Penameyaya ei 22
22
1Ande eindiolome ande ipulu piri ipa ande endoaya ei midame ipa wala. Go ipare ale mendasinu pange ora na-ralea. Go ipare monde Gode piraya seana pange ande Sipisipi menasi piraya seana ope ipa. 2Go ipare monde andana pora naini ra puaya. Go ipana ree laaponare ande endoaya ei alo aya repana aripa. Go repanare sumba mendane ki laapo pereya mendana ki laapopu kili elala paya. Ande repanare sumba komeana rana komea kili elala paya. Nipuna keranumiri wenaali raayona rerenu ma-kapuyao-aya. 3Go andana rupara Godena lee rona kandi na-pilimi wenaali go para na-alimi. Ande Godena pange nipuna Sipisipi menasi laapona seare go anda para wia. Go para alimi repaame Gode repara panda punyaoma yainya pilimi. 4Nimumi Godena lee para andeleme. Go wenaalina wenona Godena bi wape pilia. 5Go anda para rimba na-loalia. Naare ra pe ei o lamepana paa pape ei na-waidimi. Akepeare Reali Godeme nimu paa adea. Gupuma go wenaali kini leale ao-pali eiri pualimi.
Yesu repara epola lea ei
6Gupuma ande eindiolome ni para gupi la. Go angelenuri ora angelenu lalo la. Gupuma ora manda kone rulalimi. Reali Godeme nipuna Yaakopi Sipiridimiri poropedinu para aloaya. Nipuna angele pangoma puaeme repaa repara epola pea aunu walena nipuna eindiolo ali raparipa.
7Yesumiri gupi lea. Pangalepa. Niri repara ipulu. Go einare go bukana lea angelenu pangoalimi repaa parare gupi lalo. Raname waru komaleme lea.
8Ni Dionimi go aunu andawa pange angelenu pangawa einu pereyaomare monde aunu ni para walande eindiolo alina rolo para panda puma yainya pulameyanda pala pirano gupi la. 9Go au na-pape la. Niri nee rapu pange nena amenu ande poropedi alinu pange go bukame lea au puaeme repaa nimi peme rupa mendaa pupudengi noayo aliyanda lalo la. Gode para panda punyaoma yainya pape la. 10Gupuma ni para gupi la. Werepe pula pea aunu go bukame wada aunu na-kundiri pape. Akepeare go aunu pula pea naare repara ipulanda lalo la. 11Go einare koae aunu pia alimiri koae aunu pa pairi pope. Gupuma kodo pi aunu pi alimi go aunu pa pairi pena. Epepe aunu pia alimiri epe aunu pa pairi pena. Godena aunu palia alimiri go au pa pairi pena.
12Yesumi lalore Pangalepa lea. Ni repara ipulu lea. Ni ipulu ara nimina peme einuna yangi komea komealo epa giala pulua. 13Yesumi lalore Niri Alepa pange Omega ao-ayo la. Niri Ririna pange Aripu. Werepe nane pange Alua. Niri olemole kini pulu ara pange asua. Peredea dina pange alua.
14Menda apimi nimuna mandaa aka yameme ei randepele ei yamelemendare raname komeleme. Nimumi mongonde endoaya ei aloaya repanana kili manda neleme. Gupuma monde andana pora gape para manda kondo pambeleme. 15Go peapare go anda para na-kondo pambe kamare go repaa alimi. Romo neambu puaeme alinu pange kodopi aunu puaeme alinu pange wena o ali pake noaeme repaa pange ali lu komao-aeme repaa pange repana kana para yainya puaeme repaa pange yayapi angelenu loaeme repaa raayosi kama nane alimi.
16Ni Yesumi nimi Keriso wenaali repara go angele epa la ginyayanda nina eindiolo ali apo raparipu. Niri Deipidina repana Pida pange nipuna repaa alimi lalo. Niri ande Paa andaai yapi leena aya Kumba Dangame lalo.
17Godena Sipiridimi pange ande ali pope pena nongo laapomere Yesu para Ipu dape. Go angele pangaleme wenaalimi pange Yesu nee ipu dame. Ipa nala pilia repaa ni para ipuma ande endoaya ei gida ipa pakama epa nalepa. Rana pilia wenaalinu go au pipa.
Pereyado angele lea ei
18Ni Dionimi go werepe pula pea ei pangaleme wenaali para gupi lalo. Go angelenu mandaa mendame ale menda na-ralainya. Menda ralano kone wilia ali nipu parare Godeme go bukana lea rendaanu nipu para ralalia.
19Gurupa mandare menda apimi go angele menda para rungulu rumbano kone wilia repaame ande endoaya ei aloaya repana kili na-neleme. Gupuma ande Godena andaa anda para na-ao-paidia.
20Go angele da Alimiri gupi da. Ni repara ipulu da. Go ei ora pinya. Reali Yesu Keriso nee ipu. 21Reali Yesu Kerisona pakama yarame komala au wenaali raayo repara winya.
Currently Selected:
Penameyaya ei 22: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
