Kolosi 1
1
1Go ramayore ni Polo Godena ranana Yesu Kerisona aposolo ali pange naana ame Dimodi saame pipa. 2Go ramayore Godena repaa mo Kolosi anda para aeme repaa repara wape pipa. Amenu nimi no Kolosi anda para aeme repaa: nimiri Yesu Kerisona rupara aeme pange Godena angele ora waru pangoma puaeme. Naana Apa Gode nipuna pakama yarame komala ei pange kuma pi ei nimi rapu winya.
Gode para ranae angele lea ei
3Naame Gode naana Reali Yesu Kerisona Apa para nimi kone siala pula ara Gode para ranae angele loaema. 4Naame Yesu Keriso para nimina kone rulaeme ei pange Godena wenaali para pu aloaeme ei pangoaema. 5Ande Yesuna epe angelere ora angele. Go angele pena ipulu arare nimi mulapame alenu la giande. Niminya mula loma maisambo-aeme eimi yango repara pu ada ei pange Gode repara kone rulaya au ma-epao-aya. Ande Godeme nimi gula loma siaya ale ora milimi kone suma kone rulao-aeme. Go eiri so Epeni anda nane siaya. 6Andayaya raayosi Godena angele ora andayamayama puma ora epepe aunu puaya. Ande nimi pena romona Godena yarame komala ei kone siame dina pisa au papari ipuma ambia pange mendaa au pa pia. 7Epaparasi nipumi go Godena angele nimi para wala. Nipuri Kerisona ora epe rupa pupudengi nao-aya ali. Nipuri naana mendaa para pupudengi noaema ali. Nipumi go au puma saa rambamuaya. 8Ande Epe Yaakopi Sipiridi nimi wenaali pu aleme ei gea ei saa para la gia.
Kolosi repaa Godeme puri ma-palainya
9Go nimi para pande aunu pangomare nimi rambaminyaya yainya pao-aepa. Godeme nimi rambaminya pange nipuna rana pi aunu nimimi kone sialiminya. Go au puma Epe Yaakopi Sipiridimi nimina konenu ma-ririyaoma epe konenu ma-siainya. Go aunu nimina rupara rumbilina. 10Go au pumare Godeme rana komea rupa ao-paluma nipuna aunu pao-alimi. Nimimi nimina ao-padimi eina ruparare epepe aunu waru pilimi. Gupuma nimimi Godena aunu ora waru kone siama siama pilimi. 11-12Godeme nimi puri ma-palainyaya yainya pi. Nipuna paa pi purimi nimina runane puri ma-palainya. Go au pilimindare one mone epelea kendapi einu manda ruma rumbilimi. Nimina pu para raname komalo ara Apa Gode para ranae angele dapape. Godeme nipuna wenaalinuna siaya ale mealore nimiri pea lea. Go ale mi auri nipuna paa pi Ki Rambuao-aya Eina rupara milimi. 13Ande rimbayo pambe eina purina rupara naa koyamapare wala naa rambamuma nipuna Nakina Ki Rambuao-aya Eina rupara epa ma-aya.
14Yesumi naa kepe rapaya. Go eiri naana koae einu repara kone na-wia.
Kerisona aunu pange nipuna pupudengi ne ei
15Godere naame leeme pename na-andapeya. Nipuna Naki Yesuri wenaalimi andisimiya. Go Yesu nipuri ora Gode manda. Nipuri Godena ririna Naki. Gupuma alenda alenda raayo na-wari-ainya nipu ambala aisaya. Yesu nipuri Godeme wape alenu raayosina kalu ali. 16Godeme nipuna Nakina rupara so yaa nane pange go suna aya alenu raayo wapea. Yaa nane andere pimi remonu raayo nipumi wapea. Naame leeme andalema alenu pange na-andalema alenu raayo Yesu nipumi wapea. Nipumi olemole raayo wapea. Gupuma olemole raayo nipuna ei. 17Keriso ambala ririna aisaya. Gupuma olemole raayo nipuna purina aya. 18Nipuri Keriso wenaalinuna kalu. Gupuma Keriso wenaalinuri nipuna do pange nipuna punu aya. Nipuri Godena ririna Naki dapa para dapa pi Naki ma-rekaisaya. Go einare olemole raayosina kalu ali nipuna komea pidia. 19Yesuna rupara ora Godena aunu raayo rumbilina kone wia auri Gode nipuna pinya kone wisaya ei. 20Nipuna Nakina ruparare Godeme suna alenu pange yaa nane alenu raayo nipuna rolo para wala epa pirina kone wisaya. Nipuna Naki ekeraisa wape pi repanana komisaya eimiri yanda ma-paliaoma yaa nane aya alenu pange su nane aya alenu raayo nipuna rolo para wala karu epea.
21Ambala nimi Gode repara na-ae papare arimi. Nimina pame aunu pange siame konenu raayome Gode repara yanda runguli ali arimi. 22Go peapare ambiare Yesuna komea eimiri nimi ora yaako puma ale menda na-rale repaa pange rondo menda na-ae repaa nipu repara peme. 23Go peapare nimi kone rulada au ora puri paloma pipape. Ale mendame nimina ange yolo milianda gonde ambala pangamende Godena angele gialimiya lalo. Ni Polore go Godena angele laluame pupudengi noae ali ayo. Go angelere naame go suna aeme wenaali raayo repara walarima.
Polome Kolosi repaa rambamea ei
24Ambalandere Keriso nipuna wenaali rondona nipumi rendaa waru nisaya. Ambia pange Kerisona wenaali rondona neme rendaa pa go no ayonda.
25Godeme ni nipuna Keriso repaa rambameanoya ma-aya. Go einare ni Godena ora angele lape eina pupudengi napeya. 26Ambalande go angelenuri wenaalimi kone siapa-na-ya kundiri pisa. Go peapare ambiare Godena wenaalina lee rona penameyao wia.
27Gode nipuna pulua kone wia eiri nipuna kundiri au nipuna wenaali repara penameyalua kone wia. Go ora epe kundiri angelere wenaali raayosina ei. Go kundiri angelere gonda: Yesu Keriso niminya rupara pia. Go lea eiri Godena paa pi ei pange nimimi milimi loa lea.
28Naare Yesuna epe angele lao-aema. Naame nimu kingi puaema pange nimu ora epepe kone su rekele puma waloaema. Go au pema eiri go wenaali nimuna Keriso aunu ora puri paloma Gode repara Yesu Kerisona rupara karu polameya pema. 29Go einare nina puri raayomere ora pupudengi waru noayo. Go puriri Yesu nipuna gole guaya.
Currently Selected:
Kolosi 1: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
