Penameyaya ei 5
5
Sipisipi menasimi ande okapuma wi pepa para Gode para mea ei
1Neme ande seana piri Godeme pepa parape okopuma popeke ki nane siamba pira ei andawa. Go pepa paranare mendane mendane wape pi eiyaya. Go pepa rongo mandaare mendame lombanayanda rudule wi ei wisimiya. Go rudule wi ei wape pisimiya eiri monde pepa mandaa mendane ki pereya mendane kina laapo wape pisimiya. 2Go ei andoma piranore puri waru pale eindiolo mendame ora andapu gupi la. Go rudule wia ei rungulumare no rupara wape pea eiri ali apimi manda lombeleayapae, la. 3Go lapare go ramayo wako pape ali o yarepeape ali mendanda go suna pange go su runane pange so yaa nane menda ora na-aripa.
4Ni go ei kone suma ree waru lawa. Akepeare go ramayo lombape pange yarepeape ali mendanda ora diayaya.
5Go ree lalo pirano ande mo alena pirameya kalu ali mendame lalore, Ree na-lo piri anda la. Ande Kini Deipidimi mandu rangala paya Ali menda nipuna bi Laioni nipuna rururi Diudana ruru Ali ora Kalu Ali piri Alimi yanda ambala lu ma-wanduaya. Ande Aliri nipuna bi menda ora Deipidina Pida lo aya. Go eimiri go rudule wi ei wia ramayo para manda lomboma yarepedea la ei neme pangawa.
6Gupuma ande Sipisipi menasi monde seana ranamena ainya andawa. Monde kalu alinumi pange ande pa piri alenumi ma-kopoliaoma runa aripa ei andawa. Mo Sipisipi menasiri lu ma-komaeme alena rai wape paya ei andawa. Nipuna kapore mendane ki pereyoma laapo aisaya pange nipuna leenu pange mendaa rupa aisaya. Go leenuri ande Godena mendane ki pereyoma laapopa Remonu. Go Remonuri go su yaa rupara pamuaeme einu. 7Ande Sipisipi menasimiri ande seana piraya Godena popeke ki para sia piraya pepa para pua mea. 8Ande Sipisipi mename ande ramayo muma ainyare ande pa piri alenu malapu pange ande ali ria komea pereyoma malapu kalu alinumi mo Sipisipi mena repara rumu yaruaoma yainya pisimi. Mo kalu ali raayomere gidame ande ale siamba aisimiya pange galupi kaposinu golome wari ei siamba aisimiya. Mo kaponuna ruparare kidiminda roropo lombape alenu pirisaya. Go roropo lombala alere ande Godena wenaalimi yainya pimi ei. 9Nimumi pena yaisa menda lame. Go yaisare go ei.
Neere go pepa mealo pange ande rudule wi ei
ambu wi ei neme lombalore ri pea.
Akepeare neere liiame.
Go eimiri wenaali ruru raayo pange andayaya raayo
Godena ei neeme kambaripi.
10Gupuma neeme go wenaalinu raayosi Godena au
painyaya Gode repara alinau puaeme alinu
ma-aulale.
Gupuma nimumi go suna andere pidimi.
11Gupuma neme wala andawa pange pangawa dinare eindiolo alinu ora yarepeape dia rupa. Go rupamere ande kalu alinu pirisimi ei pange ande pa piri alenu pirisimi ei pange ande sea ma-kopoliaoma ora andapupe epa aisimi. 12Gupuma ande eindiolo alinu pange ande kalu alinumi go yaisa ora andapu wi lisimi.
Ande lisimiyande Sipisipi mena nipuna bi
minyasiadema eiri ora pima.
Akepeare puri pange paa pi ei pange amo alenu raayosi pange kone waru su rangala paya ei pange nee repara wia.
Go eina nena bi minyasiadema.
13Gupuma so yaa nane pange suna pange su runane pa piri alenu pange ipa runane piri alenu pange go su yaa laapo runane piri alenu raayosimi go yaisa liame.
Mo sea mandaa pia Gode pange mo Sipisipi mena
niipi repara naame niipina puri kone suma pange
niipina rolo para naa pima eina niipina biri
naame minyasiari pelema.
14Go ei pangoma ande pa piri malapu alenumi lalore ora ae lame. Go lame dinare ande kalu alinu raayo suna lopoma Gode repara yainya pame.
Currently Selected:
Penameyaya ei 5: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
