Iburu 3
3
Mosesiri Yesuna rolo para aya
1Nina Keriso amenuo, nimi pange Godeme nimi wi lea wenaali. Nimi Yesu Keriso kone waru sialepape. Naame go naana kone rulaema eina Alinau Puae Kalu Ali. 2Yesu nipumi Godena angelenu waru pangoma puaripaya. Godeme go aunu pinyaya Yesu ma-aisaya. Yesumi go au pisa aunu pange Mosesimi Godena wenaali karu pulu ara pange pisaya au. 3Epe anda menda edea ei andalo arare go andare wenaalinumi eloala pemepare mo anda elea ali komea wenaalimi go alina kimi pea andayale andae loalimi. Gurupa mandare Mosesina bi minyasiala pemepare Yesuna bi komea ora andapu minyasialimi. 4Anda raayo wenaalimi elea einu kama aeme. Alenda alenda raayo wapea aliri Gode komea. 5Mosesi Godena epoae ali ara Godena wenaalina rupara nipu ora epe rupa pupudengi noaripaya. Mosesimi pisaya aunumiri Godeme werepe pula paya aunu walisaya. 6Go peapare Kerisore ora rendepona aunu kama pua aya. Nipuri ande gonde wenaali andere-aya Naki. Naa pange mo naana mulapima ale ora mulapima loma kone ma-pambaoma puri paloma alimandare gore naa pange nipuna wenaali aema.
Godena wenaali si para pidimi
7-8Go einare ande Epe Yaakopi Sipiridimiri gupi lea.
Neeme Godena angelenda ambia pangelendare
nee ni gipia pi na-lape.
Nena aya kasuanumi pange monde weambipi suna
Gode rapu yanda lialo ara mendaa au pisimiya.
Naare mendana mo Gode la andalo ara pisimiya rupa.
9Godeme lalore gupi lea, Monde kuni gipa ali ria
laapona rupara neme pawa aunuri andamepare
gole nimumi ni la andame.
10Go einare go wenaali rono pangalore gupi lawa.
Go wenaalimi ni na-raluaeme.
Gupuma nimumi neme lalo aunu na-puaeme.
11Go einare ni ora rono pa dinare
neme go angele lawa.
Go wenaalimi nina angele na-raidamendare
gore neme ande nimi si para pidaminya lawande
andasu para na-pualiminya doa lawa.
Go angelenuri Godeme lisaya einu.
12Nina amenuo, nimi pange neme kone rulayo eina kone rulaeme. Go einare nimina runane Gode repara kone na-rulae koae remome wi da kone wimi repaame nimi ma-lopapana waru andere-alepape. Gurupa alinumi Gode ande endoma aya Gode para kou waloaeme. 13Go aunu na-piri go koae aunumi nimi makiralianda nimi Godena angele na-pangelemeya lalole nimimi menda menda naare raayo rambamulolo pipape. Ande Godena angele wia bukame lalore Ambia lea eiri naa para ruli dia ora ambia lalo ara da. Go einare menda menda rambamulolo pipape. 14Akepeare naa pupudengi nolamere ambala ririna pama rupa naana kone rulaema ei ora irulaoma ripinyuma naa komelema dina minyapalaminya. Go au pilimandare gore naa Yesu rapu menda pupudengi nadema repaa aema.
15Ande Godena angele wia bukamere gupi lea.
Godeme nee repara ambia angele deandare
gore neeme ni gipia angele na-lape.
Nena aya kasuanumi pange Gode rapu
yanda lialo ara mendaa au pameya, lisaya.
16Monde Godeme angele la ei pangomayapare yanda liameya repaare api rapoyapae. Monde Idipi andasu minyapaloma Mosesimi karu paisaya repaa raayome go au pisimiya. 17Godeme kuni gipa ali ria laapona rupara rono pange auri api para pisayapae. Monde weambipi suna koae aunu puma koma pa rulopame repaa rapu rono rono pangaya. 18Ande Godena puri pale angele menda gupi laya. Neme ande nimu si para pirina loma walawa andasu para na-peleme laya. Go angelere api para lisayapae. Ande nipuna angele na-pangameya repaa para lisaya.
19Go einare ambia naare andalema. Go wenaalimi monde Godeme peleme laya andasu para na-paisimiya. Nimumi go para na-paisimiya eiri ande Godena angele na-pangame eimi pisaya.
Currently Selected:
Iburu 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
