu pasulungan pangagad. Saputun diman gintu ti manga pangagad.
30“Kailangan ipatindug nimu ti Turda Tiripnan angay sa gayak kang binagaw sa kanmu atay sa bantud.
31“Pagpabwat diman kawu limbun#26:31 limbun: sa Tagalog, kurtina. pisahan linu kay bunang malatuy, dungun, ag marara. Ag paburdahi inda kirubin sa madunung pag manugburda. 32Isad-ang inda sa manga kaw-it gintu sa upat ka tulduk akasya sinaputan gintu. Inda pag upat ka tulduk nakasul-ud sa upat ka paratukawan pilak. 33Nu nisad-ang yi ti limbun sa manga kaw-it, ipauli sa kay dayu ti Kaban Kasunduan. Ti limbun ti magbulag sa Banal pag Sulud-sulud ag sa Pinakabanal pag Sulud-sulud. 34Ti Kaban Kasunduan kailangan ipauli sa Pinakabanal pag Sulud-sulud, kailangan sa kay babaw taklub ti Ulian Pangaawa. 35Ipauli ti lamisa sa luwas limbun Pinakabanal pag Sulud-sulud, sa kanaway baliwa Turda Tiripnan, ag ipauli sa tupad lamisa ti palaulian sulu sa salatan baliwa.
36“Pagpabwat diman kawu usa waya ka limbun para sa sabian Turda Tiripnan. Ti gamitun pisahan linu binurdahan bunang malatuy, dungun ag marara. Kailangan mayad gid kay nagburda tunda. 37Bag-u isad-ang inda sa kaw-it gintu sa lima ka tulduk akasya sinaputan gintu. Inda pag lima ka tulduk nakasul-ud sa lima ka paratukawan galang.”
Currently Selected:
Pag-ighit 26: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
