2 Korindi 3
3
Pena angele lo koro wi ei
1Mendane wenaalimiri naana bi minyasiada ara dama kone wilimi. Aponde wape pawa ramayore go au pe loma na-pe. Naare mendane wenaali manda dia. Naare pena epe ali menda dia. Go einare go aliri gurupa ali lo mendame angele na-dea. 2Naame naana bi minyasiape ramayore nimi komea. Gupuma go ramayona wape pe angelena naana pu rupara wape peme. Wenaali ambuname go ramayo kone wimi. Gupuma nimumi yarepe aeme. 3Nimiri Yesu repara epe ramayo manda pename alena aeme. Naana pupudengi nalema eina ruparare Yesumi go ramayo wape pea. Go eiri pename na-wape peapare Godena Yaakopi Sipiridimi wape pea. Nipumi kana manda na-wape pea. Dia. Naana pu runane wape pea.
4Go angele reere gurupa. Yesumi naana kone rulaema ei ma-siaya. Go eina naame Gode repara kone rulao-aema. Go einare gupi loaema. 5Ora, naa golere go pupudenginu nalore ana na-pea. Go einayandare naame lalore ale menda naana pama angele menda na-dema. Godeme komea go pupudenginu namonoya naa puri guaya laminya. 6Nipuna gole naa ana ma-paya. Go eimiri naare ande pena angele lo kora wia eina pupudengi nao-aema. Go pena angelere ande rudule angeleme lea ei menda diae. Go angelere ande Yaakopi Sipiridina ei. Ande rudule angeleme wenaali lu komao-ayapare Godena Yaakopi Sipiridiri wenaali repara endoaya ei aloaya.
7-8Go Rudule Angele Godeme kana mandaa warisaya. Go eimiri go Rudule Angelemere wenaali ma-komao-aya. Go peapare go auri Godena paa pi ei rapu ara pisaya. Go eimiri Mosesimi monde Rudule Angele ma-epaya dinare nipuna lee angaa ora paa pu pa paisaya. Go eimiri monde Isaraeli wenaalimi nipuna lee para andape ora rendaa pisaya. Werepe go paa perelisaya. Go peapare ande Yaakopi Sipiridina angele lo koro wisaya dina pisaya paamere go paa pange lu rambuaisaya. 9Ande komala ei ma-epaya ale rapu Godena paa pi ei wiliandare gore ande endoaya ei ma-ipula eimiri ora paa andaai pilia. 10Go einare go Rudule Angelemere ambala paa pi ei meande. Go peapare ambiare dia. Akepeare go ambia pena angelemere go ei ora lu rambuaya. Gupuma nipu para ora paa pi ei andaai ora wia. 11Pa gonde riambo sulapa Rudule Angelena rupara gole paa wisayandare ambia pa go suari pola pea angelenare paa ora andaai wilia.
12Naame go angelena kone rulaema eimiri naame Godena angele paala paalame na-kome walao-aema.
13Ande Mosesiri ande nipuna lee angaana pisaya paa pereyama pereyama pisaya ei wenaalimi andelemeya akame nipuna lee angaa kea puaisaya. Naare nipu manda dia. 14Go peapare nimuna konenuri ora pora poaya. Go einare monde ambalande angele la wi ei yarepelemendare go akame nimuna konenu pa pombaeya. Ambia pange pa wiapare na-mu rumbeme. Yesuna rupara Godeme go aka rungili mu pao-aya.
15Ande Mosesimi alisaya Rudule Angele yarepe aeme dinare nimuna konenu paa pombao-aya. 16Go peapare menda apimi Reali Yesu repara pu lekedeandare gore nipumi go aka kuni pane mu palia. 17Go eina ambia go angele rupara Reali dama eiri ande Yaakopi Sipiridi para dama. Go einare go Realina Yaakopi Sipiridi pidia alenu parare go Rudule eimi menda ali na-dipula milia.
18Go einare naa raayo ambia ale mendame naana lee angaa na-keapea. Go einare Realina paa pi ei naa repara epea. Go puma go paamere naa wala Yesu nipu mandana ma-au lama lama puaya.
Currently Selected:
2 Korindi 3: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
