Pilipai 3
3
Keriso repara kone rulaya aliri rendepona ali
1Nina amenuo, go angelere go lalo ara pereyado. Nimiri Reali repara ora raname waru komalepape. Ni go angele wala lape eina kendame na-komalo. Go eiri nimi ma-epeape eina lalo. 2Koae aunu pimi repaa waru andere-alepape. Ande yongole rungudaminya loma nimi ma-suriao-aeme yananu para lalo. 3Ora rupa yongole runguli auri naame koma pema. Godena Sipiridi rapuri naame Gode repara yainya puaema pange Godena bi minyasiaoma pange Yesu Keriso rapu arare naame raname komoaema. Mandaa dona pimi aunumi naa rambamida kone na-suaema. 4Dona yongalena pia aunumi naa manda miliandere gore ni go einu raayo ambala pe. Mongo dona pimi aunu pulame raname komoaeme repaa raayo neme lu angulayo. 5Nina dona yongole runguli auri nina amame ni mandu siamba pirina loma pula komea popenaloma rungularimi. Niri Isaraelimi mandu rangala pae ali, pange niri Benisamenena ruru ali pange niri ora Iburu ali. Gupuma niri Parasi ali aripu. Gupuma neme ande Rudule Angele waru raluaripu. 6Neme ora Godena pupudengi nado ara pi kone sumare Godena repaa wenaali para rendaa waru alo-aripu. Mendame ande Rudule Angele raluaeme eina wenaali rali pilimindare go naarenare ni ora rondo menda na-ae ali aripu.
7Go peapare wala neme Yesu Keriso kone sialo eimiri wala go neme ora aunu pao-aya kone sialo einu raayo pa rolo para pupula. 8Go alenu komea diayapare wala nina Reali Yesu Keriso kone sialo eimiri go alenu raayo koae koae alenu. Neme Yesu Keriso rondona olemolenu raayo minyapalaripu. Neme go alenu giae auri neme Yesu Keriso siamba aluameyanda pawa. 9Gupuma nipu rapu runaoma awe kone suayo. Ni rendepona ao-ae ali lea auri ande Rudule Angele radua eimi go au na-palia. Ni ora rendepona ao-ae ali lea auri go au puluanda komea. Ni Keriso repara kone rulalua eimiri ni ora rendepona ayo ali lena. Go eiri Godeme komea guaya. 10Ni ora Keriso kone sualua. Nipu komoma wala rekisaya eimiri nipuna puri go para ande. Go puriri ni ora andawe kone wi. Nipu rendaa nisaya rupa nola kone sialo. Gupuma nipu komaya rupa ni pange menda para komelepa kone sialo. 11Neme go au pumare nina kone rulayo eiri komala ei minyapalaoma endoaya ei mula kone suayo.
Polome rombo wia alena opopaluameyanda alo pula ei
12Niri go einu raayo ora ambala pu pereyayo pi na-lalo. Gupuma ora rendepona pawa pi na-lalo. Niri Yesumi ambala nipuna kambo pereyaya eimi. Neme mo giala yangi mulamere kongapu pa ari puayo.
13Nina amenuo, go yangiri neme ambala me pi na-lalo. Go peapare ale menda komea go rupa. Nina kou nane wia alenu ora minyapalaomare nina lee wilina wia alenu mulameyanda rapo ayo. 14Ni mo rombo wia alena opopaoma yangi mulameyandare puri paloma alo puayo. Go mulape yangiri go ei. Yesu Kerisome pisaya eimi naame so Yaa nane pa ari pope endoaya ei meamonoya Godeme naa wi lea.
15Naana Keriso aunu puri padea repaamere go neme kone sialo aunu kone wilimi. Go peapare nimumi kone menda wilimindare gore Godeme nimina konenu ma-lombalia. 16Go peapare naame siamba-aeme alenu ora pa ripinyaminya.
17Go einare nina amenuo, neme pi aunu raidapape. Gupuma naame pima aunu raidame repaa waru andoma raidapape. 18Neme go lalo angelere ambalande naare raayo loaripu pange ambia pange ree lalo piri wala apo lalonda. Wenaali andapu koae eina rupara aeme wenaalimiri Yesu Kerisona komisaya ekeraisa wape pi repanare nimuna yanda runguli ale ma-aulaeme. 19Nimuri repana ralo-ae para peleme. Nimuna dome raname komea alenuri nimuna gode ma-aulame. Nimu ande yalame komape aunu puma golere wala raname komoaeme. Gupuma nimuri go suna alenu repara kone kama suaeme. 20Go peapare naare naana andare so Yaa nane. Naana Rambami Reali Yesu Keriso sone aoma epenayanda maisambao-aema.
21Naana puri na-palea suna donuri nipumi epa ropo pilia. Nipuna paapu pa pe do leale epama ma-aulalia. Ande nipuna rolo para olemole raayo ma-rambu-aoma andere pida pea purimi go au pilia.
Currently Selected:
Pilipai 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
