2 Dimodi 1
1
1Niri Polo, Godena rana pi eina aposolo ali ayo. Gode nipuna wili mandaa misaya endoaya ei Yesu Keriso repara naame ambala mema eina angele lanoya rapaya. 2Dimodi, neere ora nina nakie, go eina neme nee para go ramayo wape pie. Gode naana Apame pange Yesu Keriso, naana Reali nipumi nee para pakama yarame komala ei pange kuma pi ei ginyae.
Ranae angele lea ei pange pu kana ma-yariae angele lea ei
3Nina kasuanumi pange ambala ririna Godena kou nane raluaisimiya. Ambia ni pange gurupa ralialoe. Nina koneme pange go auri ora au pi kone sialo. Gupuma nina yainya pe eiri rimbala pange naarena, nee para kone siala ara, Gode repara ranae angele lalo ara yainya puayo. 4Ambalande nena ree pange lopisande ei kone pa sialo eimi nee andawe kone sialo. Neenda andolandare gore ni raname waru komola.
5Nina konemere nena kone rulale eiri, ora epe rupa rulale kone sialo. Go kone rulale eiri ambala nena aya Loisi pange nena ama Yinisi laapome kone rulape rupa. Go einare neme kone sialopare neeme pange go kone rulale. 6Ande neme nena kaluna ki siawande dina Godeme nee repara gea ale ma-alupali, waru andere-ape. 7Go einare Godena Sipiridimi pakama gealere neeme wenaali paalame komainyaya na-gea. Go ei gea eiri nee puri ma-palao pange wenaali pu alo pange kone waru ma-siao puma wenaali rapu raname komala painyaya pea. 8Go einare neeme naana Realina angele walade eina yalame na-komape. Gupuma pange neeme ni para yalame na-komape. Niri Polo, nipu mana dipula pili. Neeme Godena puri mumare neme pi rupa Godena epe angele lape eina kenda riapana. 9Godeme naa ambala wi loma rambamea einare naare nipuna wenaali aema. Gode nipumi naa wi lea eiri naame epe aunu menda pemanda naa na-wi lea. Ora dia. Nipumi naa para pakama yarame komea eimi wi lea. Go pisaya eiri ambalande go su yaa ambe na-wari ara naa Yesu Keriso rupara go pakama yarame komea ei gisaya. 10Go eina ambia go naarena Yesu Keriso naa rambamuaya ali epea eimiri Godena pakama yarame komea eiri penameyao walea. Komoaya eina puri lu rambuaomare ande Godena angelemere na-kome pa-ari puaya endoaya eiri penameyao walea. 11Gupuma nipumi niri go epe angele pupudengi nanoya muma ma-maya. Go eina ambia niri mo epe angele walado ali ayo. Gupuma niri nipuna angele ma-pamuado ali ayo. 12Go eina reenare neme go kenda rialo. Go peapare neme go eina yalame na-komoayo. Ora dia. Neme go kone rulawa ayo aliri neme waru ande. Gupuma neme kone wi. Nipumi go na ki para ma-wia pupudengiri mandana epe rupa nari puama puma mo naare epelea dinare peredea.
13Gupuma neme walawande go ora angelenuri neeme andoma raliala painya pawandele ora waru ripinyu siambape. Gupuma ande kone rulaya ei para pu ada ei laapore Yesu Keriso ruparare nana eiyale waru alala pape. 14Go einare Godeme nena ki para gunelealere neeme ora epe rupa andere-ainyaya geale neeme ora waru andere-ape. Gupuma mo Yaakopi Sipiridi ande naa rupara pia eimiri nee go au painyaya rambamilia.
15Go einare neeme kone wili. Mo Pesalasi pange Emosonisi pange mo Esia anda alinu raayome ni giala puamende eiri. 16Realimi mo Onesiporasi pange nipuna repaasi repara Realimi yarame komenaya yainya pado. Naare raayona Onesiporasimi ni waru rambamuaripa. Nipumi ni dipula pirawa eina yalame na-komalapa.
17Gupumare go ali nipuri mo Romo dauni para ipuma ni waru epa pamu aisapu piruma pupudengi waru epa naya. Gupuma werepe nane nipumi ni epa andaisia.
18Reali nipuna wala epelea naarena go ali repara yara anda eimi waru komenaya Reali repara yainya pao-ayo. Onesiporasimi mo Epesusi anda para ni rambamealapande eiri neeme pange ambala kone wili.
Currently Selected:
2 Dimodi 1: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
