Penameyaya ei 3
3
Sadisi aeme Keriso wenaali para rapae angele
1Mo Sadisi aeme Keriso wenaalinuna eindiolo ali para go angele wape pape.
Go angelere ande Godena Yaakopi Remo mendane ki pereya mendana laapo andere pia Ali pange kumba danga mendane ki pereyoma mendana laapo siambae Alimi wape pi. Nimimi pimi auri ni kone wi. Nimina remonuri na-kome wenaali leale aemepare nimina remonuri ambala kome wenaali aeme. 2Neme andalopare nimina Keriso aunuri Godeme ao-paidaminya kone wia rupa na-ao-paleme. Go einare nimina remonu u rekena lomare nimina runane pia Keriso aunu alu papana wala ma-rendepoyalepape. Go aunu na-pilimindare gore nimina Keriso aunu ora alu pilia. 3Go einare nimi repara walamende angelenu kone sumare nimina pu rombanu lekedapape. U na-reke pa padimindare gore niri pake nala ali manda epola. Ni epolape di nimi kone na-wi aliminya epola. Gupuma nimi rendaa epa gula. 4Go peapare Sadisi wenaali nimiri reponda komea na-lope pa apo aemenda. Nimiri kaakepi akanu yamoma ni rapu alimi. Akepeare nimimi go au puluri ri peanda lalo.
5Go yanda lu pereyalimi repaamere go kaakepi aka yameleme. Gupuma ande endoaya bukana nimuna bi wia ei neme na-yokola. Nina Apana lee rona pange nipuna eindiolonuna lee rona pangere nimuri nina wenaali doa.
6Kale aya ali deandere gore ande Epe Yaakopi Sipiridimi mo Keriso wenaali para da angele pangalepape.
Piladelapia Keriso wenaali para rapae angele
7Monde Piladelapia aeme Keriso wenaalinuna eindiolo ali parare go angele wape pa.
Go angelere ande yaakopi Ali ande ora angelenu komea loae Alimi wape pi.
Deipidina kiri ande Alimi siambaya.
Nipumi pora lombeleandare mendame na-polea
pange nipumi pora poleandare
mendame na-lombelea.
8Nimimi peme aunuri kone wi. Nimi puri andapu na-wimipare neme walawa angelenu nimimi waru raluaeme pange neme le angelenu waru pangeme. Nimina lee rona neme lomboma wi pora gape mendame na-polea. 9Pangalepa. Mongonde Sadanina repaa apo ao-pemenda. Nimuri Isaraelimi mandu rangala pae repaa loaemepare yayapi loaeme. Neme nimu nimina rolo para ma-piralua. Go ei andalo arare neme nimi raname kome ei kone wilimi. 10Go suna kendapenu waru epelea. Go peapare nimiri mendame na-warainya doa. Akepeare nimimi neme lawa angelenu waru pango-arimi eina. 11Ni repara epola. Go einare nimina sialimi alenu waru sialepape. Go yandanu raayo lu pereyaoma mula pele yangi mendame pake milia yanda lalo. 12Go yanda lu pereyalia ali nipuri nina Godena alinau puaeme anda para pingi ma-alua. Go au pulua ei nipumi na-minyapalalia. Neme nipu manda nina Godena bi pange nina Godena andaa andana bi pena Diurusaleme wape pulua. Go andare epeni nane Gode repara epelea. Nipu mandaa nina pena bi wape pulua.
13Kale aya ali deandare gore ande Epe Yaakopi Sipiridimi mo Keriso wenaali repara da angele pangalepape.
Laodisia Keriso wenaali para rapae angele
14Laodisia anda para aeme Keriso wenaalina eindiolo ali para go angele wape pa.
Niri ora angelena ree. Gupuma nemere ora Godena angele lao-ayo. Neme angele wadoandare ora ree angelenu komea waloayo. Godeme wape alenu raayona reere ni ayo. Go angelere neme nimi para wape pi.
15Nimimi peme aunu ni kone wi. Nimina Keriso aunuri ora riripu na-pea pange ora kongo na-rea. Nina ranare nimina Keriso aunu kongo releandare gore ora kongo reena kone sialo. Riripu piliandare gore ora riripu pinya kone sialo. 16Go peapare nimina Keriso au ora na-kongo rea pange ora na-riripu pea. Go einare neme nimi pane yoko rumbulua. 17Nimimiri gupi leme. Niri muni andapu wi leme. Gupuma ni olemole ora andapu wi leme. Go peapare nimiri ora koae rupa ao-paleme. Nimiri wenaalimi yarame komape rupa aeme. Gupuma nimiri narali wenaali aeme pange nimiri konapunu pange na-yameme pange nimina leenuri rumbu pi wenaali aeme. 18Go peapare nemere gupi lalo. Neme siamba-ayo golo muniri ora golo komeyale go golo ro pipape. Go aunda pilimindare gore manda ora amo alimi. Go einare nimimi kaake pu rumbe akanu kambo yamelemendare gore nimi yalame na-komeleme. Nimina leenu rambuliale lee mula mulanu kamboma lee para lialepape. Go au pilimindare gore olemole andeleme. 19Neme ali menda nipu raname komalo arare nipumi koae aunu pilia dinare ma-rendepoyalua. Go einare nimina aunu kone sialo arare nimina pu konenu lekedapape. 20Pangalepa. Niri pora gape para ara pora luayo. Menda apimi nina angele pangoma pora lombeleandare gore ni nipuna anda para pola. Gupuma ni nipu rapu enda nola pange nipumi ni rapu enda nelea. 21Go yanda lu ma-wandualia alimiri nina piruayo seana ni rapu pidi pa. Neme yanda lu ma-wanduaoma ambia nina Apa rapu pi rupa manda.
22Kale aya ale deandare gore ande Yaakopi Sipiridimi mo Keriso wenaali para da angele pangelepape.
Currently Selected:
Penameyaya ei 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
