Galaesia 2
2
Aposolo alinumi Polome walisaya angele ora ei loma lisimiya ei
1Diurusaleme ree anda para ambala ririna puma wala werepe kuni gipa ki laapo pereyoma angena malapu kuni gipa perelisaya dinare, ni pange Banabasi para Daidasi naa repo wala Diurusaleme anda para Godeme ni wala rupa puama. 2Neme mo Keriso wenaalinuna kalu alinu rapu kundiripu piri neme mo Isaraelimi na-mandu rangala pae repaa repara waloayo angelere waru lalawa. Neme ambala nawa pupudengimi pange ambia go nalo pupudengina kili na-edeayanda lalo. 3Nina andami ali Daidasi nipuri Giriki aliyapare ali mendame nipuna do yongale rungulaluame na-rapame. 4Mendapare repaamere Daidasina do yongale ora rungulaminya kone siame. Naana Keriso amenu leale ipumare go alinumiri payapo naame dama pi pangolameyare naana pirama para epa kondo pambarimi. Go au pame eiri naa Yesu Keriso rapu runaoma arare naare kepe rapae wenaali akipuma aemepae loma andolame epame. Naa ande Rudule Angeleme naa dipula minyaya pame. 5Go papare naame Daidasina do yongale rungulaminya pu loma nimuna angaana na-komama. Akepeare go Epe Angele nimi repara wia rupa pa winyayanda pama.
6Mendapare alinuri kalu alinu loma loaeme. Go loaemepare nimuna kalu aeme eiri ni reparare ale menda dia. Godemere wenaali rali pulamere mandaa yongale andoma na-rali puaya. Gupuma ni para lalore go eiri pa rupa walalele gurupa wala lo pangere nala giame. 7Nimumi gurupa pi na-lere Godeme Pida ande Isaraelimi mandu rangala pae wenaali repara ande Epe Angele walenaya pupudengi alisaya rupa ni pange Isaraelimi na-mandu rangala pae wenaali repara angele walanoya pupudengi gea eiri pename andame.
8Godena purimiri ni Isaraelimi na-mandu rangala pae wenaali rupara aposolo ali anoya mea. Mendaa rupare Pida pange ande Isaraelimi mandu rangala pae wenaalinu repara aposolo ali ainyaya muma ma-aya.
9Dieimusi pange Pida pange Dioni nimu ande kalu alinu arimiya alinumi pange Godeme ni go pupudengi gea ei pename andomare Banabasi pange ni saa repara ki meame. Go pame eiri gore mendaa para pupudengi naminya loma pame. Gupuma naame angele kora suma lalore Banabasi saame mo Isaraelimi na-mandu rangala pae repaa rapu pupudengi nelepa lama. Gupuma nimumiri mo Isaraelimi mandu rangala pae wenaali rapu ara pupudengi neleme lama. 10Nimumi go angele lomare saa reparare gupi komea lame. Naana rupara aeme narali wenaalinu komea kone siala paminya lame. Go eiri gore ni pange pape raname waru komoayo.
Pidame pia auri pa au pia loma Polome angele lisaya ei
11Go peapare wala Pida mo Andioko nane epa dinare neme wenaali andapuna lee rona ara angele loma lalore, Pida neemere pa au pili lawa. 12Go eiri gupa. Dieimusimi raparipaya alinu ambe na-epenalomare Pidamere ande Isaraelimi na-mandu rangala pae Keriso amenu rapu enda nala piraya. Go payapare wala ande alinu opolo epameya dinare ande Isaraelimi na-mandu rangala pae repaa rapu enda wala nanere kou walaya. Akepeare go Isaraelimi na-mandu rangala pae Keriso repaana dona yongale rungulaminya loaeme repaa paalame komala ara paya. 13Go ei andoma mo Isaraelimi mandu rangala pae Keriso amenumi pange Pidame pa rupa pala komo luyaisimiya. Banabasi nipumi pange mo repaame pameya au pisaya. 14Neme andawapare ande ora rupa epe angele rapu rendepona na-puamendare neme nimu raayona lee angaana Pida repara gupi lawa. Neere Isaraelimi mandu rangala pae ali lawa. Go peapare neere wala Isaraelimi na-mandu rangala pae alinu ao-paluaeme rupa ao-paluale ae lawa. Go einare neeme wala mo Isaraelimi na-mandu rangala pae repaare wala Isaraelimi mandu rangala pae wenaali leale ao-palinyayandare akepea ma-suriadepae lawa.
Wenaali raayore kone rulada aumi komea rambamilia
15Go einare naana amamere naare Isaraelimi mandu rangala pae wenaali mandisaya eimiri mo wenaalimi loaeme rupa Isaraelimi na-mandu rangala pae koae ei rupara mandi wenaali dia. 16Go peapare naame kone wima. Rudule Angele kama ralualima eimiri Godeme naare epe rupa rendepona aema wenaali pi na-dea. Go eiri ora ana na-peapare Yesu Keriso repara kone rulalima eimi komea manda. Go einare naame pange Godeme naare rendepona aeme wenaali lenayandare Yesu Keriso repara kone rulaema. Go eiri Yesu repara kone rulaema eimi pea. Rudule Angeleme lea aunumi na-pema. Akepeare Godemere menda api Rudule Angele kama ralualendare neere rendepona ale pi na-dea. 17Naare Yesu Keriso rapu runaemandare Gode rapu rendepona aluame rapoaema. Naame go au pemandare naa pange ande Isaraelimi na-mandu rangala pae repaame peme rupa koae aunu puaeme wenaali leale andeme. Go au peandare naame koae aunu pumanaya Yesumi naa ma-pulada laminyapae. Ora dia. 18Go peapare neme ale menda ma-koyaoma wala neme gole wamo pulandare gore wenaalimi kone wilimi. Go au puluandare gore niri ande Rudule Angele runguluayo ali loma wada.
19Rudule Angeleme ni liiandare ni ambala komea ei manda ayo. Go einare ni wala go Rudule Angeleme na-ma-koralia. Gupuma Godena aunu kome pao-alua. 20Niri Yesu Keriso rapu nipuna ekeraisa wape pi repanana komodiayayo. Go einare ni na-ayopare Yesu ni rapu aya. Ni ambia go ayo eiri Godena Si Naki repara kone rulaoma ao-ayo. Nipumi ni pu giala arare nipu ni rondona pa liinya lisaya. 21Go einare Godeme naa repara pakama yarame komisaya eiri neme kou nane na-yalua. Go peapare wenaaliri Rudule Angele radimi eimi kome Gode rapu rendepona ao-alapameyalore gore Yesuri pakama komisaya dapama.
Currently Selected:
Galaesia 2: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
