Penameyaya ei 13
13
Rarane ale laapona angele wia ei
1Gupuma ipa parayame piruma rarane ale menda epa ei andawa. Nipuna kaluri mendane ki pereyoma mendane kina laapo pange nipuna kapore ki lapo ora aripaya. Mo nipuna kapo raayonare ande kini alinuna ranguna yamaya. Gupuma nipuna kapo raayonare Gode ewaisa pape binu siaya. 2Go rarane alere daiga yaname andaya. Nipuna angere yapa paisalona ange pake meaya. Gupuma nipuna angaa kambuluri laioni menana ei aripaya. Monde ualame ande alemere nipuna olemole andere pirape puriri mo rarane aleme pange su pinyaya puri alaya. 3Mo rarane ale nipuna kalu mendanare kondo menda ora andaai siaya. Wenaali raayo monde ale andoma rungula mealo pambalo ara nipu raluma pamuaisimiya. 4Wenaali raayome monde ualame ande ale para yainya pulandi pameya. Akepeare nipumi monde rarane ale repara puri aleanda. Nimumi monde rarane ale para yainya pulu ara gupi lame. Ali mendame go rarane ale rapu yanda manda na-pilia lame. Akepeare nipuna puri wia eiri menda rapu ana na-pea.
5Monde rarane aleme nipuna bi minyasiasia pinyayanda Godeme puri alisaya. Go lisaya angelenuri Gode ewaisa pae angelenu. Sumba ali ria laapo pange ki laapona go angele lena laya. 6Nipumi Gode ero lala pa. Godena bi pange nipuna aya alena pange Epeni nane aeme wenaali raayo ero lala pa. 7Nipumi Godena wenaali raayo yanda pu rambuao pange nipumi wenaali raayo ruru rando rando pange anda angele menda menda le repaa raayo andere pirinaya Godeme puri alisaya. 8Wenaali raayome go ale repara rumu yaruaoma yainya pilimi. Go peapare monde su yaa ambe na-wari-ainyaloma nimuna bi monde Endoaya Bukana bi wia repaa komea go au na-pilia. Go Bukare ande lu komariminde Sipisipi menasina ei.
9Go einare kale ayale deandare pangape. 10Yanda runguli alimi ora dipula minya kone wilimi repaare ora dipula milimi. Raimi liina loma la wia repaare ora raina angaa para peleme. Go eiri Godena wenaali rendaanu epena golere pu kana nongopema pa wanduari pope eina lea.
11Gupuma neme rarane ale menda andawa. Nipuri su para oposiaripa. Nipuna kapore laapo aripa. Go kapore sipisipi menana kapome andea ei. Nipuna angelere ualame lenonona pa. 12Go suna oposiari pande alemere monde ririna ipa para oposiaripande alena puri meaya. Gupuma nipuna lee wilina go werepe nane alemere monde ririna rarane ale repara wenaalimi rumu yaruaoma yainya pulandere pinyayanda rimbuyaripa. Go yainya pame alere liiameyalena ora koae rere kondo piraya. 13Go werepe alemere na-ande aunu pa. Wenaali raayona lee rona go werepe aleme repana raloaya ei epeni naneyame ma-eparipa. 14Godeme ande werepe nane aleme monde ririna alena lee rona na-ande aunu pinya laya. Go paya eimiri monde wenaali raayo nipu ralinaya makiraripa. Repana kaname ande ririna ale waruma winyaya mo wenaali para go au pipa lo ande werepe nane aleme la alaya. Go ririna alere bainasi raimi koae rupa liamepare wala endoma aya. 15Monde werepe nane alemere monde ririna ale manda meaoma repaname waruma wia alenu angaa para pomo ma-pirainyayanda Godeme puri alaya. Go au pi auri monde repaname waruma wia aleme angele loma nipu repara yainya na-pula epala pilimi repaa liinayanda. 16Monde rarane alemere wenaali raayo nimuna wenona o nimuna popeke ki nane mo alena pare au winyayanda pusimi riake paya. Go au pi auri komape endape pange amo ali o narali ali pange pakama pupudengi nada ali o pa aya alinu raayome go au pinyayanda. 17Menda apimi go alina pare au na-wiliandare gore enda kambala para pange makedi para einu pange enda na-kambeleme pange enda olemole na-rapalimi. Go pare auri monde alena bi wape pea ei.
18Go rarane alena pare au la siala peme repaamere gore ora kone waru wilia. Go nambare 666. Go nambare ali menda nipuna bi.
Currently Selected:
Penameyaya ei 13: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
