Kolosi 4
4
1Andaa alinu nimi pange nimina pakama pupudengi nademe repaa ora epe rupa rendepona andere-alepape. Niminya Andaa Ali pange so Epeni nane ayanda lalo.
Mana angelenu lea ei
2Yainya pia au ora waru pipape. Epe konenu suma Gode repara yainya pilimi dinare ranae lala pipape. 3Godeme naa pange rambaminya yainya pala pipape. Nipuna angele lamona pora lombainya yainya pipape. Go angelere ande Yesuna kundiri angelenu. Go angelenu rondona ni dipula piri lalo. 4Neme ora mo walape rupa walano pange wenaalina konenu ma-rendepoyao yainya palepape. 5Kama nane aeme repaa repara niminya pimi aunu waru andere-alepape. Angele na-mi repaa repara angele lape poranu wiliandare gore Yesuna angele lala pipape. 6Nimina deme angelenuri ora epe angelenu komea loma ora rende pinya dapape. Wenaali raayona angele yango liada arare ora epe rupa la alala pipape.
Pereyado angele
7Neme nalo pupudenginu raayo naana ame Dikikusi nipumi la gilia. Dikikusi nipuri ora naana Keriso ame. Nipuri ora Realina pupudengi nada ali pange naana pupudengi menda nalema ali. 8Nipu nimi repara rapado eiri go eina pi. Naa aema rupa kone sialiminyaya pange nimina pu rombanu puri ma-palainyaya rapado. 9Onisimasi pange Dikikusi rapu penaya apo rapadonda. Go aliri ora epe ali. Nipuri nimina anda ali. Niipu laapome one pea aunu raayo nimi la gilipi.
10Arisadakusi nipu ni rapu dipula pipa. Nipumi nimi para paidapape angele da. Maka ande Banabasina ameme pange paidapape da. Nipu nimi repara epeleandare gore ambala apo lawandele nipu anda mipape. 11Ande Diasidasi loaemende ali Diosuame pange paidapape da. Isaraelimi mandu rangala pae alinuna rupara angele mi repaare go alinumi komea ni rambamuaeme. Godena Ki Rambuao-aya Eina pupudengi nado ara ni waru rambamuaeme.
12Epaparasimi pange paidapape angele da. Nipu pange Yesu Kerisona pupudengi nada ali pange nipuri nimina anda ali. Nimi rambamulame naare raayo Gode repara yainya waru puaya. Nimi ora puri waru paloma pange Godena rana pi aunu pala paliminyayanda yainya waru pao-aya. 13Ni nipu ambala kone wi eina neme gupi lalo. Nimi rambamulame ora pupudengi waru noaya. Nimi komea diayapare Laodisia pange Irapolisi anda laapo para aeme repaa pange rambamulame rapoaya. 14Ande naame ora raname komo aemande Dokeda ali Lukame pange Dimasi nipumi paidapape dape.
15Laodisia anda para aeme repaa para pange Nimba pange Nimba nipuna anda para mombeaeme Keriso wenaali para naame paidapape dama. 16Go ramayo nimi yarepe pereyaomare gore mo Laodisia Keriso repaame pange yarepe pinya rapalepape. Gupuma mo Laodisia anda nane raparipu ramayo nimimi pange yarepe dapape. 17Akipasi para go angele dapape. Ande Realimi giande pupudengi waru andere-aoma nape dapape. 18Go perayado angelere ni Polome nina gole wape pi. Ni dipula anda para pa pili ni kone sialepape. Godena yarame kome ei nimi para winya ae.
Currently Selected:
Kolosi 4: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
