Iburu 6
6
1Gupuma ande Keriso aluameyanda ririna lala pamande angelenu kama na-lo aere mo puri pale angelenu kura eiri bainya. Go naame ririna waloaema angelere go ei lapo. Ririnare ree na-wi aunu pape ei repara kou walape ei pange Gode repara kone rulape ei lapo. 2Gupuma naamere baparaisi aunu pada aunu pange ande baparaisi au paoma kou nane ande alina kaluna ki wida aunu pange ande Godeme kome wenaali ma-rekala pea einuna pange ande wenaali rali pula pea dina pulu pea aununa komea angele na-lala paminya.
3Naa puri pale Keriso wenaali aminya. Go eina Godeme pi pa deandare gore naame go aunu paminya.
4Monde Gode repara kone rulaeme ei minyapalaoma lekeya pula repaare wala Gode para ipulu rendaa pilia. Nimumi Godena angelere ora ei ae loma ambala meamenda. Go wenaalimi ande Godeme pakama wenaali para ada alenuri ambala andamenda. Gupuma nimumi wenaali rapu ande Epe Yaakopi Sipiridi mu pamende. 5Ande Godena angelere ora epelea loma ambala andamende. Gupuma ande Godeme werepe andere pidianda pula pea aunuri ambala kini puma andaleme. 6Go aunuri andomayapare golere nimumi nimuna kone rulada aunu minyapalariminde. Go einare go wenaali Gode repara wala ipuluri ora ana na-pea. Akepeare nimumi Yesu Godena Nakiri wala rana laapo ekeraisa wapepi repana mandaa laapo pa yala aloma lu andiademe ei manda.
7Godeme wai alenu poape suri ora epe rupa olemole opape aunu ma-pao-aya. Go suri ipula yainumiri renge renge ma-lao-aya. Go sunare wai alenu opoaya. Go wai alenumi mo e mapu puaya ali rambamuaya. 8Go sumi go au na-pinda wala kapona ambu koae alenu opo pange reke ae alenu opo pilimindare gore Godeme go su mu kidia. 9Naamere nimi repara gurupa angelenu loma wape pimapare amenu nimimiri go aunu na-pilimi kone widama. Nimiri ora porana apo puluminda. Go parare nimi rambamida. 10Godeme olemole ora epe rupa rali puaya. Nimimi monde Keriso yangonu waru rambamuarimi. Go einare nimimi Gode raname komea ei walamende. Go einayandare Godeme nimi kone sualia. 11Go eina naana ranare nimimi go pimi rupa puri pa palari pualepape kone widama. Nimina kone rulademe au pawa irulao ripinyumare Godeme nimi mula pea naare komea maisambao-alepape. 12Nimimi gigimi na-komalepape. Gode repara kone rulao-aeme repaamere go aunu na-puaeme. Go repaamere ande Godeme gula lea alenu ora na-meme.
Godeme pula lea aunu ora pilia
13Godeme Eparame para wili mandaa mea angele menda la wisaya dinare ora pula loma angele lo korao wisaya. Gode nipu manda menda na-aya. Go einare Godeme go angele doamere pa nipuna bina komea laya. 14Godeme Eparame para lalore,
Ora lalo. Neme wenaali ora waru mandu rangala
painya doa. Ne raname komelea, lisaya.
15Eparame nipuna kone sialore Godeme go da au ora pilia kone suma pa maisambao aripuma monegisina Godeme alisaya. 16Ali mendame ale menda ora pula loma lalore nina apa komea masu o nina ama komea masu ora lalo deandare gore ora da kone suaema. 17Godeme naa nipuna nongo nakinu rambamula loma ambala lisaya. Nipumi nipuna doa angele ora na-ropo pula loma naa walisaya. Go eina puri ma-palaluameya nipumi lalore nipuna bina go ei pula loma wili mandaa meaya. 18Gode nipumi yayapi angele na-loaya. Go einare ale laapo menda ora ropo na-pilia. Godeme na-ropo pula leale lapore go ale laapo, Nipuna wili mandaa meaya angele pange nipuna bi loma pula leale laapore ora pilia. Go einare naame kone wimapare naa ale mendame naa waraliayanda Godeme naa ora waru andere-alia kone wima. Go einare Godeme gulale maisambao alepae leale ora gilia kone suma aema. 19Naamere go ei ora milima kone suma maisambao-aema. Go kone rulaema eina reere Yesu Keriso. Nipumi ambala so Epeni nane aya alinau puae andana runane pua aya. 20Naa pola pema rupare Yesu ambala go para pea. Yesu nipu monde alinau au puaeme alinuna Kalu Ali pirari pualia. Melekesedeke pisaya rupa manda aya.
Currently Selected:
Iburu 6: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
