Iburu 5
5
1Alinau puaeme kalu alinu raayo Godeme alinu angalapuna yarepe mea. Go yarepe mea alinumiri wenaalinuna angele o pape aunu Godena pupudengi nado ara nimumi palimi. Gupuma nimumi koae aununa alinau pao-aeme pange olemole pakama aloaeme. 2Go alinau puaeme ali nipuri wenaalimi peme rupa lopala rekala pape ali. Go aunu peme eimiyalo arare wenaalimi pange kone na-wi ara pa aunu pilimindare gore nimumi pange yarame komeleme.
3Nipu pange puri na-pale eimiri mo wenaalina koae aunu peme eina alinau paliandare gore nipuna koae aununa pange alinau palia. 4Ali menda Gode repara alinau puaya ali alua kone wiliandare gore nipuna ranana na-alia. Godeme go ali go au pinyayanda nipumi ma-alia. Mosesina ame Eroni ma-aisaya rupa manda.
5Mendaa rupare Yesu Gode repara Alinau Puaeme Kalu Alinuna Kalu Ali ainyayandare Godeme ma-aisaya. Yesu nipuna gole nipuna ranana go au na-pisaya. Go au na-piri Godeme Yesu para gupi lisaya.
Ambiare neere nina Naki ae lisaya.
Gupuma niri nena Apa ayo lisaya.
6Godeme nipuna angele wia buka para pange gupi lisaya.
Neere naare raayo Alinau Puae Ali ao-ali ae lisaya.
Ande Alinau Puae Ali menda nipuna bi
Melekesedeke pisaya rupa manda.
7Yesu go suna arare Gode repara yainya pulu ara ora puri waru paloma ree lalo ara yainya pisaya. Yesu nipu komapeya Godeme rambaminyayanda go au pisaya. Go lala pisayandare Godeme Yesuna yainyanu pangisaya. Akepeare Yesumi nipuna angelenu ora waru panda punyaoma pangala pisayanda. 8Yesu nipuri Godena Naki aisayapare nipu rendaa waru misaya. Go au pisaya eimiri Arana angele mongeando pangisaya.
9Yesu nipuna pula pa aunu raayosi pu pereyaripa dinare naare raayosi nipuna angele pangoaeme repaa raayo nipumi rambamuaya. 10Godeme ande Melekesedeke pisaya rupa Yesu Alinau Puaeme Alinuna Kalu Ali ma-piraya.
Kone rulale ei na-giainya
11Neme go aunu pape eina angele pa sia ayopare nimi repara la gulandare rendaa pilia. Akepeare nimi la gulandare go ale para da rana komea ambe na-anda wilimi. 12Nimiri ambalande wenaali menda walape alinu ape alinuyapare gole nimina gimi komeme. Godena angelenu ande onge nongo nakisinumi ririna sande sukuluna pangaleme nono pi angelenu gole ni mendame walena loaeme. Nimiri ora andaa puri pale enda nape wenaaliyapare golere nimi niminya amanuna andu pange pa no piri nono pea. 13Menda ali apimi andu pange pa no pidiandare gore pa au pape ei pange epe au laapo rali pape ei go eiri go ei lo kone na-wimi. Enge nongo nakinumi pimi rupa manda. 14Go peapare mo epe au pape eina pange pa au pape eina rali pape ei pali puaeme repaare gore mo puri pale enda noma aeme rupa manda.
Currently Selected:
Iburu 5: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
