2 Korintiye 13
13
Gɨraha kpawta Bulus
1Mwaakɨnə zə shi a hakəwnə nə itɨnə. “Dɨ kwaamɨ ji-takale kpe naasə mwaakɨn, byele a dɨ nzaa diyalə.”#13.1 Naasə: Gɨraha 19.15. 2A kpeyə zəte na zə hakəwnə, na gɨrarəwnə, ɓəgəng hɨn tam a hakəwnə. Kat ka angɨn hɨnə dɨ mɨn-magba gɨrahangɨn atɨ, hɨn kana tɨlə hakəwnə, hɨn ɓa ɗa myee ɗa səhase kɨnɨnɨng sɨgbəɗye ka mbiɗisərən kat. 3Gə hwuna sa atɨ hwune mwi hwuna leyə anda Ma Həmɨnpwa a Yaɓwarən nə byeli ke na ɓə dɨ bwe le. Hwunaa leyə atɨ Ma Həmɨnpwa a Yaɓwarən aa ma yati, sɨne ka gətə a wakasəwnə ɓa ɗa sɨgbəɗye. 4Mbak-mbak mye gbaltən a nə kada ɓɨdɨmtə a vor yatɨ sɨtə, kat ka angɨn nda nza vor gəta Həmɨnpwa. Sə mgban hina gə ka yatə a sɨsən, kat ka angɨn ka gəta Həmɨnpwa hin ɓa nza ɓwaa kan a ɗa lyentə a wakasəwnə.
5Niyəmdə nəngəwnə pepe, hwuna kana nəngəwnə anda hwun ɓə tɨfe da Həmɨnpwa. Hwunaa leyə atɨ Yesu Ma Həmɨnpwa a Yaɓwarən sɨne ɓwaa kəwnə anda hwunaa fukə vor kanahangɨn? 6Hɨn mwaka sate atɨ hwun ɓa sɨ leyə atɨ hin minə dɨ boyownə le da Həmɨnpwa, hin ka nənəngenə hinaa fukə vor kanahangɨn. 7Hiwtɨ denə nə atɨ ɓe hwunaa ɗa sa aa kang tɨfe. Gə ɓe ɓwaare aa niyə atɨ hin nggɨrgə kanaha, shezə gələ hwuna kangə a ɗa sa pepe nagi nda mya niyə ɓətɨ hin fukə kanaha. 8Gə hin tam ka mbarəte ɓa kwo diyale, shezə diyale nə ɓəmbə hina kanggən. 9Hinə ka hanɨngtə nagi ite atɨ hinə a vor yatə, shezə hwun hwunə kanyi dwat. Hiwtɨ denə nə atɨ hwuna mɨna a kangə daatɨfe da Həmɨnpwa kpəkəkə. 10Gə ləngɨn na dorownə shinə ite hɨn tam a hakəwnə, gə hɨn kana zə hakəwnə ɓe naa ɗəwnə sɨmwarashe ka wule humwate Həmɨmiye a vi. A wule humwate nda vi gə na gwadə mwadiyale dəwnə nda kangə dwat aa gəkɨlə na kɨɗan.
Wunakaha kpawtə
11A kpawtə kat, ji-nuwo, ɗamdə kangsəwnə, kɨləm nyittɨ de, peyəmdə nəngəwnə hwuna gə hiɗə, nzam ka ɗoltə. Həmɨnpwa ndi ma ka mwoha kan kat ka ɗoltə ɓa nza ɓwaa kəwnə.
12Wunamkasə ka kpɨripsətɨ mwoha ɗəmɗəme. 13Mbiɗitɨ myee Həmɨnpwa a vomiyərən kat nee dɨ wunakəwnə.
14Maa wuladəha da Həmɨmiye Yesu Ma Həmɨnpwa a Yaɓwarən ka mwoha da Həmɨnpwa ka nzaa ɓwaa-ɓwaatə ka sə tee a vor Pitɨ Ɗəmɗəmtə a nza ɓwaa kəwnə kat. Hwuna kwasa.
Currently Selected:
2 Korintiye 13: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
