Iburu 9
9
Epeni nane pange suna Gode para yainya pia ei
1Ande ririna angele lo koro wi eimiri Gode repara yainya pape rupanu angelenu pange loma wisimiya. Go au pumare Gode repara yainya pape andanu pange wenaalimi pisimiya. 2Ria anda menda elisimiya. Go eiri kama nane ei. Go kama nane anda pandare ora yaakopi anda panda lisimiya. Go anda panda parare ande lamepa andiao ae ale pange andiarimiya. Gupuma ande Gode repara ale beredi wi deipolo pange supea. 3Monde ririna anda panda minyapalaoma no kedeni aka runguli laapo pa sula puaya anda pandare ora yaakopu rumbi anda panda. Go ora yaakopuma rumbe andare Godena ei.
4Go anda panda paranuri go alenu siaya. Ande mandaa golo ralae alinau pulame pereaya lena monde roropo roropo pi repana kera kirape ei siaya. Gupuma ande angele lama Kora Wi Bokosiri mandaa golo ralae eina ruparare ande golome wari kenange supaya. Go kenange ruparare ande mana lee enda supaya. Eronina rimapu ande repana keranu opisaya ei pange kaname wari ale Godena mana angele wape pisaya ei pange pirisaya. 5Gupuma mo bokosi mandaare popa aya alenu nimuna biri Serabimi lealenu ao-pameya. Go popa aya alenuri Gode pame ale paranu ambuluma pamuaeme alenu. Go alenuna popamere monde koae aunu randepelenaya wee koyo aisimiya alenu mandaa aisimiya. Go peapare ambiare ora ree angelenu kurape dina dia.
6Go alenu ririyaoma wia auri gurupa. Ande alinau puaeme alinumiri naare raayosi ririna wia anda panda para puala puma nimuna pupudengi noaeme. 7Go peapare ora no runane kondo pambala puaeme anda panda parare ora alinau puae kalu ali komea pua kondo pambala pame. Nipumi pange go au pi auri kuni gipayalosi rana komea komea pua kondo pambala puaya. Nipumiri aarinuna wee mumare Gode repara adea. Go au pi einuna reere gore nipuna koae aununa pange wenaalinuna koae einuna. Go koae aunuri ora nimuna koneme pula pimi ei dia. 8Go ririyao wimi ei andalo arare ande Epe Yaakopi Sipiridimiri go einu wada. Ora no Gode nipu pope porare ambe na-lombea. Go eina reere mo ririna naleme pupudengi pa nalemenda pia.
9Go aunuri ambia go pea aunu wada. Ambia ande Gode para alinau pula ara adame mena aarimi wenaalina lo para na-randepelea. 10Akepeare go einuri ipa endame pange nimuna koae aunu randepelena loa puaeme aunumi komea pamenda. Go aunuri pa kama nane aunu wamo pula peapare runane aunu na-wamo pilia. Wee olemole raayo Godeme werepe ma-rendepoyalia dinare go ririna peme aunu raayo peredea.
Kerisona weeme pia au
11Go peapare Kerisore ande alinau puaeme alinuna Kalu Ali ambala aya. Nipuri ande epe aunu ambala go wia alenu ma-epao-aya. Ande nipumi e poaya ria andare ora ririna ale menda pange ale menda na-ralea. Go ria andare alinumi na-wareme. Go eiri go wapupa wia suna aya ale diama. 12Yesu go ria anda para kondo pambisaya dinare nonde Godena Ora Yaakopu Rumbi Anda panda para rana komea pua kondo pamboma ora werepenu pange na-kondo pambelea. Nipu go para pua kondo pambalore aarinuna o nanigosi menanuna wee na-ma-paisaya. Nipuna wee ma-paisaya eimiri naa naare raayo rambameape ei gisaya. 13Mo nanigosi o gawa wee pange ande gawa menasi kiruma danga wia eina danga mumare ande wenaali mandaa kolisimiya. Go aunu pisimiya eimi mo nimuna mandaa yongalenu koae au pisaya einu randepelisimiya. 14Go aarinuna weemere mandaa yongale randepeleapare Yesuna weemere ora andapu raayosi randepelea. Ande pa endoma ao-aya Yaakopi Sipiridina ruparare Yesumi go au pea. Ale menda na-rale ali Yesu ora yaakopu rumbea do Gode repara alinau pisaya. Ande koae aunu randepelena loa pisimiya aunumiri go au na-pisaya. Go einare Yesuna komisaya einumi komea randepelisaya. Naame ande pa endoma aya ei Godena pupudengi namonoya pea.
15Go eina reenare ande pena angele lo koro wia eiri Yesumi ririyao wia. Go au pi auri ande Godeme wi lea wenaali nipumi wili mandaa mea epepe aunu andenayanda pea. Go auri ora manda pilia. Akepeare ande ririna angele lo koro wi eina rupara koae aunu pisimiya wenaaliri Yesuna komea eimi kepe rapaya.
16Moae ale mulamere mo reali ambala komena maisao ali. 17Akepeare reali pa ainyalomare moae alenu go mealonda angele mendame na-dea. 18Go eina reenare ande ririna angele lo koro wia eiri wee rapu komea ana pala pisaya. 19Ririna Mosesimi ande Rudule Angeleme lea mana angelere wenaali la alisaya. Go au pumare gawa menana wee pange nanigosi menana wee pange ipa rapu lekeyoma ande Rudule Angele wisaya bukana kolisaya pange wenaali mandaa pange kolisaya. Go au pi auri isopi lee repana pala kera aopale sipisipi iri koraoma pisaya. 20Nipumi go angele lisaya.
Go weemere ande angele lo koraoma wia ei nimimi
pangoma raidaminyayanda go korao rumbianda.
21Mendaa rupa Mosesimi aarinuna wee ande angele lo koro wi ria anda mandaa pange ande Gode repara yainya pulameya meme alenu raayo mandaa kolisaya.
22Go einare gurupa. Ande Rudule Angele lalore, olemole raayosi weeme komea wamo pula peapare ora raayosi na-wamo pilia. Go eina ruparare koae aunu randepele auri wee kama nane koyo rumbiliminda komea.
Yesu komisaya eimi koae einu randepelea
23Go alenu raayo gurupa randepeapeya. Go alenuri so Epeni nane peme einu go suna manda meame. Go peapare Epeni nane aununare ora rupa komea alinau palimi. 24Akepeare Yesu pua kondo pambe auri alimi wari yaakopi anda panda para na-pua kondo pambea. Go alimi wari yaakopi anda pandare ora ei manda meaya. Yesuri Epeni para pua kondo pambisaya. Go au puma naa alona nipu Gode rapu aya.
25Ande Isaraelimi mandu rangala pae alinuna alinau puae kalu alinuri ande Yaakopi Anda panda parare kuni gipayalosi aari weenu muma rana komea puala pisimiya. Go au pisimiyapare Yesumiri nipuna domere rana komea komea alinau pisaya. 26Mo alinau puae alinumi pisimiya ei pula pisayalore gore nipu wala liala wala liala pula pisimiya. Go peapare ambia go naarele peredoame pai dinare nipu pa rana komeasi komea ipisaya. Go rana komea ipumare nipuna do alinau puma koae aunu raayo wamo pea. 27Wenaali raayo rana komea komea komeleme. Gupuma Godeme rali pilia. 28Gurupa mandare Yesu pange nipuna do rana komea alinau paisaya eimiri wenaali raayona koae aunu randepelea. Nipu ambala ipisaya rupa wala rana laapo pa epelea. Go au pi auri wenaalina koae aunu wamo pulame diayapare nipu epenayanda maisambao-aeme wenaali rambamula epelea.
Currently Selected:
Iburu 9: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
