Galaesia 1
1
1Niri Polome go ramayo wape puma rapado. Niri alinumi na-raparimi pange mendame aposolo alina pupudengi nanoya na-ma-arimi. Yesu Keriso pange naana Apa Gode ande Yesu Keriso no dapa para winya ma-rekaisaya Gode niipu laapome go pupudengi nanoya ma-maepe. 2Neme pange ni rapu aeme Keriso amenu rapu aperaoma ara nimi Galaesia andasu nane aeme Keriso wenaali repara epe rupa aeme pa loma angele rapanedama.
3Naana Apa Godeme pange ande Reali Yesu Keriso niipu laapome nimi repara pakama yarame komea ei pange kuma pi ei nimi repara ginyae.
4Ambia go suna wia koae einumi naa ma-koraeme ei kepe rapaluame Yesu naana koae einu mealuame komisaya. Go au pisaya eiri nipuna Apa Godena rana pea ei ralisaya. 5Godena biri naare raayosi minyasiari puaminya. Go au ora pilimae.
Epe Angele komea kama wia
6Nimimi peme eimi ni rungula mealo pambalo. Nimiri ande Godeme pena go Yesu Kerisona pakama yarame komea eimi nimi meandepare wala rana komeasi lekeya pula ara angele menda midamenda lalo.
7Go einare nimi repara pena epe angele menda diama. Neme nimi repara go ei lalo eina reere mendame nimina lopunu ma-koyada au pimi pange ande Yesu Kerisona epe angelere wala ma-ropo piminda laloae.
8Go einare naa mendame pange o yaa nane aoma epe eindiolo alinu mendame naame walamande angele na-wale pa angele menda wadeandare gore go ali nipu repana rala-ae para ora pua relea. 9Naame ambalande lamande, go eimi ambia neme wala apo lalonda. Menda apimi ande nimimi meamende epe angele na-wale pa rando menda pi angele wademendare Godeme go ali nipu ora repana para ma-kidia.
10Neme pi auri alimi kone sialo arare ora au pi kone winyayanda pipae. Diama, ora dia. Neme pi auri Godeme komea ora au pili lenayanda pi. Neeme wenaali rana ma-pape eina na-pi. Neme go aunda pula pawayalore gore ni Kerisona pupudengi nae ali na-ala pawa.
Polo aposolo ali ala ipisaya rupa
11Na amenuo, neme nimi para la giano. Neme waloayo epe angelere su ali repara kini pea ei diama.
12Neme ali menda repara na-meawa. Gupuma ali mendame ni repara na-wala. Ni reparare Yesu Keriso nipuna gole penameyao wala.
13Neme ande Isaraelimi mandu rangala pae wenaalinumi Gode repara panda punyao-aemende rupa pala pawa dina puaripu eiri nimiri la giamende. Go eiri ande neme yarame pange na-kome Godena Keriso wenaali rendaa rendaa aloma ora ma-koyaluame rapala pawande. 14Gupuma neme Isaraelimi mandu rangala pae wenaalinumi Gode repara panda punyao-aemende rupa panda pala pawa naarenare neme nina yangonu pange lu angulala pawa. Gupuma naana aya kasuanuna aunu pala pulame waru ala pawa.
15Go peapare Gode nipuna pakama yarame komea eimi ni pange ambe na-mandi-ainyaloma nipuna pupudengi nanoya ni misaya. 16Gupuma mo Isaraelimi na-mandu rangala pae wenaali repara Yesu Kerisona Epe Angele lanoya Gode nipuna Naki pename wala dinare ni mendame mana la ginaya na-puawa.
17Gupuma ni aposolo ali ambe na-ae ano aisimiya aposolo alinu andolame Diurusaleme anda nane na-pu pawa. Go au na-piri go aleme gole Araepia anda nane puma wala Damasikasi nane puawa. 18Gupuma kuni gipa repo aomare Pida repara angele mulameya puma pula laapo pua Pida rapu aripu. 19Neme go naarena aposolo alinu menda na-andisuapare Dieimusi ande Reali Yesu Kerisona ame komea andawa.
20Neme ambia go wape pi angelere ora angele wape pi. Godeme kone wia. Neme yayapi na-lalo.
21Go au pumare neme mo Silisia pange Siria andasu paranu puawa. 22Go naarenare mo Diudia andasu nane aeme Keriso wenaalimiri ni ambe na-ande ainya. 23Nimumiri pa mendame lisaya angele koma pangame. Go lalo arare gurupa lame. Ande naa rendaa rendaa guaisande alimi ambiare wala ande Epe Angele walada lame. 24Go einare neme pawa aunu nimumi Godena bi minyasiarimi.
Currently Selected:
Galaesia 1: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
