Kolosi 3
3
Godeme Yesu rapu naa ma-rekaya ei
1Nimiri Keriso rapu mendaa komoma wala nipu rapu endoma aeme. Yesuri ande nipuna kini alinu piru-aeme seana Arana popeke ki nane pia. Go einare go su nane wia olemolenu repara kone na-rulao-aere so yaa nane wia olemolenuna komea kone rilao-alepape.
2So Epeni nane wia olemolenuna komea wee pambao-alepape. 3Nimiri komemendare nimina endoaya eiri Yesu rapu panga sumare Gode Aya Lena wia. 4Ora nimina endoaya eiri Yesu rapu wia. Nipu pename alena oponedeandare gore nimimi pange nipuna paa pi ei rapu alimi.
Naa pena ali manda
5Nimina runane go suna alenu repara wee pambao-aeme einu gialepape. Go alenuri go einuna lalo. Wenaali pake nala aunu pange koda pi aunu pange lee polopeada aunu pange koae aunu raayo repara wee na-pambalepape. Olemole ora waru andapu siawe kone wida aunuri ande yayapi gode repara yainya pia einu manda. 6Go aunu pulu ara nipuna angelenu na-pangoaeme repaare Godeme ora yangi koae ei adea. 7Ambala nimi gupi repaa rapu pa muma gurupa koae aunu pame eimi niminya ao-paliame einu pange surumba.
8Go peapare ambiare nimi go aunu raayo na-pipape. Rono pangala aunu pange yangonu yanda dia aunu pange ero lada aunu pange kodo pi aunu pange ora gialepape. 9-10Menda menda repara yayapi angelenu na-dapape. Akepeare niminya ambalana aunu raayo rumbuma ambiare pena aununa rupara apo aemenda. Go pena aunuri Godeme wapea. Nimi naare raayosi nipu manda ma-au lama lama puaya eiri nipuna aunu ora andalaminyaya pea. 11Go einare Isaraelimi na-mande repaa pange Isaraelimi mande repaa pange yongale na-rungili repaa pange yongale rungili repaa pange ruru rando rando pi rurunu pange pakama pupudengi nae repaa pange ali mendame na-korae repaa raayo mendaa pi wenaali komea. Ora ririna alere Keriso nimi raayona rupara pia.
12Nimiri Godena wenaali nipumi nimi pu guma nipuna wenaali aliminyaya ambala mea. Go einare nimimi go aunu pipape. Menda menda repara yarame komolola puma epe aunu pipape pange kuma pi aunu pipape pange ako lambi dia aunu na-pipape. 13Nimina runane ame o ainya mendame na-pape aunu menda piliandare gore pinya gialepape. Akepeare Yesumi pange naame koae aunu pisimayapare pa giaisaya.
14Pu ale aumiri aunu raayo lu angulaya. One mone aunu raayo go aumi korao rumbea. Go aunuri nimimi mipape. 15Yesumi naa kuma pi ei guaya. Go eimiri naana pulame pilima aunu raayo nipumi para waloaya. Godeme naa mea eiri Yesu rapu kuma pi eina rupara amonoya naa mea. Gode repara go eina angele lala ara ranae loalepape. 16Kerisona ora epe angele nimina runane winya. Amenu epe aunumi waru mongerialepape. Yaisanu lo pange dupale malinu kondalo arare Gode repara ranae lala pipape. 17Nimimi pilimi aunu raayo o dame angelenu raayo Yesuna bina komea pipape. Apa Gode repara ranae angele doamere nipu para deme.
Wenaalinumi mendaa para ao-paliape rupa lea ei
18Wenanu nimimi nimina alinuna rolo para ao-paidapape. Go auri ora Keriso wenanuna au.
19Alinu nimi pange nimina wenanu para pu adapape. Gupuma nimu koae konenu na-ma-sialepape.
20Nongo nakinu pange nimina ama apanuna angele naare raayo waru pangalepape. Go auri nimina Keriso au pange go aunumiri Gode rana ma-palia.
21Ama apanu nimimi pange nimina nongo nakinu rono rononu pangenaya rono pangape aunu na-dapape. Akepeare nimuna pu konenu ma-koyalimi.
22Pakama pupudengi nademe alinumi pange nimina andere-aeme repaana angele waru pangelepape. Nimumi andere-aemenda komea go aunu na-pipape. Nena Realina pupudengi nadendare ora raname komalo ara pape. 23Nimimi ale menda pilimindare ora epe rupa pala pipape. Suna alina pupudengi nadema kone na-wi, Godena pupudengi nadema kone siala ara pipape.
24Nimina yangiri Godeme nipuna wenaali adoa kone suma siaya alenu gilia. Akepeare go pademe aunu raayo Kerisona ei pademe. 25Koae aunu pilia ali nipuna pia auna yangi meala pilia. Akepeare Godeme wenaali rali pilia dinare naame pilima aunu anamusi rali pilia.
Currently Selected:
Kolosi 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
