2 Korindi 4
4
Wenaali puri pange Godena puri
1Go einare Gode nipumi pakama yarame komea eimiri go pupudengi namona lea. Go einare naame gimi na-komoaema. 2Dia, naame go yala meape aunu pange kundiripu ara pi aunu raayo kou walema. Naare yayapi aunu rupara na-ao-palema. Gupuma naame Godena angele na-ropo puaema. Naare ora angele penameyao kama loaema eiri wenaalinumi nimuna runane pename andenayanda go au pema. Gupuma naame nalema pupudengi Godena lee rona penameyao andena. 3Go naame waloaema angele wenaalimi kone na-wilimindare gore mo angele na-meme repaame komea kone na-wilimi. Go repaare alu pilimi. 4Go angele na-meme wenaali nimuri yayapi gode Sadanimi nimu ma-mamarao-aya. Go einare ande Yesu Kerisona pakama yarame komea eina angelere nimuna runane na-wilia. Gupuma nimumi Yesu kone na-wimi. Nipuri Gode manda. 5Naame naana angelenu gole na-lao-aema. Dia, naare gupi loaema. Yesu Keriso naana Reali loaema. Naare Yesuna angele raluma nimina pupudengi nao-ae alinu ao-aema. 6Ambalande Godeme go su yaa wapualo arare gupi lisaya. Rimbale eina ruparare paa openae, lisaya. Go mendaa Godemere go paa naana runane ma-epaya. Go paamere Godena paa pi puri ma-andaya. Go paare Yesuna rupara epea.
7Go Godena angele lae auri ora andaa ale menda. Naana donuri puri na-paleapare gole go angele naana rupara pia. Go eiri go puriri naana ei diayapare Gode repara ipulalo wenaalimi andenaya pea. 8Naare raayosi naa kenda muaema. Go peapare go eimi naa na-ma-pereyao-aya. Koro mendamere naana konenu ma-marao-ayapare ora na-koyoaya. 9Yanda runguli wenaali waru aeme. Go peapare Godere naa rapu aya. Naa lu lopao-aemepare naa ora na-koyoaema. 10Naare raayo Yesu Kerisona komea ei naana do para mea pamema. Go einare Yesu pa endoma aya ei naana do para wenaalimi pename andena. 11Naare Keriso pupudengi nao-aemendare wenaalimi naa lu komaluame rapoaeme. Go einare Yesu pa endoma aya ei naana do para wenaalimi pename andeleme. 12Naame rendaa muaema eiri nimi endoaya ei mealiminyayanda puaema.
13Ande Godena angele wia bukamere gupi lea.
Ni Gode repara kone rulayo einare
neme la eiri pamuayo.
Naa pange kone rulaema einare gore la eiri pamuaema.
14Godeme Keriso ma-rekaisaya eiri naame ambala kone wima. Gurupa naa pange Yesu rapu ma-rekalia. Gupuma nimi rapu naa pange nipu repara alima. 15Go alenu raayo nimi rambameape eina puaya. Werepe Godena yarame komea ei wenaali andapu repara rumbidia. Gupuma nimumi Gode repara ranae angele lalo ara nipuna bi minyasialimi.
Kone rulaya eina rupara ao-paliape ei
16Naame go ei kone suma naame Godena pupudenginu gimi na-komema. Naana dore ora kodea. Go eiri ora. Go peapare naana rupara pia remore naare raayo pa pena ei au loaya. 17Go naa repara ipula kendare pa onge ei. Gupuma pa riambo komea pia. Werepere so yaa nane epe rupa naare raayosi pirari pelema. Go werepe pirari pelema einuri ambia go kendanu lu rambuaya. 18Akepeare naame werepe epola pea aunu komea kone siaminya. Ambia go pia aunu repara kone na-siaminya. Ambia go pia aunuri pa riambo komea piapare werepe epola pea alenuri ora pa suari pelea.
Currently Selected:
2 Korindi 4: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
