2 Korindi 2
2
1Go einare nimi yara ma-papeya wala na-epola kone siawa. 2Neme niminya anda kimisu epolandare nimi yarame ma-komalua. Nimi raayo pu kendame komala ara ni rana ma-palapa ali menda na-alapa. 3Go einayanda nimi repara aponde ramayo raparipu. Nimi repara na epe auri go eina pawa. Ande ni rana ma-palapame repaa nimi wala ni yara ma-palimiya pawa. Akepeare nina kone sialopare raname komoayo naarenare nimi raayo pange raname komeme.
4Neme nimi repara ramayo raparipu eiri ni pu kendame ora waru komala piri gole wape pawa. Neme nimi para ramayo rapayo auri nimi kendame komaliminaya na-pawa. Neme ramayo rapayo auri nimi repara pu ge ae lalo ara wape pawa.
Polome nipu repara koae au pisaya ali repara angele menda na-lisaya ei
5Ali mendame mendanda pu kendame ma-komaliandare nipumi ni repara na-papare nimi raayo para pa. Neme go lalo eiri nipu ora kenda ma-alapeya lalo. 6Nimi raayome go eimi gole go ali anana rendaa alamende. 7Go peapare ambiare nimimi pu rana ma-pao-alepape. Gupuma nipumi pa aunu repara kone na-sialepape. Go au pi auri nipumi pu kendame komoma naa rapu runae ei giapanaya lalo. 8Neme nimi repara ora konge yalole nipu ora nimimi rana komeme lo wadapape. 9Neme aponde ramayo rapae auri ande monde la andala ei manda wandualimipae loma andolameyanda pawa pange nimimi nina angelenuri ora pangoma pilimipae kone suma pawa. 10Mendame nimi repara koae aunu menda pinya loma ale menda na-demendare gore neme pange go au pulua. Go einare koae au pinya gole neme ale menda repara kone na-sula. Yesuna lee angaanare ora go au puayo. 11Neme go au puayo eiri. Sadanimi naa makiraoma naa lu angulapanayanda pawa. Nipuna konenuri naame kone ambala wima.
Roasi anda para Polo pa riambo aisaya ei
12Ni ande Roasi anda para opopaoma Yesuna angele lalua pawa dinare Godeme go anda para nina pora piaripa. 13Go papare ni kendame ora waru komawa. Go au pi auri nana ame Daidasi na-andoa go pawa. Go einare ni go para arimiya repaa paidapape loma Masedonia andasu para puawa.
Godena purimi naame yanda wanduao-aema
14Go peapare ambiare Godeme naa rambamuayanda ranae angele lalo. Yesuna purimi naame yanda lu angulaema. Naame pima eina ruparare Godeme angele loaya. Go eimiri wenaalimi Yesuna angele pangoaeme. Go eiri gore ande epe roropo lomboma alenda alenda para raayosi pula rupa.
15Naare ande epe roropo piale Yesu para ipuma Gode para pula rupa. Go roropore ande epeni nane pula porana runa aeme repaa pange repana rala para pula porana runa aeme repaa para pange puaya. 16Mo repana para rape porana aeme repaa reparare gore go roropomere komala ei ma-epaoaya. Gupuma monde epeni nane pope porana aeme repaa reparare go roropome endoaya ei aloaya. Go pupudengiri ora mandana apimi noaliapae. 17Go peapare nimi kone wimi. Naare mo ali andapumi peme au na-pema. Nimumi monde Godena angelere bisinisi au manda puaeme. Diama. Naamere ora rendepona porana puaema. Godeme naa rapayandare naame go aunu pulu ara Keriso nipuna pupudengi nao-aema.
Currently Selected:
2 Korindi 2: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
