Pilipai 4
4
Mana angelenu lea ei
1Go einare nina amenuo, nimiri ora nina pumi pange na-kepele repaa. Nisi mendaa para ao-aminya kone suayo. Nimimi ni rana ma-pao-aeme. Go einare wenaali para nimina angele kama lao-ayo. Nina amenuo, nimina ao-paluaeme rupa puri ma-palaoma Realina rupara alepape.
2Go einare Sindiki pange Yuodia niipi go angele pangalepa. Realina rupara niipi menda angelena koma alepape. 3Go eina nina mendaa pupudengi noaepa ali para pange go angele lalo. Neeme go wena laapo rambameape. Nipumi ande Yesuna angele ma-puaripu dinare nipumi ni kama rambameape. Kelemendeme pange naana menda para pupudengi nala pama repaame pange go au pala pame. Go repaana biri ande endoaya bukana bi wape pea.
4Nimi Reali rapu rumaoma ara raname ora waru komalepape. Wala apo lalonda, Raname ora waru komalepape.
5Wenaali ambuname nimiri ora kuma kuma puma aeme repaa andena dapape. Ande Reali repara ipula.
6Ale mendana kone na-sialepape. Nimi dia dealere Gode repara yainya pilimi dina konge dapape. Ranae angelenu lala ara kongeyala pipape. 7Godena kuma pi eiri ora andaaiyalo arare su wenaalimi kone siape-na-aya. Go kuma pi eimiri nimina konenu para pange nimina pu romba paranu raayo waru apo andere-alia. Yesu Kerisona rupara go au pilia.
8Nina amenuo, neme wala apo lalonda. Nimi go aunu ora waru kone sialepape. Go aunuri ora epe bi meape aunu. Go aunuri gonda. Ora rendepona aunu pia ei, wenaali nimi andape raname komape aunu, ora aunu pia aunu, kaakepi aunu, rana pi aunu pia aunu pange wenaalimi nimi andasiaoma andena aunu pualepape. 9Ande neeme pawa aunu pange neme lawa angelenu pange pangamendele go aunu kama pipape. Gode kuma pi ei guaya Gode nimi rapu ainya.
Wenaalimi Polo repara olemole rapaemenda ranae angele lea ei
10Niri Reali rapu runaoma ayo. Go einare ni rana ora waru pia. Akepeare nimimi ni repara kone pa sialo ara ora epe aunu piminda lalo. Nimimi go auri ora ambalande gole pula pamepare go au pape pora menda na-siandare go aunu na-pamende. 11Neme go lalo eiri neme ale menda waisalo ara na-lalo. Akepeare nina siamba ayo alenumi golere ni manda pea kone suayo. 12Ni olemole waru wi ali aluanda pange ni olemole na-wi ali aluanda pange ni ora reame komolanda pange ni ora enda andapu nolanda pangere ora mandana ayo kama doa. Akepeare go einuna reenu raayo ni ambala kone wi. 13Ni repara one mone aunu raayo pari epena pangere ni ora pa puri paloma pola. Akepeare Kerisome gilia purimi neme go au pulua.
14Go peapare nina kendapi einu rambamuma riamende einare ora ranae angele lalo. 15Nimi Pilipai wenaali nimi kone wimi. Ande pena romona kinipu Godena angele laluameyandare Masedonia anda minyapalaripu dinare mendame diayapare nimimi komea ni rambameame. Keriso wenaali mendame go aunu na-pame. 16Ni Desalonaika andasu para aripu dinare ni rana andapupe nimimi ni ale menda dialena gole nimimi ni repara rapala pame. 17Neme nimimi ni olemole komea gialiminya angele na-lalo. Nimina pimi einuna yanginu ora meala pilimi. 18Nimimi raparimiya alenu raayo meawa. Gupuma ora olemole raayo anapea lalo. Epaporadaidasi andalo rapariminde alenu pange meawa. Go alenuri ande epe roropo pi ale ande Gode repara alinau puma adame ale mandana. 19Godere olemole ora andapu wia. Yesu Keriso nipuna rupara nimi dia deale ora mandana gilia. 20Godere naana Gode pange naana Apa nipuna bi paa pi ei pa suari pena.
Pereyado angele
21Kerisona wenaali raayo paidapape angele lalo. Go naana menda para aeme repaame pange paidapape angele lane dame. 22Godena wenaali go para aeme repaame pange dame. Go paidapape angele ora andapupe mo kini ali Sisa nipuna anda para pupudengi nao-aeme alinumi pange nimi para paidapape angele dama.
23Reali Yesu Kerisona pakama yarame komea ei nimi rapu winya.
Currently Selected:
Pilipai 4: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
