2 Korindi 12
12
One mone aunu Godeme upame Polo para walea aunu
1Ale mendanu na-pulu peapare nina gole nina bi pa minyasialua. Go peapare ambiare ande Reali Yesu Keriso upame ni para penameyao walea aununa angele doa. 2Ki laapo pereya angena malapu kuni gipa perelenaloma ambalande ali menda Keriso ali Godeme ora nipu aya parasi karu paisaya. Go eiri nina gole lalopare pa marea ora pawa pale o pa upame gole pawa pale Godeme komea kone wia. 3-4Go ali ni kone wipare Godeme nipu Epeni andasu nane karu puaya. Nipu do rapu pua o nipuna remo komea pua ni pa mareapare Godeme komea kone wia. So Epeni andasu nanere nipumi angele menda panga. Go angelere nipumi pange mendame pange walape angele dia. 5Go alina biri neme minyasialua. Nina biri go au na-pulua. Ni puri na-pale loa go eina komea nina bi minyasialua.
6Neme nina bi minyasialuandare gore ni keyado ara na-lalo. Neme go au puluandare gore ora angele lalo. Go peapare nina bi na-minyasialua. Akepeare ali mendame niri ora epe ali kone wili aya lalo. Nina ranare ande neme doa angelenu pangoma pange neme pulua aunu andoma komea go aliri epelea daminyayanda lalo.
7Go andawa aunu raayome nina gole ni ako lambili aunu pula pawa. Go peapare go eina neme ako lambi duayandare Godeme ni rendaa nina do para gia. Go rendaare nina do para mambo reke piri rendaa puaya rupa pia. Go mambo rekere Sadanina pupudengi nada ali manda pia eimi neme nina bina ako lambi duayanda Sadanimi sese pia. 8Rana repo neme Reali para yainya pulu ara lalo go rendaa pane mupae lawa. 9Go peapare nipumi ni para gupi la. Neme nee repara yarame kome eiri manda pea la. Akepeare ali menda puri na-pada dinare nina puri go para aloayo la. Go pangawa eimiri ni puri na-palawa eina neme pumi kendame na-komola. Neme go ni puri na-palawa eina neme ora raname komola. Akepeare Yesuna puri ni repara go dina epelea kone suma. 10Go einare ni Keriso rondonare manda ni rendaa nola kone siawa. Ni rendaa nape eina pange ni yainya komola pange ni rendaa gilimi pange ni narali alua pange neme go einu raayona ni kone na-wi. Akepeare ni puri diada dinare Yesuna puriri nina runane pia kone suayo.
Korindi Keriso repaa para Polome kone waru wisaya ei
11Neme go lalo angelere na-lape angelenuyapare gole lalo. Akepeare nimina gole la loma ni ma-rimbuyademe. Nimimi nina bi minyasialimindare gore ora au pimi. Go peapare nimimi go au na-peme. Niri bi na-wi ali ayopare ni apo niminande Godena angele ma-pamuao-aeme loaeme alinuna rolo para na-pi.
12Godeme nimi repara ande nimimi andaliminyayanda one mone aunu pange na-ande aunu nina rupara pande. Go aunu pulu arare ni kalu andainyaoma pawande. Go au pawa einumiri niri ora Godena angele ma-pamuao-ayo ali lo walande. 13Neme nimiri mo anda mendaa aeme Keriso wenaali para pawa aunu raayo nimi para pawa. Ande nimi repara muninu na-kongeyawa eimi komea pa au pawa. Neme go au pawaya auri pa au pawayale konenu na-sialepape. 14Ambia go nimina anda kimisu ipulu eiri rana repopa epoloameya pie. Nimimi ni ale menda palepa pi na-doa. Niri ora nimi komea rana pea. Nimina muni olemolere ni kone na-pea. Akepeare nongo nakinumiri enda olemolere ara anginu para na-aloaeme. Ara anginumi komea waisa waisa puma nongo nakinu repara aloaeme. Niri gore nimina apa manda. 15Neme nimi rambamulamere nina siamba-ayo alenu ora rumbulua. Nina do pange pa ora rumbulua. Neme nimi raname ora waru komalo anore nimimi ni rana waru na-komelemeyapae. 16Neme nimi kenda na-giawa eiri nimina gole e deme. Go peapare mendane repaamere gupi deme. Polome naana alenu mulamere penameyao na-muaeyapare nipuri wenaalinuna alenu mulame kuma pi angeleme loaya loaeme. Gupuma nipumi naana alenu muaya loaeme.
17Neme nimi repara mendane alinu raparipu dinare nimuna rupara olemolenu mulameyanda na-pawa.
18Daidasi nimi repara epenayandare neme kongeyo pirawa. Keriso alinu menda pange nipu rapu apo raparipu. Daidasimi nimina alenu menda epa meapae. Daidasi saare mendaa kone komea suma komea aunu komea puaepa. 19Nimina konemere nina yanda lialo ara lalo loma kone na-wi pape. Niri ora Yesuna pupudengi nado lalo eiri Godeme kone wia. Naame loaema angelenu o puaema aunu raayo nimi rambamulameya puaema. 20Ni paalame komalo ara gupi lalo. Ni apo ipuma nimi nina alimi kone sialo rupa na-alimi. Gupuma ni nimimi andelema kone sialeme rupa na-andeleme. Nimina runane go koae aunu siapanae. Rono yanda pia ei, pange mendame epe aunu pianda yanda dia aunu pange rono pangala aunu pange rekele rekele pi aunu pange yangona pi lada ei pange ewaisa pada ei pange ako lambidia aunu pange Kerisona rombo wi angelenu runguda aunu raayo nimina rupara epa andola kone sialo. 21Nimi repara epolandare ande ambala pisuande aunu wala pilia kone sialo eimi ni pala pia. Nimina lee rona Godeme ni yala ma-palia. Neme ree loalua. Akepeare wenaali mendapareme ambala pari puaeme koae aunu pa pari peleme. Go wenaalimi wena pake o ali pake nala aunu pange yalame na-kome aunu raayo pa pari peleme.
Currently Selected:
2 Korindi 12: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
