2 Pida 1
1
1Go ramayore ni Saimono Pidame wape pi. Niri Yesuna pupudengi nao-ae ali pange nipuna aposolo ali ayo. Go ramayo rapae auri ande naame kone rulaema rupa kone rulaeme repaa repara rapado. Nimumi go au pe auri ande ora rendepona aunu puaya Gode pange naana Rambami Yesu Keriso laapona rupara go au peme. 2Ambiare Yesu Keriso naana Reali pange Apa Gode laapo apo kone wiminda. Go eina ruparare pakama yarame komala ei pange kuma pi ei nimi para epena.
Naare Gode nipuna ambala mu diaya
3Yesu Keriso nipuri ora Godena puri wia. Gupuma nipuna purimiri naa endoma naana Keriso aunu ora puri palomonoya olemole raayo guaya. Go au pumunayandare nipuna aunu ora waru kone siamono lea. Nipuna paa pi einu pange nipuna epe aunu naame mendaa para andomona lea. 4Go pea eimiri naa ora ririna alenu ora epepe alenu pakama gea. Go alenuri ande gula loma wili mandaa misaya alenu. Naana dome raname komea alenumi naa go suna aemanda naa ora ma-koyaripa. Go peapare Godeme go gea epepe alenumiri nimi rambamea. Go pea eimiri nimi na-ma-koyalia. Gupuma nimimi Godena aunu ora raidimi. 5Nimi go einu kone sialepape. Nimi ora epepe aunu pulame kone sialepape. Gupuma nimina kone rulaeme ei rapu ralalepape. Nimina andeme einuri nimina epepe aunu peme einu rapu ralalepape.
6Nimina dome raname komea ei waru andere-alepape. Gupuma kendapi ei rida ei waru pipape pange Godena rana pi rupa ao-paidapape. 7Gupuma Keriso yangonu repara raname komala au pualepape. Gupumare wenaali raayore pu alo alepape. 8Yesu Keriso naana Reali nimi ambala kone wimi. Go aunu nimina runane rumbialumbeleandare gore nimina andeme ei pa na-alu pilia. Nimina andeme ei ora kili waru edea. 9Ali menda nipuna runane go aunu na-wiliandare gore nipuri olemolenu waru na-andelea. Gupuma nipumi papare wilia alenu pange na-andelea. Ande nipuna koae einuna kodo pi einu Godeme ambala mu paisiande einu kone rungulalia.
10Amenuo, Godeme nimi ambala wi lea. Gupuma nipumi nimiri nipuna ei loma ambala rekena wia. Go einare go nimi wi lea puluri puri paloma alepape. Go au pilimindare gore ale mendame nimi na-ma-lopalia.
11Nimi go einu raidimindare gore ande Godena andasu para pa airi puala peme poranu wilia. Go andasuri Yesu Keriso naana Reali pange naana Rambami nipuna ei.
12Orae, go aunuri nimi ambala kone wimi. Gupuma Godena angelere nimi ambala meme. Go eina mandare nimi puri paloma aeme. Go peapare naare raayo nimi wala la giala pulua. Go einu kone pa sialiminyayanda go au pulua. 13Ni na-kome pa arare nimi kone wala ma-siala pulua. 14Ni kone wipare reesi para ni komoloa kone sialo. Go eiri ande Yesu Kerisome ni la gia rupa pilia. 15Ni komoma pono pange go aunu pa paa pu alapeme poranu pi siaoma poloa.
Naame Godena paa Kerisona rupara pia ei andama
16Reali Yesu Kerisona puri pale eiri naame nimi ambala la giamande. Gupuma nipu wala epelea lopamande. Naame pa ma-aoma yayapi angele na-lamande. Dia. Godena paa nipumi mea ei naame andama. Go eina dama. 17Ande Gode Apame Yesuna bi minyasiaya auri naa pange amonoloma pisa. So yaa nane aoma Godeme lalore, Gore neere ora nina raname ora waru komea Nakie, lisa. Gupuma nina pumi nee para raname waru komaloae, lisa. 18Naame Yesu rapu ande Godena kana rumu mandaa piri go angele so yaa nane epa ei pangama.
19Go einare naame ande poropedi alinumi lisimiya angelenuna kone waru rilao-aema. Nimi pange nimuna angele waru siamba alimindare epedea. Go poropedi alinuna angelere ande rimbale para lamepa manda. Go paa pa pari puma ande Kerisona paa yapi lena aya kumba danga manda nimina pu para relea dinare gore peredea. 20Go peapare nimi go ei ambala kone sialepape. Naame naana kone para epele eimi ande poropedi alinuna ree angelenu Godena angele wia bukana wi angelenu go eiri go eina lealo naana gole na-lala paminya. 21Akepeare ambalande poropedi alinumi lisimiya angelere nimuna kone para epaya ei na-lisimiya. Go alinuri go angele lenayare Epe Yaakopi Sipiridimi nimuna angaa kambulu para aisaya. Go Epe Yaakopi Sipiridimi go au pulu-ainyaloma mo alinumi angele lisimiya.
Currently Selected:
2 Pida 1: POLENT23
Highlight
Share
Compare
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
