2 Korindi 11
11
Polome pereke angele loaeme alinu rapu angele lea ei
1Nina ranare nimi repara neme keyali angelesi menda pa lano daminya kone sialo.
2Akepeare Godeme nimi waru wia pange ora kone suaya rupa mandare neme pange go au puayo. Inu mapua nipumiri nipu mulameyanda yapa su ma-pirada ali rapu komea werepe nipu nulapu adea dina komea paduameyandare menda rapu na-paluaya. Gurupa mandare nimimi pange Yesu komea maisambao pidapape. 3Ande wena Ipa para pisaya ei nimi para pilia kone sialo eimi ni pala ambala pia. Ande kerore lele waru ruaisaya eimiri Ipame koae au pisaya. Go pisaya rupa nimina konenu pange kodea. Go au pilia eimi nimimi ande Kerisona aunu ralu arimi ei wala minyapalalimi ae. 4Ni nimi ambala paala pia. Akepeare go eina lalo. Nimi repara mendane alinu ipulu ara Yesuna angele pa rando mendapi rupa laeme. Naame lamande rupa dia. Go alinu go angele pa lainya loaeme. Gupuma ande Godena angele pange Godena Yaakopi Sipiridi ande naame walamande ei na-mi pa rando menda pi ei meme.
5Go Godena angele ma-pamuao-aeme alinu nimimi lalo Ora mundu alinu loaeme repaana rolo para ni na-pi. 6Ora lalo. Ni angele ali diayapare nina Godena angelenuri ni ora kone waru wi. Naame pama einu raayome go einu walamande.
7Neme nimi para Godena wenaali rambamuaya angele laripu. Go eina neme nimi para yangi gipa angele na-loayo. Go pawa eimiri nimina binu minyasialiminyayanda nina bi rolo para popena lawa. Neme go au pawa eimi koae au menda pawapae.
8Nimina rupara pupudengi nanoyare pa anda menda aeme Keriso wenaalinumi muni giame. Go eiri nimi rambamulameya nimuna muni pake nalo ara pawana lalo. 9Ni nimi rapu aripu dinare ni muni ora diayapare neme nimi na-kongeyawa. Ande Masedonia andasu para aoma epameya Keriso wenaalimi nina waisawa alenu raayo ma-eparimiya. Ambalande nimimi ni na-rambamisimi. Gupuma werepenu pange ni ale menda dia deandare nimi na-konge doa. 10Kerisome ora angelenu komea loaisaya. Go rupa manda neme pange ora angele komea loayo. Go einare neme go lalo eina Akaia anda rupara aeme repaa mendame ni na-sese pilia. 11Neme go eiri akepea puayo. Neme nimiri pu na-guayo kone widamepae. Neme nimi repara pu guayo ei Godeme kone wia. 12Ande nimi repara muni gipa pi na-loaya ei pa lari pola. Neme go au na-pula lalo eiri mo Godena angele lao-aema loaeme alinumi nimuna pupudengi noaeme eiri wala nina pupudengi rapu menda pula popeleaya lalo. 13Go alinuri yayapi rupa Godena angele lao-aeme repaa. Gupuma nimuri ande yayapi auna pange yayapi aununa pupudengi nao-aeme repaa. Nimuna aunuri rando menda peapare mandaa yongaleme komea nimuri Kerisona angele lao-aeme repaa nono pea. 14Sadanimi pange nipu wala Godena ali leale ipuma wenaali epa makiralia eiri nee akipu kone wiliyapae. 15Go einare Sadani nipuna pupudengi nao-aeme repaame pange go au pilimindare gore rungulu mealo na-pambalepape. Werepere nimuna pupudengi naleme eina yangi ora milimi.
Polome rendaa muaisaya ei
16Ambala pange lawande. Ambia pange wala go lalonda. Ali mendame niri keyali kone na-sialepape. Go peapare ni keyali kone wilimindare gore ale menda diale pa go kone sialepape. Go einare pa nina lalo angele pa lari pono pa gialepape. Nina bi minyasiari pono dapape. 17Neme gupi angelenu doandare Reali Yesumi la lea angele lalo ara na-pi. Neme go doandare ni ora keyali au lalo ara lalo. 18Ali andapumi suna aunu ralialo ara nimuna binu minyasiao-aeme. Go eina ni pange go aunu ralialo ara nina bi minyasialua. 19Nimiri epe kone wimi. Go peme eimiyalo arare mo keyali alinumi nimi pamba na-pi angelenu pa loainya loaeme.
20Go einare ali mendame go au pa da aunu pamu puaeme pange nimina olemolenu pa muainya loaeme pange nimina ki kinalu kondo linya loaeme pange nimina binu pa ma-koya koya pinya loaeme. 21Naare go alinumi puaeme aunu pape eina puri menda dia. Go einare ni yalame komalo ara go lalondae. Ali mendame nipuna puaya aunu raayo la yokeleandare gore neme pange go au puluae. Go au pulu ara neme keyalinumi loaeme angele manda doa. 22Nimumiri gupi loaeme. Nimuri Iburu wenaali loaeme pange nimuri Isaraelimi mandu rangala pae repaa loaeme pange Eparamena mandu rangala pae repaa loaeme. Ni pange go au pi ali go ayonda. 23Nimuri Kerisona pupudengi nao-aeme alinuyapae. Ni keyado ara lalo kone widamepare nina pupudengi ne eiri ora ririna ei. Neme nimuri nina rolo para pimi kone wi. Ni ora pupudengi andapu waru nee pange ni dipula ora waru andapu pi pange ni kalipu kundumi rendaa waru no pe pange ni repara komala ei waru epea. 24Ni rana supu kalipu rendaa rana 39 rupa ora meawa. Go eiri ande Isaraelimi mandu rangala pae repaanuna kalu alinumi peme. 25Rana repo Romo repaame ni kalipu kundumi liiame pange rana komea ni kaname liiame. Gupuma ni rana repo nina puawa sipi adupima ipa para kusa. Naare mendana ni ipa para naare komea pange rimba komeana rupara pirawa. 26Nina pamuayo porana niri ipa raa pupulu ara ni ponde ma-ria puaya pange pake naleme repaame ni ponde luaeme pange Isaraelimi mandu rangala pae yangonumi pange Isaraelimi na-mandu rangala pae repaame pange ni ponde luaeme. Andaa daoni paranu pange uda paranu pange andaa weleya naini pange naana andami alinu yayapi aunu puaeme repaame pange one mone aunu raayome ni komala ei repara ma-epao-aeme. 27Ni ora pupudengi ora waru andapu noayo. Naare andapumi ni unu na-paluayo pange ni reame pange ipa nalame waru komoayo pange naare andapumi ni nape enda pange paliape anda pange yamape akanu raayo ora wasuayo. 28Go ei komea dia. Naare raayo andayaya aeme Keriso wenaali andere-ape eina kone waru sialo palialo puayo. 29Menda puri na-palea dinare ni pange puri na-pale. Menda koae au pia dinare ni pange yalame waru komoayo.
30Neme ale mendana nina bi minyasialuandare gore go nina puri na-pale einu wada alenuna komea nina bi minyasialua. 31Godere naana Reali Yesuna Apa. Nipuna bi minyasiari pualima. Neme yayapi angele doanda pangere nipumi komea kone wia. 32Ni Damasikasi anda para aripu dinare kini ali Aredasi nipuna pupudengi nae ali mendame ande Damasikasi anda para pora gape andere pirinyaya ma-piraisaya. Go alimi ni seseke lenaya pisaya. 33Go papare niri basekedi nuna ma-piraoma amenu mendame monde daoni ma-kopoliao pisimiya papena pondea wisaya para pongola popisua.
Currently Selected:
2 Korindi 11: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
