Iburu 8
8
Yesu naana alinau puae Kalu Ali
1Neme go ei lalo eiri go eina lalo. Naana alinau puae Kalu Ali menda aya. Nipuri Epeni nane Gode naana Andaa Alina popeke ki nane pia. 2Nipuri alinau puae Kalu Ali mo Godena yaakopi alena pupudengi noaya. Go alere pa ria anda ande wenaalimi na-wari Realimi warisaya ei.
3Alinau puae kalu alinumi meme alenuri pakama ada alenu pange aarinu Gode repara alinau pulu ara alenayanda meme. Go einare naana alinau puae Kalu Alimiri Gode para alape ale pange siamba aya. 4Go Ali nipu go suna alapayalore go au pulupa. Nipu alinau puae ali na-ala pa. Akepeare go suna alinau puaeme alinu pange aemenda. Gupuma go alinu ande Rudule Angeleme lea rupa alinau puaeme. 5Go alinumi go suna ara pimi aunuri so Epeni nane ora aunu peme ei manda meado ara pimi. Ande Mosesi rapu pisaya rupa manda. Nipumi ande angele lo koro wi ria anda pulame palo ainyare Godeme gupi lisaya.
Neme pili aunu raayo so kana rumu manda
andaende rupa pipape lisaya.
6Go peapare Yesu nipumi alinau pape einare ambiare nimu lu angulaya. Ande Gode rapu pange wenaali rapu angele lo koro wi eimiri ambalana ei lu rambuaya rupa. Akepeare go angele lo koro sialo arare Godeme lalore go wenaalimi ora epepe aunu andeleme lisaya.
7Ande ambala ririna angele lo koro wi einda ora rendepona polopare gore ambia go werepe nane angele lo koro wi eiri gore na-pulapame. 8Go peapare Reali Godeme nipuna wenaali angalapuna koae koae aunu waru andea eimiyalore gupi lea.
Reali Godeme gurupa lalore, Pangelepape.
Repara go aunu pula pea di epelea.
Neme ande Isaraeli wenaali rapu pange
Diuda wenaali rapu pena angele lo koro sula pe
naarele epelea.
9Go angele lo koro sula pe eiri ande nimuna
aya kasuanu rapu pisaya rupa manda dia.
Go aunu pi auri ande Idipi anda minyapalaoma
nimu karu paisa dina go au pisa.
Neme nimu rapu angele lo koro siaowa angele
na-pangamendare nimuna lame angelenu
na-pangawa.
10Werepenu naare menda epele dinare neme
Isaraeli wenaali rapu go pena angele lo koro sula.
Nina rudule angelenu nimuna kone para winya doa
pange nimuna pu rupara winya doa.
Niri nimuna Gode alua pange
nimuri nina wenaali alimi.
11Mendame nimuna yangonu para lalo ara
Reali Gode kone siape pi na-deme.
Akepeare niri nimuna Gode lo komape endapenu
raayome ni kone wilimi.
12Neme nimuna koae aunu kunula.
Gupuma neme go koae aunu repara kone na-sula lea.
13Go pena angele lo koro wi ei lalo eiri gore ambalana eiri Godeme ma-kurupaya loa lalo. Ale menda goeda dinare gore pena ale menda ropo pu aemende.
Currently Selected:
Iburu 8: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
