Iburu 7
7
Alinau puae ali Melekesedekena angele lea ei
1Melekesedeke nipuri Saleme lee andana kini ali aisaya pange nipuri ande Andaa Godena alinau puae ali aisaya. Eparame yandana aoma anda malapu pamboma ipulu-ainyaloma porana mandaoma karu meala arare Melekesedekeme Eparame yakili ae angelenu lisaya. 2Eparameme ande yandana meaya olemole raayo ki laapo rumaoma komea komeare Melekesedeke alisaya. Melekesedeke nipuna bina reere ora rendepona au puae alina kini pange Salemena kini. Salemena reere kuma pi eina kini loma lea leme. 3Melekesedeke nipuna ama pange apa pange nipuna repaare go ruru lo pange ree na-wia. Nipu mandea rupa pange nipu kome rupa pange ree na-wia. Nipuri Godena Naki mandana alinau puae ali pa ari pelea.
4Melekesedeke nipuri ora andaa ali menda aisaya. Eparame naana ririna apame golere ande yandana misaya alenu mendapare Melekesedeke alisaya. 5Ande Rudule Angelemere gupi lea. Lipai nipuna mandu rangala pae ali menda alinau puae ali alimindare gore go au pilimi. Isaraeli wenaalimi olemole ki laapo rumaoma sumare komeare nimumi meala pilimi. Nimuna repaa wenaaliyapare golere pa go au pilimi. Nimuna repaa wenaali Eparameme mandu rangala pae repaayapare 6Melekesedeke nipuri Lipaina repaa dia. Go peapare Eparame olemole alisaya. Eparame nipuri Godeme gula loma wili mandaa meala pisaya alenu muaisaya ali. 7Yakili ae aliri rolo para aya. Go peapare mo yakili ada aliri mandaa aya. 8Monde olemole ki laapo rumaoma komea mida aliri alinau puae alinumi peme. Go alinu nimuri komape alinumi gole pimi. Go peapare Melekesedeke nipuri na-komelea. Ande Godena angele wia bukamere gupi lea. 9Go einare Eparameme olemolenda Melekesedeke adeandare gore Lipaimi pange alaya loma dama. 10Lipai nipu ambe na-mandi-ainyaloma gole Melekesedekeme Eparame porana mandaisayapare golere pa Lipaimi pea. Akepeare Lipai nipuri Eparameme mandu rangala pae ali.
11Godeme nipuna Rudule Angele sialo ara lalore Lipaina repaame komea alinau pao ae alinu ainya ae lisaya. Go repaa nimuna pupudengi epe rupa nola pisimiyalore gore wala alinau puae ali menda na-oposiala pa. Go epola pea aliri ande Eroni nipuna repaa ali diayapare golere Melekesedeke nipuna anda milia.
12Go einare ande alinau pu arimiya alinu midame pora ropopa dinare ande Rudule Angele pange ropopa.
13Naana Reali Yesu pange ruru menda alimi pisaya. Nipuna repaa alinau puae ali menda na-aisimiya.
14Nipuri Diuda nipuna repaa ali aisaya eiri wenaali raayome kone wisimiya. Gupuma pange ande Mosesimi angele lisaya dinare go repaana rupara alinau puae ali menda epelea loma pange angele menda na-lisaya.
Melekesedeke pisaya rupa alinau puae ali menda aisaya ei
15Go einare ande ambala lamande angele ambia pename go andalemanda. Alinau puae ali menda go opopayanda. Nipuri Melekesedeke manda. 16Nipuri alinau puae ali ma-aisimiya. Suna alinuna rudule angele diayapare ande endoaya ei guaya purimi ma-aya. Go puriri ora na-peredea. 17Akepeare ande Godena angele wia bukamere gupi lea.
Neere alinau puale ali pa ari pele lea.
Melekesedeke pisaya rupa go au pili, lea.
18Go einare ande ambalana Rudule Angelere pane go su moneleanda. Akepeare nipu puri na-palea pange mendame na-radia. 19Akepeare ande Mosesimi alisaya Rudule Angelemere ali menda ora rendepona na-ma-aya. Go peapare ambia Gode repara ora epamonoyanda pora menda apo wia.
20-21Go eina aperaomare Godeme ale menda ora pula ae loma wili mandaa meaya. Godeme mo alinu alinau puae alinu ma-ado arare go ali repara pisaya rupa wili mandaa na-misaya. Go peapare Yesumi alinau puae ali aisaya eiri Godeme ora pula loma wili mandaa mea ei angele lisaya eimi pisaya. Go angelere gurupa.
Reali Gode neeme go au ora pula loma angele
go lalonda.
Neme nina kone wala na-ropo pulua.
Go wili mandaa angelere gore nee ora
alinau puae ali pa ari pele lalo.
22Ande ririna Mosesi rapu angele lo koro wisaya eiri werepe Yesu rapu lo koro wisaya angeleme wanduaya.
23Rando menda pea ale menda gonda. Alinau puae alinu menda komala paya dinare alona menda ala pisaya. Nimu komameya eimiri nimuna pupudenginu pa na-nairi paisimiya. 24Go peapare Yesu nipuri na-komea. Nipuna pupudengi alinau pao-aya eiri menda repara na-adea. 25Go einare Gode repara epolame Yesu repara epa kondo pambelea aliri ambia pange ora werepenu manda rambamilia. Akepeare Yesuri Gode repara wenaalinu rambaminyayanda yainya waru pao-aya ali aya.
26Yesu go einare naana alinau pao-aya Kalu Ali aya. Nipuri ora yaako pea. Nipu repara koae aunu menda na-ralea. Nipuri suna ara koae aunu puae wenaali rapu na-aperaoma aya. Godeme nipu epeni andasu para karu aya. 27Nipuri monde alinau puae kalu alinu manda dia. Go alinumiri Gode repara alinau pulamere yapiyalosi nimuna koae aunu kepemare wala mo wenaalina koae aunu kepeala puaisimiya. Nipumi alinau rana komea komea pisaya. Wala menda werepe na-pilia. Go alinauri ande repana mandaa lu andiaisimiya ei.
28Ande Mosesimi alisaya Rudule Angelemere ande rendepona na-ae alinu gole alinau puae alinu ma-aisaya. Godeme wili mandaa misaya eimiri nipuna Naki Yesuri alinau puae Kalu Ali ma-aya. Ambalana Rudule Angele pereleandare ambia pena eimi andere-aya.
Currently Selected:
Iburu 7: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
