Pag-ighit 25
25
Ti manga Panagda para sa Turda Tiripnan
(Pag. 35:4-9)
1Magkun ti Panginuun sa kan Muysis, 2“Sabihun nimu sa manga Israilita paghandug sida sa kangku. Kawu ti tumanggap kanda manga pagkaibgan ihandug sa kangku. 3Inda kanmu tanggapun pag manga handug ginan sa kanda: gintu, pilak, galang, 4bunang malatuy, dungun ag marara, marinu pag kalasi pisahan#25:4 pisahan: sa Tagalog, tela. linu, pisahan binwat sa bulbul kambing, 5lukub lalaki karanidu tinagum marara, marinu pag kalasi lukub,#25:5 marinu pag kalasi lukub: Mahimu kay ibug sabihun inda sa Hibriyu, lukub dulpin. kayu akasya, 6lana ulibu para sa sulul-an, manga panlakay sa lana pamayid ag pamanglu sa kamangyan, 7batu uniks ag iba waya mahalaga pag manga batu pag-ipakput sa ipud#25:7 ipud: Bantayi ti Listahan manga Bagaw sa dayu. pangulu manughandug hanggan sa kay bursa sa dubdub.
8“Ipabwat nimu sa nasakupan Israil ti banal pag ulian para sa kangku nu naan aku pag umuli kaibahan nida. 9Ipabwat ngani nimu inda ti banal pag ulian hanggan ti tanan garamitun angay sa pag-ipakakit niku pag gayak sa kanmu.” (Inda ti banal pag ulian pag-ingarnan diman Turda Tiripnan).
Ti Kaban Kasunduan
(Pag. 37:1-9)
10“Pagpabwat kawu kaban buwat sa akasya#25:10 Pagpabwat kawu kaban buwat sa akasya: Inda pag kaban usa ka garamitun sa Banal pag Ulian, imaw diman ti Turda Tiripnan. — 2 ka luk-an siku may tunga kay aba, 1 ka luk-an siku may tunga kay lapad ag 1 ka luk-an siku may tunga kay abwat. 11Saputun niyu kay sulud ag luwas lunsay gintu, ag paulian hinulma gintu kay palibut inda. 12Pagpabwat kamu upat ka talinga gintu ag ipahuput siyun sa kay upat ka tulduk. 13Pagpabwat diman kawu yayungan human sa akasya ag saputun inda gintu. 14Ipasulung ti manga yayungan sa manga talinga gintu sa kada saruy Kaban agud mayayung ti Kaban. 15Danga gid niyu pagbul-a ti manga yayungan ginan sa talinga kaban. 16Ipauli nimu sa Kaban ti duwa ka malapad pag batu siyun pag nakasurat ti kasuguan ipinakaun niku sa kanmu.
17“Buwati niyu taklub lunsay gintu ti Kaban, 2 ka luk-an siku may tunga kay aba ag 1 ka luk-an siku may tunga kay lapad. 18-19Pagpabwat diman kawu duwa ka gintu kirubin ag ipauli inda sa baliw-baliw pudpud taklub Kaban, ti Ulian Pangaawa. 20Kailangan mabukladan patungud kay manga pakpak kirubin hampay mahamuyan nida manga pakpak ti taklub, ag kailangan mag-aratubangan sida duwa magbantay sa taklub. 21Ipauli ngani nimu sa Kaban ti ipinakaun niku pag Kasuguan sa kanmu, bag-u takluban nimu ti Kaban. 22Pumasampak aku sa kanmu ati sa karaw-an duwa ka kirubin ati sa babaw Kaban, ag ipakaun niku sa kanmu ti tanan sugu para sa nasakupan Israil.
Ti Lamisa Burugtangan Tinapay
(Pag. 37:10-16)
23“Pagpabuwat diman kawu lamisa human sa akasya, kay sukat 2 ka luk-an siku kay aba, 1 ka luk-an siku kay lapad ag 1 ka luk-an siku may tunga kay abwat. 24Saputun niyu inda lunsay gintu ag paulian hinulma gintu kay manga palibut inda. 25Paulii diman niyu sanipa kay palibut, usa ka dangaw kay lapad, ag palibuti gintu kay palibut sanipa. 26Pagpabwat diman kawu upat ka talinga gintu ag ipakput sa upat ka suuk lamisa, sa may tupad lulud, 27arani sa sanipa. Siyun niyu pag ipasulung ti yayungan pamas-an sa lamisa. 28Dapat namhan sa akasya kay panyayung ag sinaputan gintu.
29“Pagpabwat diman kawu manga taya, ungut,#25:29 ungut: Balaw malinaw kay ibug sabihun sa Hibriyu inda. tapayan ag manga malukung garamitun para sa handug irinmun.#25:29 handug irinmun: Bantayi ti Listahan manga Bagaw sa dayu. Kailangan lunsay diman gintu inda. 30Kailangan pirmi paulian tinapay handug sa kang atubangan ti lamisa.
Ti Palaulian Sulu
(Pag. 37:17-24)
31“Pagpabwat diman kawu manga palaulian sulu lunsay gintu kay lulud, kay bilug ag manga pamarinu ga histuda busang kayu, kay iba um-um di waya ag kay iba mabukladan yi. Inda pag pamarinu kaibahan yi pagka binwat ti bilug palaulian sulu. 32Ti palaulian sulu may unum ka sanga, tig-tigutlu sa kada saruy. 33Ti kada sanga may tulu ka palaulian histuda busang kayu almindru, kay iba um-um waya ag kay iba mabukladan yi. 34Ti bilug palaulian sulu may upat ka pamarinu parihu sa histuda busang kayu almindru, kay iba um-um waya ag kay iba mabukladan yi. 35May usa ka histuda busang kayu sa sirung kada paris unum ka sanga. 36Ti manga pamarinu busang kayu ag ti manga sanga hinulma kaibahan palaulian sulu.
37“Pagpabuwat kawu pitu ka sulul-an ag ipauli sa kay paulian, agud marayaw sa kay atubangan. 38Ti manga pangilpit ag ti manga panalud dapug sulu kailangan lunsay gintu diman. 39Manga 35 ka kilu lunsay gintu ti kailangan nimu sa pagpabwat palaulian sulu hanggan sa tanan pag kagamitan siyun. 40Pihuun nimu ipabuwat inda tanan angay sa ipinakakit niku pag gayak sa kanmu atay sa bantud.
Currently Selected:
Pag-ighit 25: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
