Penameyaya ei 21
21
Pena epeni pange pena su laapo
1Gupuma pena epeni pange pena su andawa. Ande ambalana epeni pange su yaa laapo alu paripa. Gupuma ande andaa ipanu pange alu pula pua. 2Gupuma ande Godena Yaakopi andaa anda andawa. Go andare ande pena Diurusaleme anda epeni nane aoma epa. Go andare ande pena nongome alina anda polameya lele pa ao-aya rupa lele puma aripa.
3Go ei andoma pirano lama monde Godena sea sia naneyame angele la ei pangawa. Go angele lalore gupi la. Ambia kini pumare Godena ria anda wenaalinu rapu aya. Godere wenaali rapu ao-padia la. Gupuma wenaali raayo nipuna angele pangoma ao-alimi. Gode nipu gole go wenaali rapu ao-padia. Gupuma Gode nipuri go wenaalina Gode ao-alia.
4Nipuna wenaalina reenu pange nipuna kunalia. Wenaali menda na-komeleme pange menda ali pu koya andiao na-pamilimi pange menda ali rendaa na-milia. Akepeare ambalana su yaa para sia rendaa rendaanuri gonde su yaa pereyalo ara pereya.
5Gupuma monde kini alina seana pira Alimiri gupi la. Ambiare olemole raayo pena ei wapualo la. Go ei lama gupi la. Go angelenuri ora ree angelenu pange wenaalimi kone rulale peme eiyale wape pa la.
6Gupuma lalore olemole raayo anana go peredanda la. Niri Alepa pange Omega ao-ayo la. Ririnare Ni Ayo pange werepe nanere Ni Ao pe la. Menda apimi ipa nalame komeleandare gore ale mendame pange na-kambe pa nena doa. Go nena dape ipare ande endoaya ipa pa ipulu piri ei. 7Yandanu raayo ambala andoma alia alimiri go einu ni repara milia. Niri nipuna Gode alua pange go aliri nina naki alia. 8Salopa lee danga pange repana ralo ae parare go wenaali pua releme. Paala paalame komeme repaa pange ni repara kone na-rulaeme repaa pange yayapi alenu para yainya puaeme repaa pange ali lu ma-komaoma aeme repaa pange wena pake o ali pake noae repaa pange kawa ei basu piale neambu repara kone rulao-ae repaa pange repana kana para yainya pia repaa pange yayapi angele loaeme repaa pange go salopa danga rapu roma leke leke yoalimi. Go ro leke leke yoaeme eiri ande laapopa komala ei.
Pena Diurusaleme
9Ande mendane ki pereya mendana laapo eindiolo ali menda ni repara epa. Nipuri ande mendane ki pereya mendana laapo koae yandanu ma-andawa ei mendane ki pereya mendana laapo koponu rupara siae ali. Go eiri Godena werepena koae yanda ma-andawa ei. Ande eindiolo alimi ni para go la. Ande Sipisipi menasi nipumi mula pea wena andainya ipu la. 10-11Go ei loma pereyaripa dinare Yaakopi Sipiridimi ni epa rumbia. Ande eindiolome ni kana rumu menda ora andaaina karu pua. Gupuma ni Diurusaleme ande Godena Yaakopi Andaa Anda epeni aoma epa ei wala. Mo anda andawapare Godena paa pi ei andawa. Gupuma ora yaakopupa puma anda ora yole andawa. 12Mo andare puri pale pape ora andalu eimi pape pisimiya. Pora gapere ki laapo pereya angena laapo lombameya. Monde para gapere eindiolo ali komea komea lome surumbameya. Gupuma mo para komea komeanare ande ki laapo pereya angena laapo ruruna bi komea komealo wape paya. Go wenaaliri Isaraeli wenaali. 13Monde pora gapenuri repo naare pambala nane lombameya. Repore naare ipula nane lombameya. Repo mendare perali mendane lombameya. Gupuma wala repore perali mendane lombameya. 14Go andana papenuri kana ora andaai mandaa elala pameya. Go kana mandaare ande Sipisipi menasina mendane ki laapo pereya mendana ki laapopu aposolonuna binu wape paya. 15Golome wapi rodo menda ni para angele lande eindiolome siamba aripa. Go rodore monde andana ree lapo pange pora gapenu pange anda kopaliao pape pange manda mealuame paya. 16Monde anda andalu paya rupa mandare polo pange maluale laapona pange mendaa paya. Monde eindiolome so andaa anda manda mearipa. Mo andare ora anda andalu pe, 2,200 kilomida. Mo anda andalu pulu pange peyalore mendaa paya. 17Monde pape reenu 144 mida manda mearipayapare ora so yaa para puaya. Ande midare alina mida pange eindiolona mida mandana. 18Mo papere muni yangi andaaipe kana menda diasipa le kaname wapuaya. Gupuma mo andasunuri golo galasimi ande eimi wapuaya. 19-20Monde pape pulameya oro para rambolisaya kananuri go einu. Diasipa le kana pange sapia pange agede pange emerali pange onikisi pange kaniliani pange kirisoli pange berili pange dopasi pange kalesodi pange dasindia pange amedisi le kananumi warisimiya. Go kananuri muni ora andaai pe kananu. 21Monde mendane ki laapo pereya mendana ki laapopu pora gapenuri sekereme ande alenu ora roma rumbi alenumi waruameya. Monde anda rupara siaya poranuri golome wapuaya. Gupuma galasi leale mendane mendane pa andapeyaya.
22Gode repara alinau puae anda menda na-andawa. Akepeare ande Reali Gode puri waru pale Gode pange ande Sipisipi laapo niipuna golere alinau puae andayandare. Go anda para naare raayo ao-aepe. 23Monde anda parare naare pange sumba laapo na-relea. Akepeare Godena paa pi eimi mo anda paa adea pange ande Sipisipi menasimi lamepa leale paa adea. 24Go suna raayo wenaali go anda para pilia paana ao-paidimi. Gupuma go suna kini alinu raayome nimuna amo alenu ma-epeleme. 25Go anda kuda peme pora gapenuri naare raayo pa lombopa sualia. Go pora gapenu na-poleme. Akepeare go para rimba na-dea. 26Anda raayosina amo alenu raayo go anda para ma-epeleme. 27Go peapare koae kodo pi alenuri go anda para na-kondo pambeleme. Yalapi aunu puaeme repaa pange yayapi aunu loaeme repaa pange na-kondo pambeleme. Monde Sipisipi menana Endoma Aya Bukana bi wilia repaa komea kondo pambeleme.
Currently Selected:
Penameyaya ei 21: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
