1 Dimodi 6
6
Pupudengi noaeme alinuna angele wi ei
1Pakama pupudengi neme alinu raayome kone sula peme rupare go, Nina andere-aya kalu aliri ora epeleanda nipuna bi ma-minyasialua deme. Go au pilimindare gore mo andere-aya kalu alinumi Gode pange Keriso wenaalinumi waloaeme angelenu para pange koae angelenu na-deme. 2Mo pupudengi noaeme alinu andere-aya kalu aliri Keriso ali deandare gore nipuna ameyalo ara nipumi ale menda na-dea loma gimi na-komalepape. Go au na-piri neeme nalua pupudengimiri na amena au pado kone siala ara pala pipape.
Pereke pereke angele walea einu pange ora amo alenu meape eina angele lea ei
3-4Go einare neeme mo wenaalinu para go aunu raayo waru mongeriaoma walala pape. Naana Reali Yesu Kerisona angelemere Godena aunu naa repara ora epe rupa mongeriaya. Go peapare ali mendame go angelenu wia rupa na-wale pa nipuna kone rupara epelea einu wadeandare gore naame kone wilima. Go aliri payapo da kone wilima. Gupuma nipu ale menda kone na-wia. Nipumiri yangonu rapu ape ma-lada ei pange manda manda ma-meada ei pange yangonumi epe aunu menda pemenda rono pangala aunu pange raayo andelea. Gurupa aunuri nimuna konenu rendepona na-piri alinumi puaeme. Gupuma nimumi ora ree na-siamba-aeme. 5Gupuma naare raayosi pa rono kama pange lea. Gupuma ora angelena ree waru na-siambalia. Gupuma Godena aunuri gore suna amo alenu meape eina pora kone suaeme.
6Go eiri ora angele. Neere amo ali ape eina kone sualepae. Neere naare raayosi raname kama komoma Godena aunu pulu ara epe rupanunda alindare gore neere ambala amo ali go alere. 7Go eiri naame kone wima. Naana amame naa mandea dinare, naame go suna ipula ara alenda menda na-minyapale epama. Go eina naa komelemanda pange naame ale menda na-ma-pelema. 8Go einare naa repara akanu pange nape endanu wiliandare, gore go eiri manda kone siape.
9Go einare ali nipu amo ali alua kone wilia einumi gole la andala ei ipuma nipu konana rasuma kodea.
10Akepeare muni repara wee pambada eiri koae koae aunu raayosina ree. Mendane alinuri muni meawe kone wimi eimi nimuna Keriso aunu giaoma puaeme. Go eimiri nimu pu kole repaanu ala puaeme.
Kone para ape eina mana le ei
11Go einare neere Godena ali alendare, gore neeme go einu raayo giaoma panane wanduaoma pope. Gupuma neeme ora epe aunu komea pape pange ora Godena aunu komea puape. Go eiri kone rulaoma ape. Gupula ara yangonu para pu waru alape pange kenda pi einu ipulu-ainya pa rurumba eiri pula aunu pange mo alinu nimu para ora kuma pi aunu pipape. 12Yesu repara kone rulaya aliri riri arere pulu ara angiralinali pi ei manda. Go einare neeme go angiralinali pimi eina epe rupa puri paloma alo pope. Endoaya ei waru puri paloma ripina pope. Godemere ambalande go endoaya ei mea eina yanda wilisande. Gupuma nena kone rulale ei wenaali ambunana lee rona ambala laende. 13Godemere alenda alenda raayo para endoaya ei alo aya. Go einare Yesu Kerisomere kundiri na-pi mo gapamanina kalu ali Pondiasi Pailadi para penameyao lala ara ora angele la alisaya. Go eina go Godena lee wilina pange Yesu Kerisona lee wilina ara go pupudenginu raayo nale pape loma neme nee para gurupa laloe. 14Go einare Godena angele waru walala pape. Go au pilindare gore alinumi nee repara ale menda na-deme. Gurupa airi pa puma naana Reali Yesu Keriso wala epena. 15Godeme nipuna naare rombonu ambala wia. Go naarenare Godeme Yesu Keriso penameyao epena dea. Go einare Gode nipuri raname komoaya eina ree aya. Nipu komeare ora puri andaai palea eina ree aya. Nipuri mo kini alinuna Kini aya, pange mo andaa alinuna Andaa ali aya.
16Nipu komeare ora komape-na-ya. Nipuri ora paa andaai pea lena aya. Nipu aya parare repara pope-na-ya. Nipuri ambaisena ali mendame ora na-andisaya. Gupuma ali mendame ora repara puma pua andape-na-ya. Go au pea eimiri bi andaai puri pale eiri naare raayona ora pa sualia. Ora ae.
Amo alinuna angele wia ei
17Go suna alenda alenda raayo waru wimi alinu para go angele dapape. Pamba na-pi aunu na-pualepape. Nimimi go suna wangepu koda pea lenu para kone na-rulalepape, ora dia. Wala Gode para kone rulalepape. Gode nipumiri naana pu para rana ma-komape olemolenu raayo pakama naa para gilia.
18Go einare alenda alenda raayo waru wimi alinu para dapape. Nimumi epe aunu komea puainya. Gupuma nimumi go eina raname waru komena. Nimuna alenu rali rali puma diadea wenaali alala pina. 19Gupuma pilimindare, gore werepe nimu rambameape ale pingi mandana nongopedema. Go einare nimumi endoaya ei ora anana milimie.
Nena pupudengi nale ei epe rupa andere-ape
20Dimodio, Godeme nee para gea pupudengi waru andere-ape. Go einare mo pakama angelenu Godena aunu na-rali angelenuri giape. Olemole waru andala eina ree loma angele deme eiri giape. Gurupa angelenu lee repaare Godena aunu repara yanda dia alinu. 21Ali menda parame lalore, Naamere kone waru suma au raayo andema deme, go lala ara mo ora angelenuna reenuri na-meme. Go eina Godena yarame komala ei nimi repara epenae.
Currently Selected:
1 Dimodi 6: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
