Galaesia 3
3
Rudule Angele rali ei epelea o Yesu Keriso repara kone rulaya ei epelea
1Nimi Galaesia wenaali nimiri nimina kalu kole wenaali aeme. Nimina kaluri apimi ma-koyaripapae. Nimiri ambalandere Yesu ekeraisa wape pi repana mandaa lu andiaisimiya eiri ambala naame walamande. 2Nimimi ni go ei komea la gialepanda. Nimimi Godena Epe Yaakopi Sipiridi mi auri ande Rudule Angele raluma meame o ande Godena Epe Angele pangoma kone rulaoma meame. 3Nimiri akepuma kalu kolea. Nimiri pena endoaya ei rupara aya ei kini pi auri Godena Sipiridimi ma-paripande. Go eiri ambia wala nimina purimi pa pari polameya pamepae. 4Nimina riamende kendanuri nimimi pakama rialo pamepae. Neme kone sialopare nimimi pakama na-riamende. 5Godeme nimi rupara na-ande aunu puma Yaakopi Sipiridi ge auri akepea pea. Go au pea auri nimimi Rudule Angele raluaemenda peapae o ande Godena Epe Angele pangoma kone rulaemenda pea.
6Godena angele wia bukamere gupi lea.
Eparameme Gode repara kone rulao-aisaya.
Godemere Eparame nipuna kone rulaisaya eina
nipuri rendepona aya ali lisaya.
7Go einare nimimi kone sialiminya. Ande Godena Epe Angelena kone rulaeme repaare gore Eparame nipuna ora si wanenu. 8Ande Godena angele wia bukame lalore Isaraelimi na-mandu rangala pae wenaaliri kone rulalimi eimi komea nipuna lee rona rendepona aeme wenaali alimi lisaya. Go einare ande Godena Epe Angelere Eparame repara la alisaya.
Nee ruparare wenaali raayo Godeme epepe aunu
pilia, lisaya.
9Eparame nipumi kone rulaisaya eimi Godeme nipu yakili-ao-aisaya. Go einare Gode repara kone rulaoaeme repaa pange Eparame nipu pisaya rupa Godeme yakili-ao-aya.
10Go peapare Rudule Angele pangoma rilao-alia repaare Godena rono pangala ei rapu ao-padimi. Ora ae. Mo Godena angele wia bukamere gupi lea.
Mo Rudule Angele wia buka rupara wia aunu raayo
na-raluma pualiandare Godena rono pangala ei
go ali repara epelea lea.
11Gupuma Godena angele wia bukame gupi lea.
Kone rulao-alia ali komeare gore Godeme
nipuri rendepona aya ali dea. Gupuma nipumi
endoaya ei mea.
Go einare naame kone sialema. Godeme Rudule Angele raluma pualia aliri rendepona ao-aya ali lape eiri pora menda na-wia. 12Rudule Angelere kone rulape ale menda dia. Ora dia. Godena angele wia bukamere gupi lea.
Rudule Angele raayo raluma pilia alimi endoaya ei
go ei rupara milia lea.
13Rudule Angelemere naa Godena rono pangala ei ma-andaya. Go peapare naa Godena rono pangala eimi naa mulapa rupare Yesumi kepe rapaya. Go au pi auri naame nolapama rendaa Yesumi nisaya. Akepeare ande Godena angele wia bukamere gupi lea.
Ali maa para kope aoma andi lopaeme alinu raayore
Godena rono pangea ei nimu para wia, lea.
14Yesumi go au pisaya eiri ande Godeme Eparame para wili mandaa meala ara lalore, Neere neme yakilialua lisaya. Go rupa pange mo Isaraelimi na-mandu rangala pae repaa nimu pange Yesu Keriso nipu rupara mendaa au pinya. Go eiri kone rulalima ei ruparare ande Godeme gula loma wili mandaa misaya Epe Yaakopi Sipiridi milima.
Rudule Angele mendame Godena wili mandaa mea ei manda na-ropo pilia.
15Nina amenuo, alinumi naare raayosi puaeme einu menda neme manda mealua. Go eiri gurupa. Ali laapome ale menda pulameyandare angele koraoma wilipindare mendame ipulu ara wala gonde angele lo koraoma wipi ei na-rungudia pange mendame wala angele menda na-ralao pilia. 16Go peapare kone sialiminya. Godemere Eparame para pange nipumi mandu rangala pae ali nipu lapo para wili mandaa misaya. Ande Godena angele wia bukamere Eparameme mandu rangala pae ali lea.
Go eiri gore Yesu Keriso nipu para lea.
17Neme lalo eiri gore go loma lalo. Gode nipumi Eparame lapo angele lo korao suma ora pula ae loma wili mandaa misaya. Ande Rudule Angelenuri kuni gipa andolande malapu pereyaoma ali ria komeana ki lapo (430) perelena aoma werepe warisaya. Go einare go Rudule Angelemere ande angele lo koraoma wia ei na-kunilia. 18Go einare naame Rudule Angele radima eimi Godeme naa repara gula lisaya alenu milimandare gore naame kone sialo arare gore Godeme wili mandaa mea ei rupara na-midama. Go peapare gupa diama. Ande Gode nipumi wili mandaa misaya eimiyala arare ande Eparame nipu adoa lisaya alenu alisaya. 19Go peapare Rudule Angelere akepeanda wiapae. Go eiri gurupa. Gode nipumi koae koae einu penameyao wadoame pisaya. Go einare Rudule Angelere nipumi wala werepe manda ralao wisaya. Gupuma go Rudule Angelere pa sia eiri ipuma ande nipumi wili mandaa misaya Naki opopala epelea dinare peredea. Go Rudule Angelere Godeme eindiolonu alisaya. Gupuma mo eindiolonumiri Mosesi alisimiyandare Mosesimi wenaali repara alisaya. 20Go peapare Gode nipumi gula lisayande alenu gulamere menda para pua ala loma na-rapalia. Akepeare Gode nipuri komea aya.
Rudule Angelere akepea wisayapae
21Go einare Rudule Angelere ande Godeme wili mandaa misaya angelenu rapu yanda diapae. Dia, ora dia. Naa endoaya ei giape Rudule Angele komenda sulapayalore gore naame go Rudule Angele radimandare naare Godeme rendepona aema wenaali dea. 22Go peapare Godena angele wia bukame lalore naa raayore koae eimi koraya lea. Go eimiri Yesu repara kone rulalima wenaali naame komea ande gula loma wili mandaa meaya ale milima, lea. 23Go peapare kone rulae ei ambe na-epe ainyare naa raayo Rudule Angelemere naa dipula leale koraoma wia. Yesu repara kone rulada ei epelea dina peredea. 24Go einare ande Rudule Angelemere naa andere-aripapare Yesu epea naarenare Godeme naa rendepona ae wenaali lenayandare kone rulae au komea pilima. 25Go peapare ambiare naame Yesu repara komea kone rulala pema naareyandare ande Rudule Angelemere naa na-andere-aya.
26Yesu Keriso rapu arare nimimi kone rulaeme ei ruparare nimi raayo Godena nongo nakinu aeme.
27Nimi raayo Yesuna bina baparaisi au pamende. Gupuma nimiri Yesu nipu manda au lamende. 28Go einare Isaraelimi mandu rangala pae wenaaliri rando mendapi wenaali dia pange Isaraelimi na-mandu rangala pae repaa pange pa ruru wenaali dia. Gupuma pakama pupudengi nada ali pange ali mendame na-ma-korae ali pange wena pange alinu ora nimi raayo Yesu Keriso ruparare komea wenaali aeme. 29Nimiri Kerisona ei aemendare gore nimiri Eparame nipumi mandu rangala pae repaa aeme. Gupuma ande Godeme mealiminya loma wili mandaa meaisaya alenu milimi.
Currently Selected:
Galaesia 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
