Galaesia 4
4
1Go eina neme ambia go angele lalo. Naki mendame arana moe alenu mulapea naki nipuri pena naki aya dinare pakama pupudengi nao-ae ali mandana andere-alia. Mo arana alenuri nipuna eiyapare golere pakama pupudengi nao-ae naki mandana alia. 2Nipu pena naki aya dinare nipu andere-ao pange nipuna alenu andere-ao pilimi. Gupuma arame di siala ara mendame nipuna alenu na-andere-alia dea naarenare nipuna gole andere-alia. 3Mendaa rupare naa pange onge nakisi mandana pirama dinare go su yaa surumbea remonuna dipulanu pirama. 4Go peapare ande la wi naare opola epaya dinare Godeme nipuna Naki rapaisaya. Nipu su wenana naki mandana ipuma Isaraelimi mandu rangala pae wenaalinuna Rudule Angele wia ei rupara aisaya. 5Nipu ipisaya eiri ande Rudule Angele rupara aeme wenaali Godena si wanenu amonaya kepe rapaya.
6Nimiri nipuna naki nongonu loma wadoameyandare Godeme naana pu rupara nipuna nakina Epe Yaakopi Sipiridi rapaya. Go Sipiridimi Apa, nina Apa loma ree loaya. 7Go einare nimiri pakama pupudengi nademe repaa diayapare nimiri nipuna naki nongonu. Go einare nimiri nipuna naki nongonu aeme eimiri Godeme nipuna naki nongonuna paya alenu raayo nimi gilia.
Polome Galaesia wenaali repara yarame komisaya ei
8Ambalandere nimiri Gode kone na-siame. Gupuma nimiri Gode raidema lemepare ora Gode diale remonuna dipula wenaali aisimi. 9Go peapare ambiare nimimi Gode kone wimi. Gupi nalere Godeme nimi ambala kone wia lano. Go einare wala nimi go suna puri na-pale remonuna dipula piduamere akepea wala lekedamepae. 10Nimimiri naare raayosi, yapi di menda pange sumba pange kuni gipa di raayo andaa naare kone kama suaeme. 11Nimi repara kone suma ni kenda pia. Go einare neme nimi repara nawande pupudengi pa-alupae nono pia.
12Neme nimi kongeyalo. Ni mandana alapape. Akepeare niri nimi mandana ayo. Nimimi ni repara pa aunu menda na-peme. 13Neme yainya komawa eimiri ni pa aoma nimi repara ande epe angele ririna walawa eiri nimimi kone sialeme. 14Neme yainya komawa eimiri nimimi rendaa andaai waru meame. Go einuri nimi la andala ei pa. Go papare nimimi ni kou na-walame pange ni gipia pi na-lame. Go aunu na-piri nimimi niri yaa nane aoma epe eindiolo leale meame pange nimimi ni Yesu Keriso mulapeme rupa meame. 15Nimiri raname ora waru komamendepare wala ambiare ale andamepae. Nimimi ni kone sialo ara one mone aunu waru pula pame kone sialo. Nimina leenu pange yoka muma mandana gula pame kone sialo. 16Ambiare neme nimi ora ree angele la gialo eimiri ni nimi rapu yanda rungulalopae.
17Ora, go mendapare alinumiri nimina ange yodame. Go peapare go eiri kolea. Nimuna rana pi eiri nimimi ni repara yanda diaminyayanda pimi. Gupuma nimuna ranare nimimi nimuna nane radaminyayanda pimi. 18Wenaali nee nane ralenayanda mi auri ora epelea. Go eiri go au pili eimi epe au menda epeleandare gore epelea. Ni nimi rapu na-aluanda pangere go eiri ora pa pu alepape. 19Nina nongo nakinuo, niri naki maduameyanda ranamena pia wena manda mealo. Ni nimi kone sialo eimiri ande naki maduame pia wename nala rendaa manda mealo. Go ei perele auri nimi Yesuna kou nane ora raluae alinu deanda komea peredea. 20Ni nimi rapu mendaa lena awe kone sialo eimi wee pambala. Go eimi nimina lee angana andalapao ara angele doame lalo. Ni nimina kone andapu waru sialo.
Ega pange Sera nipuna angele wia ei
21Neme nimi Rudule Angele repara panda pulame rapaleme repaa repara go ei lora pi. Nimiri mo Rudule Angeleme lea eiri kone waru sialemepae. 22Go Rudule Angelemere gupi lea. Eparame nipumi naki laapo mandisaya. Mendare monde pakama pupudengi nao-aisaya wename mandisaya. Gupuma mendare monde ali mendame na-korae kepe rapae wename mandisaya. 23Monde pakama pupudengi noae wename mandisaya eiri ora wenanumi mandu aeme rupa mandu loparipaya. Go peapare monde kepe rapae wename mandisaya eiri ande Godeme Eparame repara wili mandaa misaya ei mandisaya. 24Go angelenare siapi angele menda wia. Go wena laapore ande Gode nipumi angele laapo loma korao wipi ei mandana. Wena menda nipuna bi Ega nipuri ande Sinai kana para angele lo koraoma wi ei manda. Nipuna nongo nakinuri raayo pakama pupudengi noalapeme nongo nakinu mandisaya. 25Sinairi Araepia su nane ae kana rumuna bi. Go eiri ambia aya Diurusaleme manda meaya. Diurusalemere pakama pupudengi nao-aeme repaa.
26Go peapare Diurusaleme mendare Yaa nane wia. Go eiri kepe rapaya ei manda meaya. Nipuri naana ama aya.
27Akepeare Godena angele wia bukamere gupi lea.
Nimi nongo nakinu na-mandi wenanu nimi raname
waru komalepa.
Nimi nongo nakinu na-mandi wenanu nimimi nongo
nakinu manduameyanda neme rendaa na-nemele
raname waru komalepa lea.
Akepeare alimi giae wena menda nipu pa piriri nongo
nakinu waru mandia.
Aali rapu aeme wenanumi nongo nakinu andaa
go rupa na-mandimi lea.
28Amenuo, nimiri Aisake mandana. Godeme wili mandaa misaya eimiri nimiri nipuna nongo nakinu aeme. 29Go naarena ande wenanumi nongo nakinu mandu aeme rupa mandisaya nakimiri ande Godena Yaakopi Sipiridimi ma-mandiaisaya naki rapu yanda lisaya. Ambia pange mendaa au papeyae. 30Go peapare ande Godena angele wia bukamere ake leapae. Go bukamere gupi lea.
Ande pakama pupudengi nada wena pange nipuna
naki nipu pane rapalea. Akepeare go wenana naki
nipumi mo kepe rapae wenana naki rapu
mo arana alenu na-rali pilipi lea.
31Go einare nina amenu, naare ande pakama pupudengi nada wenana naki diayapare mo kepe rapae wenana nongo nakinu aema.
Currently Selected:
Galaesia 4: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
