Penameyaya ei 4
4
Gode nipuna seana pia ei andea ei
1Go ei pereyaomare neme upaame wala so epeni anda pora wi ei andawa. Gupuma bu kenange rapu ara lee nono pi rupa ambalande pangawande alimi gupa la. Nee go alena ipuma neme nee para werepe pula pea aunu walano ipu la. 2Go aleme gole Godena Sipiridimi ni mea. Gupuma so Epeni nane andaa alinu piruaeme seana Gode pira ei andawa. 3Mo seana piraya Godena lee angaare ora ro rubaya pange lee yaru yaru paya. Gupuma mo sea ma-kopoliaore aisapakumi ma-koyaripaya. 4Ande sea ma-kopoliaomare sea mendapare ali ria komea pereyaomare malapu seanu kopoliaisaya alena alinu rupara seana pirisimiya. Go alinumiri kini alinumi marao-aeme kalu akanu marao pirisimiya. Nimuri yaakopi akanu marao pirisimiya. Go alinuri ora anda rili alinu pirisimiya. 5Monde runa sia seanare repana rekele puma rurupi lia ei pangawa. Monde seana lee ronare olopake raloaya einu raa ei mendane ki pereya laapo andawa. Go eiri gore ande Godena mendane ki pereyoma laapo Remonu. 6Gupuma monde seana lee rona pange galasi yamo rumbaya eimiri ipa lena ande nono paya.
Monde sea ma-kopoliao pange mendane kunina pa piri alenu malapu andawa. Mo alenuna do raayonare leenu opaya. 7Ririna eina lee angaare laioni yaname andaya. Gupuma laapopa einare gawa ali menapeme andaya. Gupuma repopa einare alina lee angaa manda andaya. Gupuma monde pereyado einare yaa ida yama ria pupulu aya eimi andaya. 8Go alenu raayonare popa mendane ki pereya mendana komea komea ama ama pisaya. Gupuma nimuna popana pange do raayona lee ao-kopoliao paya. Rimba pange pana pange yaisa pa lolombai pao-aisimiya. Go yaisa lialo arare gupi loaisimiya.
Godere ora yaakopea, yaakopea, yaakopea.
Realiri puri palea.
Nipuri ambaisena pange ari ambia pange aya.
Werepe pange ora pa-ao ali loaisimiya.
9-10Monde pa piri alenumi monde sea mandaa pia Godena bi minyasiado ara yaisa luaeme dinare monde seana pirame ali ria komea pereyoma malapu kalu alinumi rumu yaruaoma panda puma yainya pilimi. Go seana pia Gode nipuri na-kome pa-ao alia. Nipumi nimuna yameme kalu rangunanu monde Gode pia seana lee wilina pua sialo arare go yaisanu deme.
11Neere naana Reali pange naana Gode.
Go suna aya alenu raayo neme wapele.
Nena ranana gole ambia go aema rupa amono lele.
Go einare naame nee repara liadema yaisanu
nee repara ladema eiri ora ri pea.
Go dama yaisanuri nena puri pade einu pange
nena paa pi einu rapesiado ara dama.
Currently Selected:
Penameyaya ei 4: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
