2 Korindi 10
10
Polome nipuna pupudengi noaya eina angele lisaya ei
1-2Mendane alinumi ni para gupi loaeme, Polore naa rapu arare pa kuma kuma pu ayapare wala naa minyapalaoma pane pua arare naa para puri pale angele waru lala puaya loaeme. Niri Yesumi pisaya rupa kuma kuma puma ora epe aunu pula kone suayo. Go einare nimi repara go angele lalo. Neme rendaa rendaa pi angele lanoya ni na-rimbuyalepape. Ni apo nane epolandare gurupa aunu na-pipape. Akepeare neme Keriso aunu na-pili loma ni rapu ape dame repaa rapu manda rendaa pi angele doa. 3Naare su alinu lealere pamemapare naana yanda puluamere su alinumi puaeme rupa na-pema. 4Naame yanda puluameya siamba aema alenuri suna alenu dia. Naame siamba aema alenuri Godena puri wia alenu sia aema. Go pea eimiyalo arare koae remona kudanu pange lakipi rumbambe pilia. 5Naame yayapi apenu deme ei ma-bembo lao-aema. Wenaalinu Godena aunu kone sulame piminda sese pimi repaa ma-bembo lao-aema. Naame wenaalinuna konenu ma-lekeyaoma Yesumi raname komola pea rupa ma-kone siao-aema. 6Ande nimimi naana angele pangoma pualimindare gore naame naana angelenu na-pangeme repaare rendaa para ma-alima.
7Nimiri olemolenu raayo pa mandaa yongale para komea andala puaeme. Mendane repaamere nimuri Kerisona pupudengi nao-aema repaa kone suaeme. Go kone suaeme repaamere kone sialepape. Nipu Kerisona ei aya rupare naa pange Kerisona pupudengi nao-aema repaa aema. 8Yesu Keriso ande Realimi naa pange nimi wamo pumanoya puri gea. Go puri gea eiri nimi ma-koyamonoya diayapare nimina Keriso aunu ma-andayamonoya naa puri gea. Naame naana puri wima eina naana bi minyasiape angele waru lama. Go pama eina naame yalame na-komalema. 9Nina ranare neme rapao-ayo ramayonumi nimi na-ma-pala siainya kone sialo. 10Mendane repaame gupi loaeme. Polona ramayore ora rendaa waru pi ramayonu rapao-aya loaeme. Go peapare naasi epa ao-aya dinare nipuna dore puri na-paloma nipuna lea angelenuri alenda na-mandea, loaeme. 11Gurupa angele dame repaa parare gupi lalo. Naana ramayona loaema angelenuri naana angaame nimina lee rona epa ara pange epa loaema.
12Naamere naana koneme go kone suaema. Naare mo mendane alinumi nimuna binu minyasiao-aeme repaa manda dia. Nimuna aunu rapu naana aunu na-mendaleyalima. Ali menda nipuna aunu wala ali mendana aunu rapu mendaleyao-aya. Go au puaeme repaare keyalinu aeme lalo. 13Go peapare naare naana rombonu angulaoma naana binu na-minyasialima. Naamere Godeme naana rombonu siala pea rupa komea lala pilima. Go eina nimiri go rupara epeme.
14Nimiri Godeme nipuna pupudengi nanoya walea kuda runane pimi. Go einare ande Korindi andasu nane Godena angele lala epawa. 15Ande monde repaa mendame peme pupudengi gole naana binu na-minyasiao-aema. Naame go kone suaema. Nimina kone rulaeme eiri ora puri waru padea. Gupuma nimina runane naana pupudengi nema ei ora puri padea. Go eiri Godeme naana ao-palumonoya gea ei runane ao-padimandare go au pilia. 16Go aunda piliandare gore Korindi wanduaoma mone alimi andasu paranu pange Godena angele lalima. Naame mendame pupudengi nainyayanda Godeme walea repaame neleme pupudengina naame pama pinu na-dema.
17Ande Godena angele wia bukamere gupi lea.
Menda apimi nipuna binu minyasialiandare gore
Godeme paya aununa komea nipuna binu
minyasiainya lape lea.
18Naame ambala kone wima eiri go ei. Ali menda nipuna gole nipuna bi minyasiao-aliandare gore Godena lee rona nipuna bi na-wia. Go peapare Realimi bi minyasialia ali nipu komeare ora nipuna bi ora andaai wia.
Currently Selected:
2 Korindi 10: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
