2 Pida 2
2
Yayapi poropedi alinumi loaeme payapo angele
1Ambalande wenaali angalapuna yayapi poropedi alinu waru oposiaisimiya. Go ei mandare ambia pangere yayapi angele loaeme alinu pange nimina runane oposiao pilimi. Nimumi wenaali ma-koyape yayapi angele deme. Ande Realimi nipuna weeme kambo mea ei kone na-wilimi. Nimumi go au pilimi eimi nimu ora kodeme. 2Keriso wenaali andapu nimuna koae koae one mone aunu raidimi. Nimumi go au pilimi eimi Godena angele ande rendepona aunu wada ei wala koae angele lala pilimi.
3Go yayapi angele waloaeme repaare pa mendana alenu pange kipanangenainya pao-aeme. Go repaame nimina mena sekerenu makirao muaeme. Gode u na-paluaya. Ambalande gole nimu ma-koyape ale analao wia. 4Ambalande ande eindiolo alinumi koae aunu pisimiyandare Godeme pa na-giaripaya. Nimu rimbayo pambe neka para andi siamba pia. Go repaame mo wenaali rali pula pea naare maisambao-aeme.
5Ambala aisimiya wenaalimi mendapareme pange Gode kou walisimiya. Go repaa pange Godeme pa na-giaisaya. Nipumi ipa andaai rapaisaya eimi go wenaali ma-koyaisaya. Go pameyapare Noamere ora rendepona aunu kama waloaisaya. Godemere Noa pange mendane ki pereyoma mendane kina laapo wenaali rambamisaya. 6Gomora pange Sodomo laapore Godeme ma-koyaripaya. Go anda laapore ora andaa anda laapo kiruma danga reponu komea wisaya. Nimuna pisimiya koae einuna yangi misimiya. Go eiri werepe Gode repara kou wadea repaame nimu repara pula pe ei loma andena yanda pisaya. 7Lodere ora rendepona au puaisaya aliyalore na-koyaisaya. Nipumi wenaalimi ali pake pange wena pake waru noaisimiyanda pu kendame waru komisaya. 8Go rendepona ali nipuri nimuna angalapu para ao-aisaya. Go au puma mo wenaali nimuna loaisimiya koae angelenu pango pange pisimiya aunu ando pisaya. Go repaana aunu andoma nipumi kendame waru komoaisaya. 9Go repaa para pisaya ei andomare gupi laminya. Godeme nipu raluaeme alinu rendaa pi einu ipula einumi nimu ma-koyapanaya rambamilia. Gupuma mo koae aunu puaeme wenaalinuri rendaa pi eina pa alimi. Gurupa pa ainya mo wenaali rali pia di opopalia. 10Mendane repaare ora rendaa andaai milimi. Nimuna dome kodo pi aunu raname komala aunu pilimi repaa pange Gode nipuna andere pia ei kou naneyalimi repaa pange rendaa ora andaaina alimi. Go yayapi angele waloaeme repaame yalame pange na-komeleme pange so yaa nane epeleme repaa pange na alinu go epamena kone na-wilimi. Go au na-piri pa manda manda mealimi. 11So yaa nane aeme eindiolo alinuri puri waru paleme. Go pemepare nimumi go alinu para Godena lee rona ero lala na-peme. 12Go alinu nimuri kone na-wi yari sayalenu manda. Nimumi dona rana pea einu komea raluaeme. Nimu go suna epe auri kodoameyanda ipisimiya. Nimu kone na-wi alenu reparare koae angelenu kama loaeme. Yari sayalenuri koyo-aeme. Gurupa mandare go repaa pangere go au pilimi. 13Nimumi koae koae aunu one mone aunu raayo peme. Go repaame mendane repaa rendaa alemendare Godeme nimu pange rendaa adea. Nimuna rana pi ei mi auri naarena ara nimuna dome rana pi au puaeme eimi muaeme. Keriso wenaali nimina menda para mombema enda noaeme para epa mombema piruaeme. Go peapare nimuna peme aunuri ora yala pi aunu puaeme. Nimi makirademe aunuri nimumi raname komoaeme. 14Nimuna leenumi koae aunu kama puluameyandare wenanu kama andeme. Nimumi koae aunu pape ei ora na-gialimi. Nimumi puri na-paleme repaa koae aunu pinyayanda yolo-aeme. Menda mendana alenuna wee pambademe einare ora waru andeme. Godeme go repaa ora ma-koyalia.
15Nimumi ande rendepona au pia auri kou wademe. Go peme eimi nimu keyari pamualo ara pape aunu peme. Nimuri ande Biona si Balameme muni mulameyanda koae aunu pisaya ei manda. 16Dongi menanuri angele na-lemepare go naarenare dongi mena mendame Balame para angele ora rono pange ei menda lisaya. Go dongi mename go au pisaya eimi mo nipuna pulame paya koae aunu ora giaisaya.
17Go alinuri ande pupulu piri ipa kapulea ei manda pange koaa epa widapare ande pokikimi ma-rumbala ei manda. Go repaa nimuna andare ambala Godeme rimbayo pambe para ambala waru siaya. 18Go repaa nimumi andainya angelenu pange one mone angelenu raayo waru loaeme. Nimumi ande dona raname komaleme alenumi mendane repaa yolo aeme. Go au peme eimiri ande mendane repaa nimuna koae einu minyapalaoma epe porana polameyanda peme repaana ange yolo aeme. Gupuma wala nimu ralina leme. 19Go repaamere gupi angele loaeme. Nimiri ale mendame na-andia loaeme. Go lemeparere nimuri nimuna peme aunumi pange pamualeme poranumi pange dame angelenumi gole nimu ma-andiliandare dipula pimi. Akepeare go eina. Ali menda nipuna pili aunumi ma-andidiandare nipu go alenumi dipula mea. 20Nimuri Yesu Kerisore naana Reali pange naana Rambami lore ambala kone wimi. Go kone sumare go suna koae koae aunu repara kou waleme. Go pemepare nimu wala go koae aunu repara wala lekeya pelemendare gore nimu go au pilimi. Ririnare koae rupa arimindepare werepere ora koae eina ree andeleme. 21Go repaame monde rendepona pora wia ei kone na-sula pameyalore ora epeda pa. Akepeare nimumi ambia go yaakopi pora kone sumayapare golere wala kou waleme. 22Go nimuna pimi auri gore angele menda ora leme ei manda. Go angelere gurupa. Yaname ande nipuna ralu wida maku wala pua nala ei pange mename ipa randepema ara gole wala monde peke para wala pua lopala ei manda.
Currently Selected:
2 Pida 2: POLENT23
Highlight
Share
Compare
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
