Pag-ighit 24

Tinanggap manga Israilita ti Taratu Panginuun

1Magkun ti Panginuun sa kan Muysis, “Pagtukad kawu sitay sa kangku ibaha nimu sida ni Aarun, ni Nadab, ni Abihu ag ti 70 ka paggurangunun sa Israil. Pagsamba sida sa kangku ati sa kay luwas lang. 2Kawu lang Muysis ti makapakarani sa kangku, ti iba balaw mahimu makapakarani. Ti manga tawu balaw gid mahimu tumukad ataytag kaibahan nimu.”

3Pagka itinultul ni Muysis sa manga tawu ti tanan itinudlu ag isinugu Panginuun, durunganan sida sinmagut, “Sundun nimi ti tanan sinabi Panginuun.” 4Ag isinurat ni Muysis ti tanan sinabi Panginuun.

Igu surip, maaga binmangun si Muysis ag nagpatindug harandugan sa sugkad bantud, ag nagpauli siya 12 ka batu alaala mustara sa 12 ka linahi Israil. 5Bag-u sinugu niya ti manga kalay-awan lalaki hampay manhandug sa Panginuun manga handug pagsunugun ag manhandug diman manga tudu baka handug sa mayad pag pakiusa. 6Bin-ul ni Muysis ti dugu, kay katunga ipinauli sa manga malukung, bag-u kay katunga iwinisik sa harandugan. 7Bin-ul diman niya ti Ribru Kasunduan ag binasa inda sa manga tawu. Bag-u sinmagut ti manga tawu, “Sundun nimi ti tanan sinabi Panginuun. Sundun nimi siya.”

8Bag-u bin-ul niya ti dugu sa manga malukung ag iwinisik inda sa manga tawu, ag magkun, “Inda ti dugu magparig-un sa kasunduan binwat Panginuun sa kanyu pagka ipinakaun niya inda tanan pag sugu.”

9Nagtukad sa bantud sida ni Muysis, ni Aarun, ni Nadab, ag ni Abihu hanggan ti 70 ka paggurangunun sa Israil, 10ag nakitan nida ti Diyus Israil. Kay tarat-an ga batu sapiru masilaw parihu sa langit. 11Una nakitan manga takinan ti Diyus, balaw sida minatay Diyus. Nangaun waya ngani ag nanginum sida ati sa kay atubangan.

12Bag-u magkun ti Panginuun sa kan Muysis, “Pagtukad kawu ataytag sa kangku sa babaw bantud ag pag-alagad, dahil iayaw niku sa kanmu ti manga maralapi batu sinuratan niku kang kasuguan ag surundanun hampay itudlu sa manga tawu.” 13Nakan tinmukad si Muysis sa bantud Diyus kaibahan kay manugsirbi si Huswi. 14Bag-u di sida tinmukad, magkun si Muysis sa manga paggurangunun sa Israil, “Alagda niyu kami sitay tugka sa makabalik kami. Matayak sitay sida ni Aarun Hur, ag nu may kakurian kamu, pagpakarani lang kamu sa kanda.”

15Pagras-ug ni Muysis sa babaw bantud, natakluban rurum ti bantud. 16Dinmugsun ti kadayawan Panginuun sa Bantud Sinai, ag sa sulud unum ka sirang, natakluban rurum ti bantud. Pagka sa ikapitu pag sirang, tinawag Panginuun ginan sa rurum si Muysis. 17-18Nakan sinmulud si Muysis sa rurum habang magtukad waya gid siya sa bantud. Napatayak siya ati sa sulud upatpulu ka sirang ag upatpulu ka yabi. Nu sa manga Israilita ati sa lawud, bilang apuy maglabdaban ti kadayawan Panginuun sa babaw bantud.

Currently Selected:

Pag-ighit 24: HNN

Highlight

Copy

Compare