2 Korintiye 11
11
Bulus ka kpe-lagbi jeronye
1Mwoshinə atɨ hwuna nda nggur mbasɨtə ke ɓyeləng gə wule ləməgye na dɨ boyo ɓətɨ dɨɗə. Hɨne dɨ nyisəwnə, zə nggurəm mbasɨtə ke. 2Hɨnə ka jiwnəngəwnə a yedi a wule jiwna Həmɨnpwa a gə kan pepe, gə hɨnə ma nggɨltəwnə tiyagəwnə ɓətɨ mure a dɨ tiyagə metə, gəkɨlə na nggutəwnə ɓətɨ nji-rikiti shet-shet a zə kəwnə a haka Ma Həmɨnpwa a Yaɓwarən. 3Kala dɨ gi nə atɨ, ɓe Shetan a rukuna aa vwakarəwnə ɓətɨ nda vwaka Hawawu ka kuta, ndəng gye a haa, mya sɨ tukuta ɗyangale dəwnə hwuna virwo a ɗaka Ma Həmɨnpwa a Yaɓwarən a hwuna mwadiyale kan ka hubo shet-shettə. 4Gə ama som kana shi hakəwnə a kənəwnə shee a nə a Yesuti som ka a hina kənəwnə shee a nəngɨn, naasə mgban hwun kana luu wule iti piti som ka wule Pite hwuna luwo dɨ hakenə, nagi a ləmə femə imi a shikəwnə kan som ka wule la hina boyownə, hwuna dɨ nzaa luwo tan-tan. 5Hɨnggi na dɨ niyə atɨ mirə dɨ nggur nəngrən kɨr-kɨr atɨ tən kpe-lagbe gbaki da Yesu, taa ama pɨrgi ka asə a vorsərən kat. 6Nagi a nə sate atɨ myaa kəni byele ɓətɨ mirə, kat ka angɨn hɨn lee sa kana na leyə, hɨn lee la na dɨ boyo, gə hɨn bɨləwnə ləngɨn bwang a nagi ndo tɨfə.
7Səhasə na ɗa ka hyatate na hyata na gə mya ndukodəwnə ma? Shi na ɗwanga gə na kənəwnə shee a boyownə le da Həmɨnpwa ɓaa hwunaa mbwe asa? 8Na porgə i ji-kotti shee dɨ vəni hiwtɨ darən dɨ ha gwate təna gwadi ka taa gə na shi hakəwnə a gwadəwnə. 9Ite hɨne a hakəwnə, nagi na ɗongə se taawa nyisəwnə gəkɨlə hɨn taa mwi atɨ na gəə sɨtɨrə a nəngəwnə. Gələ ji-kotte shi dɨ Masɨdoniya shike ka sa kat na dɨ ɨlə. Sə mgban hɨn ɓa pɨrə humwa ta ɗa hɨn taa dɨ ɨl asə a hakəwnə. 10Taa ama də a vor njiya Akaya kat a ɓa kəri məndaranye gəkɨlə diyale da Ma Həmɨnpwa a Yaɓwarən nee a vor huboshi. 11Mɨnə ɓə? Ama ɓa sa atɨ taa mworəwnə ma? Həmɨnpwa ka nənəngɨn leyə atɨ hɨne dɨ mworəwnə. 12Hɨn ɓa pɨrə humwa ka wule sa na dɨ ɗa, gə myee dɨ məndaranyi dɨ kana nəngrən kenə atɨ lyentɨ darən nə ɓətɨ hɨnggenə, shezə aa sə, tən ɗongə la tən ɓa məndaranye kan.
13Wule mingɨn, ji-kər jeronyi atɨ tənə kpe-lagbe da Ma Həmɨnpwa a Yaɓwarən, tənə dɨ vwakaha ka lyentɨ darən, tənə dɨ bura kpe-lagbe da Ma Həmɨnpwa a Yaɓwarən. 14Angɨn mgban aa sə ndələ gəkɨlə nagi Shetan nə ka nənəngɨn, nda dɨ bura malyenə ɓɨrtə da Həmɨnpwa. 15Angɨn aa sə ndələ ka ite atɨ kɨse da Shetan a dɨ woyo a bura kɨse pepeye 'ye dɨ bwe le da Həmɨnpwa. A kpawtə tən ɓa mɨnə lyentɨ hattɨ darən.
Bulus məndaranye a nə tənətɨ dan
16Hɨnə dɨ mɨn-magba atɨ, ɓe ama aa ngguti ɓətɨ hɨn dɨɗə. Anda sə hwuna ngguti, zə kɨləm ləməgyee na dɨ boyo ɓətɨ byelə dəɗi gə hɨn mgban na kwa ɗɨm humwatə a məndaranye. 17Ləməginə na dɨ boyo, taawa bwetɨrən ɓətɨ Həmɨmiye nə dɨ byeli, na dɨ byelə ɓətɨ dɨɗə gə wule məndaranye de. 18Naya imi a dɨ məndaranye ɓətɨ mi vɨratə a dɨ ɗa, sə mgban na dɨ ɗa. 19Gəkɨlə kat ka lele dəwnə hwuna dɨ nggur mbasɨtə a sardə kwakingəwnə a kɨl dəɗye ka hanɨngtə! 20Hwuna dɨ nggur mbasɨtə nagi ama a shi hakəwnə a ɗɨkdəwnə a vor kɨsawne, hwuna dɨ mwa a luwo. Ama kana shi hakəwnə ta zɨmgəwnəshe ɓaa, hwuna dɨ mwaka angɨn mgban. Ama kana shi a vwakarəwnə a lugəwnə shee, ama kana shi hakəwnə ka nggorkonye atɨ ndi inə, ama kana fɨlagəwnə, hwuna dɨ luwo ɗəng. 21Sopye gi ka ləngɨn ka sate atɨ, hin taa ɗati kenə, hinaa ɗəwnə wule shingɨn 'ye mya ɗəwnə!
Na dɨ byelə ɓətɨ hɨn dɨɗə. Sa ama a dɨ ɓərə a məndaranye kan, sə mgban na dɨ ɗa. 22Anda tən Ibɨraniyi, hɨn mgban sə na gə. Anda tən Yawude, sə na gə. Anda dɨ kwirə Ibɨraim gərən, hɨn mgban dɨ kwirəngɨn na gə. 23Anda Ma Həmɨnpwa a Yaɓwarən nə təna dɨ ɗan lyentə ɓətɨ kɨse, hɨn lyeni pɨrgərən (hɨn kana sa atɨ hɨn ɓa byelə, hɨn tamdə a sombi). Hɨn tyengləngə lyentɨngɨn, gə mye pɨrdi a gbərəwe laka pɨrgərən kat, hɨn sop lyapa hananang, hɨne a kwaamɨ we mba-dɨ-mba. 24Yawude lyebri bəwtə mwaakɨn a mbiɗi dombiɗə laka tuf, 25mye lyebri ka gaare laka mwaakɨn. Mye kalari ka fare, koombotə fələ ke laka mwaakɨn a nə gbɨnuwe, hɨn bə haa bwange a vor gbɨnuwtɨ sɨkorən a nə galbatɨ koombote fəli tukotə hiɗə ka fəre. 26A vor omotɨ de fərə-fərə, hɨn pɨrə tənətə a nə gbɨnuwe, hɨn pɨrə tɨfə ji-ɓodəkha. Hɨn pɨrə tənətə a waka myee de, hɨn pɨrə tənətə a waka wule myee aa Yawude, hɨn pɨrə vor tənətə som-som a vor vɨra kpantə, hɨn pɨrə tənətə a vor pɨɗe. Hɨn pɨrə tənətə a vor gbɨnuwtɨ sɨkorən, hɨn pɨrə tənətə a tɨfə ji-kər jeronyee shibuta pɨra a wakasenə atɨ tən ji-kotti. 27Hɨn lyenə tyengləngə ɓwa kɨr-kɨr. Tukotə hananang hɨn taa shini, myatə ka wor-haɓye nə dɨ a gyengə, a fərə mgban na dɨ woyo taa humwa zɨmshi ke, hɨn bə tale taa sɨkupati ke. 28Aa wule shingɨn nə ɓəmbə, gə nagi ndo fərə taa piyati ke gə le da ji-kotte a vəni hiwtə kat 'ye na dɨ ɗyengləngrən. 29Anda ama nə də aa nyerə, taa ɗati kan, sə mgban taa ɗati ke. Ɓə wonə mgban mya ɗɨkdən nda pawo a fukə vor səhase, hɨn taa ɓə ɗa yedi-kɨttə ka angɨn?
30Anda asə nə də ɓa ɗɨkə mbak-mbak na məndaranye kan, hɨn ɓa məndaranye a nə bɨldə ɗongə mbarətə de. 31Həmɨnpwa sɨnə ma kana mya ɓondirən kaaru-kaaru ndi Baagə Həmɨmiye Yesu, gə ɓə leyə atɨ aa jeronyi na dɨ kəsə ka ləməgye na dɨ boyo. 32Ite hɨne a vor Damaska, nggwamnate a pukə hama Areta a gbə hee a takadə vɨratɨngɨn gə nda ɗɨmə a kɨtti. 33Shezə mya pɨrdi a vor kuune a jengdi ka salake dɨ bahawe a sɨtɨ nwoshe takadə vɨratɨngɨn dɨ pwa, na ɓə shibutə a dɨmgə tɨfəngɨn a giɓə.
Currently Selected:
2 Korintiye 11: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
