Penameyaya ei 14
14
Ande Sipisipi menasi pange nipuna wenaali
1Go au pumare neme andawapare ande Sipisipi mena mo Saioni kana rumuna aripa. Nipu rapuri 144 daosani wenaali raayo arimi. Go wenaalina wenonare monde Sipisipi mena pange Ara nipuna bi wape pi wenaali. 2Go au pumare mendame epeni naneyame aoma angele la ei pangawa. Go angele lame rupare ipa daau andaai pange rurupi lialo ara lenono pa. Gupuma yaisa ipu aripapare gidanumi loae nono pa. 3Gupuma nimumi pena yaisa menda liame. Go au pi auri ande Godena seana pange pa piri malapu alenuna pange ande kalu alinuna lee rona ara lame. Go yaisare nimumi komea lape yaisa. Wenaali raayona angalapu para nimu komea Godeme rambamea. 4Go alinuri wenanu rapu pange na-pali alinu. Monde Sipisipi mena pea para raluma puaeme. Ali raayona rupara nimu ambala Godeme mea. Nimuri Gode pange ande Sipisipi laapo repara ririna alamone leme repaa. 5Nimu yayapi angelenu pange ora na-leme. Gupuma ora rendepona aeme repaa.
Eindiolo repona angele lea ei
6Gupuma eindiolo menda so yaa manda ria pupulu-ainyaloma andawa. Go eindiolo nipumiri pa suala pea Epe Angele ma-pupula. Go eindiolome go angele wenaali raayo para pange anda angele rando le repaa para pange ruru rando randopi wenaali para la adea.
7Nipumi andapu gupi la ei pangawa. Gode andasiao andoma nipu ora minyasialepape. Akepeare ande wenaali rali pula pea di epande. Nipumi epeni pange su pange ipa pange ipulu piri ipa raayo wapea. Go einare nipu repara paalame komala ara panda punyaoma yainya pipape.
8Werepe nane eindiolo menda ririna eimi pande rupa ipuma gupi la. Ande Babiloni andaa anda ma-koyaripa la. Go anda ora do danga wia la. Babiloni nipuna naa pakenumi go suna aya andasu raayo ma-koyaripa la. Go au pi eiri ande puri pale waini ipa nipumi adanda noma keyadame rupa manda.
9-10Werepe eindiolo menda ririna ei laapo epape rupa ipulu ara gupi la. Ande rarane ale para yainya pilia wenaali pange ande rarane aleme manda meaoma repana kaname wari ale repara yainya pilia wenaali pange go ale nipuna pare au wenona o kina lu ralalia wenaali para go au pilia. Nimumi Godena rono pangala ei manda meaya waini ipa neleme. Go waini ipare ora puri pale ei. Godeme nipuna rono pangala ei piri kopo para koyo pambea ei. Go repaare ande salopa lee danga roae para yaako pi eindiolonu pange ande Sipisipi menasina lee rona ro leke leke yo alimi. 11Nimu rola peme repanare ora pa roalia. Rimba pange paana pange go rarane ale manda meaoma wari ale repara yainya puaeme repaa ora pa rapualimi. Nipuna pare au meme repaa para pange mendaa au pilia.
12Go eiri monde Godena repaare pa puri paloma ape eina da. Godena angelenu pangoma pimi repaa pange Yesu repara ora kone rulae repaare go au pilimi.
13Go einu andoma pirano epeni naneyame angele menda ni para gupa epa. Go ei wape pa la. Godena aunu pado ainyaloma komala alimi ora epe aunu andelea. Godena Sipiridimi lalore gupi la. E ora da la. Nimumi muariminde rendaanare si para pidimi. Akepeare nimuna puariminde eimiri nimuna pora pialia.
Su yaa rali pula pea ei andea ei
14Gupuma andawapare kaakepi koaa andawa. Go koaa mandaare alimi go Alina Si Naki mandana ande ale pira. Nipumi neaoma saripimi ande rai koipi ei siamba pira. Gupuma golome wari kininuna kalu aka yamoma pira. 15Eindiolo ali menda mo alinau puae anda para piruma ipulu ara mo koaa mandaa pira ali para gupi la. Nena raimi ambe enda mainda la. Akepeare ande wai alenu raayo go suna nape leanda mainda di apo epande. 16Monde koaa mandaa pirande alimi go angele pangoma ande raimi piri wange aoma suna ae endanu raayo mandu mealome ralaripa.
17Go ei andoma pirano loma eindiolo menda monde alinau puaeme anda para aoma mendapi rai ma-epa ei andawa.
18Gupuma eindiolo menda monde alinau pulame pereaya lena para repana andere-ae ali ipuma monde rai siae ali para gupi la. Nena rai muma no suna aya waini ena waini kilinu na-pelea ei raimi po mealo rala la. 19Ande eindiolome go angele pango mealo nipuna rai no suna wange aoma ande waini porenu pomealo ralaripa. Gupuma mo waini ipa waruaeme ale para mu loparipa. Go alere ande Godena rono pangala ei manda meaya ei. 20Ande waini porenuri monde andaa anda pape reena ara rakupi rambuarimi. Go parare wee ora andapupe nonde waini waru aya ale parayame epa. Go epa weere 300 kilomida rupara pua piru rungulala pea rupa piru rungularipa. Go ipa nipuna kendo sialore ora andalu alinunare mapu para milia. Go peapare peao alinunare kalu pange munyalia.
Currently Selected:
Penameyaya ei 14: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
