Iburu 2
2
Godeme naa rambamea auri ora andaai
1Go einare ande pangamande Godena angelenuri ora irulaoma ripinyaminya. Akepeare pa pora naini pelemayanda lalo. 2Ande eindiolo alinumi naana aya kasuanu para la alameyande angelere orayayande. Go angelenu na-pango pange na-raliala pameya repaare rendaa meala pameya. 3Go ora naa epe rupa rambameape eina andaa angele lea einda na-pangelemandare gore ma-ora rendaa andaai milima. Yesu nipuna gole go naa rambameape eina angele ambala lisaya. Go angele lalo-ainyaloma pangeme repaame ora laya lo naa para la giame. 4Go einu pa lo-ainyalomare Godeme go einuri ora angele ae loma wadoamere wenaalimi na-pape aunu pange na-ande aunu pisaya. Gupuma ande Epe Yaakopi Sipiridimi pakama wenaali repara alama alama pisaya alenu misimiya. Go eiri nipuna rana pi ei.
Yesumi naa rambamea ei
5Godeme mo eindiolonu para monde pena su yaa laapo andere pida minyaya pi na-lea. Go pena andasu laapore neme go ramayo wape pulu ara loayo andasuna lalo. 6Gupuma monde Godena angele wia bukana ruparare gupi lea.
Godeo, neeme wenaali naa repara kone suainya
naare akepuma pakelemapae.
Naare ale menda dia ae.
7Neeme naare pa ongepusi eindiolonuna rolo para
piramono de.
Gupuma naare puri pale paa pi ei gele pange
andasiaoma andoale.
8Gupuma naame olemole raayo andere-aema.
Go bukamere gupi lea. Godemere naame olemole raayo andere piramono lea. Gore olemole raayosina lea. Go peapare go alenu mendapare ambe na-andere pima. 9Go peapare ambia Yesu andalema. Pa riambosi komea nipu eindiolonuna rolo para pirisaya. Go eiri monde Godena pakama yarame komala eina rupara wenaali raayo rondona komenaya pa. Nipu komala eina rupara rendaa andaai misaya eina reenare ambia nipuna biri paa puma puri palea ei wenaali raayome andasiaoma andoame.
10Godemere olemole raayosi wapuma andere-aya. Godeme wenaali andapu nipuna Epeni andasu nane ainya kone wisaya. Go eiyanda nimuna endoaya ei meaya ali Yesu para rendaa andaai alisaya eimiri Yesu nipu ora rendepona one mone aunu pape eina ri pea. Go eiri Godeme ora au pisaya. 11Yesu mo wenaalina koae einu randepe-ao-aya ali pange go wenaalinu nimuna Apare komea aya. Go einare go wenaali repara Yesumi nipuna amenu lape yalame na-komea. 12Yesumi Gode repara gupi lea.
Gode neeme pele aunu nina amenu nimuna
mombedeme paranu neme lalua.
Gupuma go para nena bi minyasialua, lea.
13Yesumi mendaa gupi lo paya.
Neme Gode repara rilaoma alua.
Gupuma gupi pange lo pea.
Ambiare go Godeme gea wenaali rapu ni pange
go ayonda, lo pea.
Yesu suna ara ora ali aisaya
14Nipumi mo naa wenaali lea wenaaliri suna do aeme wenaaliyalore nipu pange suna do yongale misaya. Go do muma nipu komisaya eimiri monde komala ei andere pia ango Sadanina puri ma-koyaluameya paya. 15Yesumi go au pisaya eimiri mo komala ei repara paalame komeme wenaalinu dipula mea ei kepe rapaisaya. 16Go einare Yesumi mo eindiolonu na-rambamea. Go eiri penameyao andalema. Ande Godena angele wia bukamere gupi lea, Eparameme mandu rangala pae repaa rambamea, lea.
17Go einare go wenaali rambamulamere nimu aulape lisaya. Go au pi auri nipumi mo Godena pupudengi nado arare nipu ora au pi pange yarame komala au pi ali pange rendepona Alinau Au Puae Kalu Ali aluameya pisaya. Go eiri wenaalinuna koae ei randepe rumbinayanda pisaya. 18Go einare ambia mo wenaali menda la andala ei epelea dinare nipumi manda rambamilia. Akepeare nipumi koae au pinyaya nipu repara la andala ei epayapare wanduaisaya pange nipu rendaa no pisayapare wanduaisaya.
Currently Selected:
Iburu 2: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
