2 Korintiye 12
12
Shee Yesu a bɨlə Bulus a vor diya
1Na pɨrə humwa mbak-mbak ka məndaranye. Nagi taa asə mye ɓa ɗɨmə də, na pɨrə ka byele a nə shee Həmɨmiye a bɨldərən a vor diya. 2Hɨn lee ama a dɨ koɗə Ma Həmɨnpwa a Yaɓwarən a vor kyawatə bəw a mbiɗi-fwatte pɨri, mya nggutən a muɗə kan a vor pwatɨ mwaakɨnətə#12.2 Pwatɨ mwaakɨnətə nə haa Həmɨnpwa a gə də., nagi a vor sɨtə mangɨn a gə, hɨn taa leyi, Həmɨnpwa nə hiɗə leyi. 3Hɨn lee mangɨn, nagi a dii twayingən ka sɨtə, na a vor pitə Həmɨnpwa a wunən diya, hɨn taa leyi, Həmɨnpwa nə hiɗə leyi. 4Mya nggur mangɨn a zəkan gaarə a vor haa mya wa atɨ paradai. Də nda dɨ kɨl wule ləməgyee myaa dɨ mba bwetə a boyo, a wule la myaawa ɗaka ɓwaara nda boyo. 5Hɨn ɓa məndaranye gə wule ma ɓətɨ a, shezə hɨn taa dɨ məndaranye gələ nəna, a pɨrgə yatɨ de. 6Nagi na mwo ɓa məndaranye, angɨn a hake aa dɨtti, gəkɨlə hɨn leyə atɨ diyalə na dɨ boyo. Shezə na kwo ta məndaranye gə ɓe ama aa ngguti kɨr-kɨr a pɨrgə wule sa na dɨ ɗa ka ləməgyee na dɨ boyo.
7Gəkɨlə ɓe naa nggorkonye a nə wule diya gbaka Həmɨnpwa a wuni, mya ɓə ɗake ka tənətə ka ootə ɓətɨ hwolə a kada sɨshi, Shetan nə tiya ləngɨn gə nda tənəə di kɨr-kɨr. 8Na nyisə Həmɨmiye a laka mwaakɨn gə nda take ka tənətɨngɨn a ngguri gərə. 9Shezə ndi ta se atɨ, “Wuladəha na bɨlu kənə she, gə dɨ vor ɗongə mbarətə na dɨ bɨldə gətɨ de.” Gə ləngɨn, hɨn ɓa məndaranye ka hanɨngtə gə yatɨ de, gə gəta Ma Həmɨnpwa a Yaɓwarən a janga a nza ɓwaa ke. 10Gə ləngɨn hanɨnyi ka yatɨ de, ka wule ɗaate mya dɨ ɗaari a dɨtti, ka tənətə som-som, ka yedi-kɨttə a wule 'ye na pɨrədə gə le da Ma Həmɨnpwa a Yaɓwarən. Gə hɨn leyə atɨ hɨnə ka yatə, kat ka angɨn hɨnə ka gətə.
Ɗyengle da Bulus a nə ji-kotte a Korintiya
11Hɨnə mɨndə na dɨɗə. Hwunə ɗɨkdi də, diyalə hwunə kana hwuna nda humwe. Ɓə mɨnə mirə sa atɨ “tən kpe-lagbe gbaki” a pɨrgi kan? Nagiya hɨn leyə atɨ hɨn aa asə. 12Shee kana təna bɨldə sate atɨ hɨn kpa-lagbe diyalə, tənə zərgi shikoshopye ka sɨndəla na ɗatɨrən a wakasəwnə a vor mbasɨtə ka ɓwamosowe. 13Ɓə mɨnə i ji-kotti a ehee a pɨrgəwnə kan, pɨrgə sate atɨ hɨn taawa luu taa həmtə a tɨfəngəwna? Anda angɨn nə səhasə, hwuna ngguri gən ko.
14Zə niyəm hɨn ɓwe omotə ɓa mɨnashi hakəwnə, angɨn nə mwaakɨnə shitɨ de, hɨn taa dɨ gəwnə sɨtɨrə mgban, gəkɨlə aa lə shee dəwnə nə dɨ shike a hakəwnə, shezə hwunə na dɨ ɗyengləngəwnə. Aɓə aa je nə dɨ ɨlshe pedərən gə yə sɨnggərən, yə sɨnggərən nə dɨ pedə shee gə le da je. 15Hɨnggi ka hanɨngtə hɨn ɓa vədə nagi ndo sə na gə kan kat, na mɨna vədə na mgban gə le dəwnə. Hɨnggi na mworəwnə ka huboshi kat nagi hwunaa mwori. 16Sə gən ɓətɨ na boyo, taa kɨɗa yedingəwnə a ɗiyəwnə lə taa, kat ka angɨn hwuna dɨ niyə kuta na ɗa gə na vwakarəwna? 17Ɓətɨ a vor myee na lyentɨrən a hakəwnə, hwuna niyə ɓətɨ na lyen mingɨn gə na luu taa dəwnə a zɨmə ma? 18Ite na nyisə Titus a lyentən ka a nzə-nuwoti a hakəwnə, nda luu taa dəwnə a zɨmə ma? Ɓətɨ ɗyangale de ka lyentɨ de ka hɨnggə Titus tam kat hiɗə ma?
19Hwuna dɨ niyə ɓətɨ ɓərə hina dɨ ɓərə gə hina luwa nəngenə a hakəwnə ma? Hina dɨ byelə a humwa Həmɨnpwa ka diyale gə le da Ma Həmɨnpwa a Yaɓwarən ma hina dɨ koɗən. Hwun yə ndewegi 'ye na dɨ mwo, nagi ndo sə kat hina dɨ ɗa, hina dɨ ɗarən gə hina nyerədəwnə. 20Kala dɨ gi nə atɨ, ɓe naa zə hakəwnə ndəng sa na dɨ kana aa sɨnə na pan. Ndəng mgban hɨn kana zə hakəwnə sa hwuna dɨ kana ɓa nan a hake aa sɨnə hwun ɓa nan. Ndəng məntəmətə a maɗə ka jiwne ka muune ka bɨldə som-somtə ka kɨɗa kwake ka lamdəha ka nggorkonye kat ka tukutaha. 21Kala dɨ gi nə atɨ, ɓe naa zə a pəwnə Həmɨnpwatɨ de a hyate a humwasəwnə, na mɨna pɨrə yedi-kɨttə a nə myee hananang pawo vor səhase kɨnɨnɨng tənaa por-njiya ka wule səhase darən, a wule tukutte təna pɨrədə, i ɨl mandye kat ka sharawna təna gə vorsən kɨnɨnɨng.
Currently Selected:
2 Korintiye 12: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
