Iburu 4
4
1Mosesina naarena Godeme Isaraeli wenaali para lalore Nimi si para pidaminya doa lisaya. Naa pange gurupa si para pidaminya loma wili mandaa misaya. Go einare naa pange monde Isaraeli wenaalimi go si para pirape ei wandu lisimiya rupa wandu dimi waru andere-alepape. 2Akepeare ande Epe Angelere nimumi pisimiya rupa naame pange pangelema. Mongonde angele Godeme la alisaya eiri pangame. Go pameyapare go angeleme nimu ale menda na-paya. Akepeare go angele pangomare nimuna runanere na-maidameya. 3Naa monde Godena angele pangema wenaalimi naare ande Godeme nimi si para pidaminyaya gula ae lisaya rupa si para pima. Godeme gurupa lisaya rupa manda.
Go einare ni ora rono pa dinare neme go angele lawa.
Go wenaalimi nina angele na-raidamendare gore
neme ande nimi si para pidaminya lawande
andasu para na-pualiminya doa, lawa.
Gode nipuna pula loma la wisaya aunuri ande su yaa kini pulu ara la wisayapare gole laya. 4Ande Godena angele wia buka mendanare ande warapu naarena angele lalo ara gupi lea,
Gode nipuna pupudengi nari pumare
warapu naarenare si para pia lea.
5Ande koro pira loma lea angelere Godeme wala gupi lea.
Go wenaalimi nina angele na-raidamendare gore
neme ande nimi si para pidaminya lawande
andasu para na-pualiminya doa, lawa, lea.
6Ande ambala ririna go Epe Angele pangame repaame ande si para pidimi laya ei na-pirameya. Akepeare nimumi angele na-pangameya. Go peapare Godeme mendane wenaaliri Godeme go si para pida koro minya lea. 7Godena yapi di menda sia aya eimiri go angelere ora da. Go yapi diri gore Ambia lea. Ruli diama ambia. Kuni gipa ora andapupe pa aoma Godeme kini Deipidi para gupi lisaya.
Neeme Godena angelenda ambia pangelendare
neeme ni gipia pi na-lape.
Go angelere go ramayona ambala wia angele.
8Diosuame mo wenaali si para pirape di menda na-alaya. Go einare Godeme werepe yapi di menda siape eina angele lea. 9Go einare Godena wenaali si para pida peme di apo wia. Gode ande olemole wapuao puma warapu naarenare si para pirisaya rupa nipuna wenaali pange si para pidimi. 10Go einare Godeme ande si para pidaminya doa lea wenaaliri nimuna pupudengi na puma si para pidimi. Godeme nipuna pupudengi na puma si para pirisaya rupa manda.
11Monde Isaraeli wenaaliri Gode repara kone na-rulaisimiya eimiri nimumi ande Godeme si para pidimi lisaya ei wanduaisimiya. Gurupa manda naa pange go au pilima puri waru paloma alepape.
12Godeme lea angelenuri endoma ara one mone aunu waru pea. Go angelere ande nee waru aya eimiri ande mendane mendane ne ae banasi rainu pange lu rambuaya. Go angelemere alina do pange pondope aoma no do runane monde remo pange kone ree laapome epa runaepe para ambuna pondope awea. Menda angeleme ora no kuli pange yondo ipa laapo runape alena pange rekelepu rumbea. Go menda angelemere alina rana pi ei pange alina kone runane suaya konenu pange rali pea. 13Gode repara ale menda kundiri pape-na-ya. Go su yaa rupara pia aunu raayo nipumi manda andala. Go einare go suna naame pima aununa reenu pange widama konenuna reenu naame nipu repara ladema.
Yesuri Alinau Puaya Alinuna Kalu Ali
14Go einare naame naana kone rulaema eina angele dama ei waru irulao ripinyaminya. Akepeare naana Gode repara Alinau Pao-aya Andaa Ali Yesuri Godena Naki nipuna lee rona ambala aya. 15Go naana Alinau Pao-aya Andaa Alimiri naa lopoaema alenu kone wia. Akepeare go naana Alinau Puaya Andaa Alimiri one mone aunumi nipu waru landisayapare nipumi koae aunu menda na-pisaya.
16Go einare naame paalame na-kome no Gode aya alena bainya. Go Gode repara pakama yarame komala aunu ora waru rumbilia. Go pelemandare naa lopelema dinare naa manda rambamilia.
Currently Selected:
Iburu 4: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
