Pag-ighit 28

Ti manga Rutay manga Manug-asiwa

(Pag. 39:1-7)

1“Ipablag nimu sa manga tawu si Aarun kanmu patar-ari hanggan kay manga anak lalaki sida ni Nadab, ni Abihu, ni Iliyasar ag ni Itamar hampay magsirbi sida sa kangku bilang manughandug. 2Pagpatahi kawu banal pag rutay para sa kan Aarun, sa ikagalang hanggan sa ikadayaw manga tawu. 3Sabihun nimu sa tanan antigu pag manugtahi kang pinakan-an kakayahan manahi kuntay tahian nida rutay si Aarun imaw ti manpatuhay sa kanya sa manga tawu hampay makasirbi siya sa kangku bilang manughandug. 4Inda ti tahiun nida pag manga rutay: ti bursa sa may dubdub, ti ipud, ti kulimpay, ti pansulud pag rutay binurdahan, ti pantaung hanggan ti panhawud. Tahiun nida ti banal pag manga rutay para sa kanmu patar-ari sa kan Aarun ag sa kay manga anak, hampay makasirbi sida sa kangku bilang manughandug. 5Kailangan kanda gamitun bunang kulay gintu, malatuy, dungun ag marara hanggan linu.

Ti Panulung manga Manug-asiwa

(Pag. 39:2-7)

6“Ti ipud kailangan ngani buwat sa pisahan linu binurdahan kulay gintu, bunang malatuy, dungun ag marara. Kailangan mayad gid kay nagburda tunda. 7May duwa inda ka bahagi, sa dayu ag sa sarangwan, bag-u may duwa higut panakbay sa labay. 8Ti huragkus human sa linu binurdahan kulay gintu ag bunang malatuy, dungun ag marara.

9“Bag-u pagpab-ul kawu duwa ka batu uniks ag ilahab nimu siti ti manga ngaran manga anak lalaki ni Hakub.#28:9 Hakub: sa Hibriyu, Israil. 10Kailangan darasnan kay magpauli manga ngaran angay sa kanda pagkalusad, sa kada batu tig unum ka ngaran. 11Kailangan ilahab inda parihu sa paglahab manugpanday pilak sa manga panmarka. Bag-u ipauli ti manga batu sa gintu pag palaulian 12ag ipakput inda sa may labay sa ipud bilang alaala pag manga batu para sa manga linahi ni Israil. Sa panab-anan inda, pirmi madara ni Aarun ti ngaran nida sa atubangan Panginuun, ag alalahanun niku sida. 13Ti gintu pag palaulian 14paulii nimu duwa ka tarikada human sa lunsay gid pag gintu hampay maitakud sa may labay rutay.

Ti Bursa sa Dubdub

(Pag. 39:8-21)

15“Pagpabwat kawu bursa sa dubdub gamitun panulung hampay maalaman ti nalub-anan niku.#28:15 Bantayi diman ti talata 30. Kailangan mayad gid kay nagburda tunda, ag kay pisahan parihu sa ipud manga manughandug: linu binurdahan kulay gintu, bunang malatuy, dungun ag marara. 16Ti bursa sa dubdub kailangan dubli kay tipluk ag parihu kay sukat — usa ka dangaw kay aba ag usa diman ka dangaw kay lapad. 17Paulii inda upat ka manga hatay mahalaga pag batu. Sa un-an hatay, ipauli ti rubi, hanggan ti tupasyu ag birilyu; 18sa ikadwa pag hatay, ismiralda, sapiru, ag diyamanti; 19sa ikatlu pag hatay, hasintu, agata, ag amatista, 20ag sa ikap-at pag hatay, kirisulitu, uniks, ag haspi. Ipauli ti batu sa gintu pag palaulian. 21Kailangan may ngaran manga anak ni Hakub ti kada batu pahalimbawa sa 12 ka linahi ni Israil. Kailangan pararihu kay nag lahab pangaran ti lahab panmarka.

22“Paulian diman tarikada human sa lunsay gintu ti bursa sa dubdub. 23Pagpabwat kawu duwa ka talinga gintu ag isugdung inda sa tungud manga suuk bursa sa dubdub. 24Isulung ti duwa ka gintu tarikada sa duwa ka talinga bursa sa dubdub, 25ag ihigut ti duwa ka pudpud tarikada sa duwa ka gintu pag palaulian masulputan sa duwa ka sinulapid sa ipud. 26Pagpabwat kawu duwa ka talinga gintu ag isugdung inda sa sirung saruy bursa sa dubdub mauniban sa ipud. 27Pagpabuwat waya kawu duwa ka talinga gintu, paulian inda sa ipud baliwa sa may huragkus. 28Bag-u higtan niyu malatuy sa sirung baliwa talinga sa dubdub hanggan ti talinga ipud. Sa panab-anan inda, maihigut mayad ti bursa sa may dubdub sa ipud.

29“Nu sumulud si Aarun sa Banal pag Sulud-sulud kailangan sulung niya ti bursa sa dubdub may manga ngaran linahi ni Israil hampay alalahanun niku sida pirmi. 30Ipauli sa bursa sa dubdub ti Urim ag Tumim#28:30 Urim ag Tumim: Duwa ka bagay garamitun sa pag-alam sa kagustuhan Diyus. hampay ati inda sa bursa sa dubdub ni Aarun nu umatag siya sa kang atubangan. Nakan pirmi daran-un ni Aarun inda pag duwa ka bagay kada atabug siya sa atubangan niku hampay maalaman niya kang kagustuhan para sa manga Israilita.

Ti Tuhay waya pag Panrutayun manga Manug-asiwa

(Pag. 39:22-31)

31“Ti pamaunib kailangan lunsay malatuy magkapababawan ipud. 32Ag liugan sa karaw-an para sa ulu, lapisan diman kay liug agud balaw magisi. 33-34Pag may paraway inda manga pamarinu ga histuda burak kayu pumigranata,#28:33-34 pumigranata: Bantayi ti Listahan manga Bagaw sa dayu. buwat sa bunang malatuy, dungun ag marara. Ipakaraw-an nimu inda pag manga pamarinu sa tab-anan manga gintu pag gurung-gurung. 35Kailangan isulung inda ni Aarun nu magsulud siya sa Banal pag Sulud-sulud hampay magsirbi sa kang atubangan, hampay madnugan kay tunug gurung-gurung nu magsulud ag magpalwas siya sa Banal pag Sulud-sulud. Nu buwatun niya inda, balaw siya mamatay.

36“Pagpabwat kawu midalya gintu ag palahaban nimu inda kainda pag bagaw: ‘Ipinablag tag sa Panginuun.’ 37Ihigut nimu inda sa atubangan pantaung ni Aarun sa panab-anan malatuy pag higut, 38hampay makitan inda sa kay bangas. Pag-ipakakit inda pag-akuun ni Aarun ti kasalanan manga Israilita sa kanda maghandug sa Panginuun. Pagpirmi inda sa kay bangas ni Aarun agud makabaya ti Panginuun sa kanda.

39“Ti pansulud pag rutay ni Aarun kailangan linu, katida diman kay pantaung. Ti huragkus kailangan binurdahan marinu. 40Pagpatahi diman kawu pansulud pag rutay, manga huragkus, hanggan manga pantaung, para sa kay manga anak ni Aarun sa ikagalang hanggan sa ikadayaw manga tawu. 41Ipasulung nimu ti manga rutay sa kanmu patar-ari sa kan Aarun ag sa kay manga anak lalaki, bag-u payidan#28:41 payidan: ngatay, buhusan. nimu sida lana ulibu ag itigana sa buruwatun. Ipablag nimu sida sa kangku hampay makasirbi sida sa kangku bilang manga manughandug.

42“Patahian nimu sida manga salwal tabun sa kanda kauyaan. Kay aba inda ginan sa awak tugka sa balangbang hampay balaw sida mapasirang. 43Kailangan nida inda isulung nu magsulud sida sa Turda Tiripnan, ngatay nu magpakarani sida sa harandugan sa Banal pag Sulud-sulud sa pagsirbi bilang manga manughandug, agud balaw sida sumalan ag mamatay. Inda pag surundanun kailangan sundun ni Aarun hanggan niya manga lahi hanggan aban.

Currently Selected:

Pag-ighit 28: HNN

Highlight

Copy

Compare