2 Dimodi 2
2
Neere ora Yesu Kerisona yanda waru pae ali ape
1Na nakio, Yesu Keriso pakama yarame komala ei rupara neeme puri waru muma ape ae. 2Go einare wenaalimi pangomba ainyaloma nee walawande angelere neeme kone waru suma kone wi wenaali nimuna ki para siamoneape. Gupuma nimumi pange neeme wade ei pangoma muma mo wenaalinu menda para wademe. 3Neere Yesu Kerisona yanda pada ali arare neme pi rupa kenda riala pape. 4Ali menda amina aliandare nipumi pupudengi pa rando menda na-nelea. Nipumi nipuna andaa alimi rana komenaya pupudengi waru nalia. 5Ali menda nipu angiralinali pia eina alo peleapare nipumi mo angiralinali pea eina rombo wimi einunda na-radiandare nipumi yangi na-milia. 6Go einare alimi lowe puma e mapu puma wai alenu poma andere-ao-aya ali nipumiri ririna opelealenu nipumi ambala madia. 7Neeme go lalo angelena kone waru siape. Realimi nena kone ma-lombalianda neeme go einuna ree kone wili. 8Gupuma neme naare raayo Yesu Keriso para kone waru suape. Nipuri mo Deipidina repaa ali komoma wala rekisaya eiri neme go walalo epe angeleme walea. 9Gupuma niri go epe angele walalo dinare ni pake nala ali mandana seinimi koraoma wimipare Godena angele komea seinimi mandana na koralimi. 10Go einare nina pumi puri paloma ara mo kendapi einu raayo neme rurumbo ayo. Nina kone wi eiri mo Godeme wamo puma mea wenaalinu rambamulame puayo. Nina konemere mo Yesu Keriso rupara wia endoaya ei pange nimumi minyaya pe. Gupuma so Godena Aya Lena pa airi puainya. 11Go angelere ora angele la wia ei gonda.
Naare nipu rapu mendaa komelemandare
gore nipu rapu mendaa alima.
12Naame kendapi einu pa rieri pelemandare,
gore nipu rapu mendaa andere pidima.
Gupuma naame nipu na-andema demandare
gore nipumi pange naa na-ande dea.
13Gupuma naame lalore nipuna kou nane raluma
bainya demapare,
naame naana go loaema angele na-raluaema.
Naamere go einu puaemapare Reali nipumiri
nipuna angele raluma ora puaya.
Gupuma nipuna dea angele ora mandana
ropo pape-na-ya.
Pupudengi waru noaya aliri Godena lee wilina bi wia
14Go einare naare raayo neeme go angeleme mo alinu kone ma-siape. Godena lee wilina ara angele rando rando loma ana na-pi angelenu loma apeyanda na-pualepape lape. Go aunumiri wenaalinu menda ora rambameape-na-ya. Ora dia. Nimimi go koae pamba na-pi angelenu loalimindare gore go angelemere wenaali ma-koyaya au komea pilia. 15Go eina neeme puri waru paloma Godena pupudengi ora epe rupa nada ali ape. Gupilindare Godeme nena pupudengi andoma raname waru komelea. Gupula ara neeme go epe angele rendepona waru walala pape. Go pilindare gore neeme nena pupudengi no koyaripu loma neeme yalame na-komele. 16Gupumare neeme mo ree na-wi angelenu loaeme einu na-pange pane yoka pao-alapape. Go rupa angelenumiri wenaali Gode repara kou wala eiri pope ei komea ma-pala pilia. 17Gurupa angelenuri ande koae reerenumi ande do yongale napada ei mandana. Gurupa angelenu walo alapape ali laapore Aimenasi pange Pailidasi laapo. 18Go rupa ali laapomere mo ora angele wanduaoma pane pepe. Niipumiri naare ambalande wala komala ei minyapalaoma rekamande loaepe. Yesu epelea dinare naare pena do yongale naa epa gilia loaepe. Go rupa angelenumiri mendane alinuna kone rulada ei ma-koyao-aya. 19Go peapare Godeme puri pale pingi komea ambala ma-nongopelea eiri ambia ora paya. Go pingina wape peme eimiri go lea,
Realimiri nipuna wenaali aeme repaare nipuna kone wia.
Gupuma gupi ora lo pea,
Realina bi loaeme alinumiri pa aunu pimi einu repara
kou walena lea.
20Andaa anda menda parare golo pange silipa laapome wari disinu pange suaya. Gupuma repaname wari einu pange sumi wari einu ora su pea. Go ale mendaparenuri ora angaa ae aunu pape ei. Gupuma mendaparere pa pupudengi nape ei. 21Gurupa mandare ali mendame nipuna ambala pi einu giaoma nipu epe rupa aliandare gore nipuri monde angaa aya au pulameyanda muaeme disi mandana. Gupuma nipuna andaa alina ora epe pupudengi nala pulame lele puma alia. 22Naare raayo pena pena nongo nakinuna kone para ipula aunu epapana wanduala pape. Gupuma neemere ora epe rupa ari pula ei pange kone rulada ei pange pu ada ei para kuma pia ei mo yaakopi pu romba ae wenaali rapu Gode repara waisala pape.
23Go einare mo kone na-wi kealinumi pakama dame angelenuri neeme na-pange giape. Go eiri neeme kone wili, go rupa angelenuri ape yanda ma-pao-aya.
24Godena pupudengi nada alimiri ape yandanu na-pala pilia. Nipuri alinu raayo para ora epe aunu pualia. Gupuma nipuri ora epe rupa waloaya ali alia. 25Gupuma nipumi ora epe aunu pula ara mo angele wi einu runguluaeme alinu para mana waru lala pilia. Go aunu ora pala piliandare gore Godeme mo alinu waru rambameala pilia. Pa marea gupilimindare gore nimumi pu lekeyoma ora angele ora milimi. 26Ambala ririnare nimuri Sadanina angona nuna maidapa siame. Gupuma nimumi Sadanina angele waru pangoma pala pame. Go peapare ora angelena ree nimuminda milimindare gore nimuna konenu epe rupa lombelea. Gupuma nimumi go koae remona konana na-releme.
Currently Selected:
2 Dimodi 2: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
