2 Dimodi 3
3
Su yaa pereda pea naarena koae einu waru epelea
1Go eina neeme go einu kone go rupa siape. Werepena olemole raayo peredea naarena kendapi einu waru andapu epelea. 2Gupumare mo wenaalinumiri nimu repara komea rana waru komo pange muni andapu siawe kone wilimi pange nimuna do waru wani wanino pilimi. Gupuma ranae angele na-lo pange ara anginuna angele panda lia lia pulu ara Godena angele para pange ero lala pala pilimi. Gupuma ande epe yaakopi aunu kou wademe. 3Gupuma nimumi koae enda no pange rendaa rendaa pu pange yayapi angelenu waru lo pange yangona angele waru lao puma mo epepe aunu pimi wenaali rapuri yanda dimi.
4Gupuma nimuna yangonu pange mo yanda runguli alinuna ki para ma-alala pilimi. Gupula ara nimuna kone suma koae einu pulamere ora wangepu ma-rekala pilimi. Gupuma nimunale nimuri andaa ali aeme kone waru wilimi. Gupuma nimumi suna aunu repara ora raname waru komala arare Gode gipia deme. 5Gupuma nimumi Godena aunu ora rupa na-ripinili mandaa yongaleme komea Gode repara rana komala ara kou wademe. Gupilimi alinu rapu nee na-ae pane giala pope.
6Gurupa alinu menda parare pawasi mendana anda paranu pua konda pamboma wenanu nimuna koae koae aunu peme einumi puri na-pale wenanu ma-bembolaoma nimuna aunu mongerialimi. 7Go aunu pi wenanumi Godena angele mulame naare raayo rapo ala pemepare nimumi ora mo endo-ae epe angelena reenu ora meape-na-ya. 8Ambaisena Dianesi para Diambirisi laapome Mosesi para yanda luaisipiya. Go rupare ambia go aeme alinumi mo epe endo-ae angele para yanda waru dimi. Go peme eimiri nimuna kone rulame einu pange ora payapo aunu peme. Ora kone nimumi na-wimi. 9Go puamepare nimuna go pimi aunu ora na-andadea. Ora dia. Nimuna keyali au pimi eiri ambuname andeleme. Ande Diambirisi para Dianesi laapona keyali aunu andisimiya rupa ambuname andeleme.
Neeme Godena angele waru siamba ape
10Go peapare neeme kone ora wili. Neere ambalande ni rapu pamuala ara neme mo alinu para walawande angelere neeme kone waru wili. Gupuma neeme nina pora pamuayo einu kone waru wili. Nina aunu raayona ree neeme kone ora wili. Neme Gode para puri paloma ara kone rularipu eiri neeme kone wili. Naare raayona neme nina pu puri ma-palaoma ara pupudengi nawa eiri kone wili. Neme mo wenaalinu repara pu waru alala pawa. Gupuma kendapi ei waru puri paloma rurumbala pawa. 11Mo alinumi ni para koae aunu peme einu pange neeme kone wili. Mo Andioko Aikoniame Lisida daoni paranu ara neme kenda andapu muaripu eiri neeme kone wili. Go einare mo alinumi ni para geme kendapi einu raayo ruayo eiri neeme kone suale. Go peapare Realimi go einu rupara ni waru rambamuaya. 12Go pula arare Yesu Keriso rapu ara epe aunu pilimi wenaalinu pange yanda lu pilimi. 13Gupuma mo koae alinumi pange mo pereke pereke angele loaeme alinumi pange wenaalinu waru makiralimi. Gupilimipare Sadanimiri nimu pange makirala pilia. Gupuma nimuna aunuri ora kodea. 14Go peapare neemere ambalande pangoma kone rularipinde angelere puri waru paloma siamba ape. Go einare naame nee mongeriarima wenaaliri nee kone waru wili. 15Neeme go ei pange kone wili. Neere enge nakisi aripi dinare mo Godena angele wia buka yarepe ala pisinde. Go bukamere nee epe kone ma-sialia. Gupuma neeme Yesu Keriso para kone waru rulalie. Gupilindare Godeme nee wala milia. 16Godena epe Yaakopi Sipiridi mo Godena angelenu wape peme alinu repara kone alala-ainyaloma walala puaeme. Go ora epe angelemere naa para epe konenu ma-sialia, pange gupuma naana koae einu penameyao waloaya pange naana aema einu ma-rendepoyao waloaya. Gupuma epe aunu naa para kone ma-siao-aya. 17Go aunu pea eimiri naare puri pale Godena wenaalinu ma-aya. Gupuma naame ora epe aunu pula ara pupudengi manda nape wenaali aema.
Currently Selected:
2 Dimodi 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
