Rɔmu Siè 9
9
Dɔfĩn àá ɓɛ́ nìnbirìe lɛ ɛ́ hɔ́ munɛ bòo
1Hɔ̀ bòo lɛ ɛ́ nín bie ɛ́ iè bɔ̀berà; ń yá ɓúo ɛ̀ ɓúukɛ, iè hɔ̀ lɛ ɛ́ niǹ bòo ɛ́ sɛ̃̀ à Kirisa ǹ; niǹ tĩì lɛ ɛ́ lé Mɛkɛ̃n-Sãanu ɛ́ te híɛhɔ́ dú ɛ́ zɛ̃́ní kɛ́ hɔ́ lɛ ɛ́ nín bie ɛ́ bɔn. 2Niǹ hɛciri ɛ́ hɛ̀ yaa cɛ̃̀un, ɛ̀ niǹ lɔ̀n ɛ́ lò ɛ́ be cɛ̃̀un niǹ tĩì hũn. 3Kɛ́ hɔ́ yɛ̀rɛ́ hṹn fɔ́ɓán ɛ̀ Dɔfĩn ɛ̀ dànkɛní mi, ɛ̀ fán mi ɛ̀ lí-é Kirisa ǹ ɛ̀ kìe zɛ̀ɓɛ̀ lɛ iè pe kìe dàa nìɛ ɛ̀ dàá yí fuen, ɛ̀ ǹ tɛ̀ hɔ̀. 4Ɓɛ̀pe ɛ́ iè ɓɛ̀ Yizarayɛɛle nìɛ, Dɔfĩn ɛ́ wɔ́ ɓɛ́ àá mí nìɛ, ɛ́ zɛ̃́niɛ ɓɛ̀ àá mí ɓàarɔ́, ɛ́ dú lé ɲɛbíi àá ɓɛ́, ɛ́ lɛ́ mí làndɛ́ ɓà ǹ, ɛ́ zɛ̃́niɛ ɓɛ̀ àá bòo lɛ ɛ́ ɓɛ́ dàa fɔ́ɓán ɛ̀ ɓɛ̀ wóo hɛ̃un mípe Dɔfĩn, ɛ́ bie hɔ̀ bòo lɛ ɛ́ mí ɓén wé àá ɓɛ́ ɛ́ lɛ́ ɓà ǹ. 5Ɓɛ̀ iè kìe hàarí hàarí zĩkĩ́nɓɛ̀ ɛ́ te ɓɛ́ nìɛ.#9.5 Ɓɛ̀ kìe hàarí hàarí zĩnkĩ́nɓɛ̀ sɔ ɛ́ iè Abarahaamu àá Yizaake àá Zakɔɔbu. Àpe Kirisa lɛ ɛ́ wɔ́ á nìnbírɔ ɛ́ iè ɓà dàa nùún. Àpe iè Dɔfĩn lɛ ɛ́ pɔ hɔ bòo míkùi. Ɛ́ mí nɛ ke ɓàaní-ɛ̀ ǹ fúu! Amiina.
6Hɔ̀ yí bòo ɛ́ ń nɛ Dɔfĩn ɲunù lɛ ɛ́ hɔ́ lɛ́ ɛ́ iè kã́amáa wɛ̀. Kɛ́ ɓɛ́ den yí ɓɛ́pe Yizarayɛɛle hũn nìɛ ɓɛ́kùi ɛ́ temu iè Yizarayɛɛle nìɛ àá bɔ̀bín Dɔfĩn híɛhɔ́ wɛ̀. 7Ɛ̀ ɓɛ̀ lò yí ɓɛ́pe Abarahaamu hũn nìɛ ɓɛ́kùi ɛ́ temu iè piè nìɛ àá bɔ̀bín wɛ̀. Iè hɔ̀ lɛ ɛ́ Dɔfĩn ɛ́ hàarí bie lɛ́ ápe Abarahaamu ǹ ɛ́ nɛ làa: «Ɓɛ̀ hũn nìɛ lɛ ɛ́ ń nɛ nín lɛ́ kɔ̀ ǹ ɛ́ Yizaake ɛ́ te ɛ́ ɓén te ɛ́ lɛ́ kɔ̀ ǹ.» 8Iè bòo ɛ́ ɓɛ́ den nɛ ɓɛ́ yí ɓɛ́pe Abarahaamu nìɛ lɛ á tɔn ɓɛ́kùi ɛ́ temu iè Dɔfĩn nìɛ wɛ̀. Kɛ́ ɓɛ́ nìɛ lɛ ɛ́ tɔn ɛ́ ɓáaniɛ ɓán àá Dɔfĩn ɲunù lɛ ɛ́ Hɔ́ hàarí lɛ́ ɛ́ temu iè Abarahaamu hũn nìɛ àá bɔ̀bín. 9Ɛ́ lɛ iè lèpe ɲunù lɛ ɛ́ Dɔfĩn ɛ́ hàarí lɛ́ á Abarahaamu ǹ: «Lóo lɛ ɛ́ lé níkɛàni ɓà ńmàa kɛ́ ń ɓén khũ̀á ɛ́ ɓen, hɔ́rɔsí ɛ̀ Sara ɛ́ tɔn bɛ́zikíì.»
10Ɛ́ hɔ́ lò den yí hɔ́pe sí mí dòonún wɛ̀. À Rebeka lɛ hàarí iè ɔ̀ kìe zĩkĩ́n Yizaake ɓà hṹnú ɛ́ hàarí tɔn lɛyɛhĩ́. 11-12Ɛ́ ɓɛ́pe zɛ̀ɓɛ̀ sɔ ɛ́ lò hàarí ɲɛùn yí te, ɛ́ ɓɛ́ wo hàarí ɲɛùn yí wé bɔ̀tente tàá bɔ̀koohɔ́, hɔ́rɔsí ɛ̀ Dɔfĩn ɛ́ lò den hàarí bie ɛ́ lɛ́ ɓà nín ǹ ɛ́ nɛ làa: «À kĩ́i ɛ́ ɓén wí-e fɔ̀rɔ tɔntɛ́.» Dɔfĩn ɛ́ wɔ́ hɔ́ pe sí bòo lɛ ɛ́ wé ɛ̀ pehɔ̀ bòo lɛ ɛ́ Hɔ́ nɛ mii wé ɛ̀ ɲùnù dàá tí. Dɔfĩn ɛ́ den wóò munkɛ mí nìnbirìe kɛ̀a bòo lɛ ɛ́ Hɔ́ wɛ. Hɔ̀ yáà húi peɓɛ̀ bòo lɛ ɛ́ ɓɛ́ wɔ́ vé ɛ̀ dàá ve ɓɛ, kɛ́ Hɔ́ wóò wé kɛ̀a bòo lɛ ɛ́ Hɔ́ wɛ. 13Kɛ̀a bòo lɛ ɛ́ hɔ́pe Dɔfĩn dàa bie hɔ̀ mí bienù vɛ̃hṹ hũn ɛ́ nɛ làa: «Ń wɛniɛ ɔ̀ Zakɔɔbu, ɛ̀ ǹ pɛ̃́ á Esoo.»
14Ɛ́ ké wo ɛ́ zɔ́ bie nɛ wɛrɛ̀? Nɛ Dɔfĩn bòo lɛ ɛ́ Hɔ́ wóò wé ɛ́ yá cã̀aní? Ńɓùé lò! 15Dɔfĩn ɛ́ den bie lɛ́ á Moyiize ǹ nɛ làa: «Ń ɓén mi-ɛ lɛ ɛ́ ń wɛ ɛ́ nín mi miinɛ̀, ɛ̀ ǹ ɓén zɛ̃́ní niǹ sãamu àá ɔ́lɛ ɛ́ ń wɛ ɛ́ nín zɛ̃́ní hɔ́ nin.» 16Ɛ́ hɔ́ wo bĩniɛ ɛ́ yá lé nìnbírɔ tĩi bòo tàá piè bòo lɛ á dɛ̀ ɛ́ wóò wé hũn, kɛ́ hɔ́ ɛ́ lé àá Dɔfĩn mí dòonún lɛ ɛ́ dũ le miinɛ̀ viì. 17Ɛ́ lé Dɔfĩn bienù vɛ̃hṹ hũn, ɛ́ hɔ́pe Dɔfĩn ɛ́ bie lɛ́ á Eziputi bɛ́zuú Faraɔn ɛ́ nɛ làa: «Ń wɔ́ kɔ àá bɛ́zuú àá còohĩ́ ɛ́ dàá nin bè kɔ ǹ ɛ̀ dàá zɛ̃́ní niǹ pànkɛ́, ɛ̀ niǹ yèrè ɛ̀ dàá lé lé sṹsùnù míkùi lɔ̀n.» 18Ɛ́ kɛ̀amu, ɛ́ Dɔfĩn ɛ́ wóò mi nìnbírɔ lɛ ɛ́ Hɔ́ wɛ ɛ́ mii mi miinɛ̀, ɛ̀ Hɔ̀ dĩìní nìnbírɔ lɛ ɛ́ Hɔ́ wɛ ɛ́ mii dĩìní ɲɛkɛ̃̀a.
19Ɛ́ wɔ́ khɔn ɛ́ mí ɓén zɔ bie ɛ́ lɛ́ mi ǹ nɛ làa: «Ɛ́ hɔ́ iè ńɓùo ɛ́ Dɔfĩn dàa wóò bĩní bie nɛ ké wɔ́ khɔn? Á iè wieni ɛ́ temu dɛ̀ ɛ́ síɓán àá Dɔfĩn tĩì bòo?» 20Kɛ́ kɔ́pe yɛ̀rɛ́ den ɛ́ iè wieni kɔ̀pe nìnbírɔ, ɛ́ kɔ́ dàa ɛ́ Dɔfĩn ɛ̀ wũ̀aní? Bòo ɛ́ lé pã́ahṹ lɛ ɛ́ ɓɛ́ mɛ́ iè dìɛ dɛ̀ ɛ́ bie ɛ́ lɛ́ mí mírɔ ǹ nɛ hɔ iè ńɓùo á dàa mɛ́ mí kɛ̀amu? 21À pɛ̃́nmí ɛ́ dɛ̀ bòo lɛ á wɛ ɛ́ wé àá hɔ́ cɔ́rɔ́ lò! À dɛ̀ pã́ahṹ lɛ ɲún wi ɛ́ mí àá hɔ́pe cɔ́rɔ́ sɔ, àá lò dɛ̀ pã́ahṹ kũǹ ɛ́ mí àá hɔ́.
22Ɛ́ Dɔfĩn ɛ́ den iè wiè wɛ ɛ́ mii zɛ̃́ní mí tĩ-cĩ̀níì, ɛ̀ Hɔ̀ lò lɛ́ ɛ̀ ɓɛ̀ nìnbirìe ɛ̀ dũń mí pànkɛ́ bòo. Hɔ́rɔsí ɛ̀ ɓɛ̀pe nìnbirìe lɛ ɛ́ cĩ̀niɛ hɔ̀pe Dɔfĩn tĩì, lɛ iè nìɛ lɛ ɛ́ hṹn fɔ́ɓán ɛ̀ ɓɛ̀ ɛ̀ ɓé, ɛ́ Hɔ́ yí ɓé ɓɛ́ wɛ̀; kɛ́ Hɔ́ den ɛ́ hɛ̃̀ mí hũn àá ɓɛ́ cɛ̃̀un. 23Kɛ́ ɓɛ́ dɔ̀ ɛ́ Hɔ́ ɛ́ mɔn miinɛ̀. Ɛ́ Hɔ́ wo wɛ mii zɛ̃́ní mí ɓàanírɔ bɔ̀bɛhɔ́ àá ɓɛ́, ɛ́ Hɔ́ dàa sɛ̃̀nɛ́hã̀ sɛ́sɛ́a ɓɛ̀ ɛ́ bɔ̀sí ɛ̀ ɓɛ̀ dàá ɛ̀ mi mí ɓàanírɔ́ sɔ. 24Ɛ́ ɓàasiè sɔ ɛ́ iè kèpe. Kèpe lɛ ɛ́ hɔ́pe Dɔfĩn ɛ́ vɔn, ɓɛ̀ yí ɓɛ́ Zuifuɓɛ ɓɛ́ dòonún ɛ́ Hɔ́ vɔn, Hɔ̀ lò ɓiɛ̀ vɔn ɓɛ̀lɛ ɛ́ yí ɓɛ́ Zuifuɓɛ. 25Dɔfĩn ɛ́ den bie hɔ̀pe sí mí bɔ̀háanírɔ Oze vɛ̃hṹ hũn ɛ́ nɛ làa:
«Hɔ̀ dàa lɛ nìɛ ɛ́ bòo hṹn yí sĩ̀ mi ǹ
Ɛ́ ń wóo ɓén ve ɓɛ nɛ niǹ nìɛ,
Ɛ̀ hɔ̀ dàa lɛ nìɛ ɛ́ ń hṹn yí wɛ,
Ɛ́ ń wóo ɓén ve nɛ dàa lɛ nìɛ ɛ́ ń wɛ cɛ̃̀un.
26 Ɛ̀ lè viì lɛ ɛ́ ɓɛ́ hṹn wóò bie lɛ́ ɓà ǹ hũn nɛ ɓɛ́ yí niǹ nìɛ,
Ɛ́ ɓɛ́ wóo ɓén ve ɓɛ lèpe viì sɔ hũn nɛ Dɔfĩn mɛkɛ̃nì ɓàasɔ nìɛ.»
27Ɛ́ Dɔfĩn bɔ̀háanírɔ Ezayi ɛ́ kùusɔ ɛ́ hàarí bie ɓɛ̀ Yizarayɛɛle nìɛ bòo hũn ɛ́ nɛ làa: «Hɛ̀rí kɛ́ ɓɛ́ Yizarayɛɛle nìɛ ɛ́ buò buò kɛ̀a ie hɔ hã̀anì lɛ ɛ́ wi hɔ ɲun-bɛhɔ́ ɲunù, ɛ̀ ɓɛ̀ iè peɓɛ̀ nìɛ ɓɛ̀ yìɛní ɛ́ temu ɛ́ ɓén fuen.
28 Iè hɔ̀ lɛ ɛ́ hɔ́ bòo lɛ á Ɲunsɔ ɛ́ bie á ɓén wé míkùi ɛ́ tíiní ɲunù fùa fùa lè sṹsùnù.»
29Ápe Ezayi sɔ ɛ́ lò hàarí sɛ̃̀nɛ́hã̀ khɛ́ hɔ́ ɛ́ nɛ làa:
«Kɛ́ ké Ɲunsɔ pànkɛ́ ɓàasɔ ɛ́ hàarí hṹn yí fùansí zɛ̀ɓɛ̀ bìɛ yiɛní dɔ̀ ǹ ɛ́ yí lɛ́ kiè ǹ,
Nɛ kè hṹn ɓén dìń kɛ̀a ɓɛ Sodɔɔmu nìɛ,
Nɛ kè hṹn ɓén léɓán àá ɓɛ́ Komɔɔre nìɛ.»
Ɓɛ̀ nìɛ lɛ ɛ́ dũmuasɛ̃̀ Yiezu ǹ ɛ́ Dɔfĩn ɛ́ wɔ́ àá nìcã̀aníriè ɛ̀ Hɔ̀ fueniɛ ɓà ǹ
30Ɛ́ ké wo sũǹ ɛ́ zɔ bie nɛ wɛrɛ̀? Ɓɛ̀ nìnbirìe lɛ ɛ́ yí ɓɛ́ Zuifuɓɛ lɛ hṹn yá hɔ̀ cã̀anírɔ́ ɛ̀ cɛ̀ Dɔfĩn híɛhɔ́, ɛ́ hɔ́pe Dɔfĩn ɛ́ wɔ́ àá nìcã̀aníriè peɓɛ̀ ńdɛsĩ̀nlɔ́ bòo hũn. 31Hɔ́rɔsí kɛ́ ɓɛ́pe Yizarayɛɛle nìɛ lɛ hṹn cɛ̀ nɛ ɓɛ ɛ̀ bè hɔ̀ làndɛ́ máahṹ ɛ̀ dàá yí hɔ́ cã̀anírɔ́ Dɔfĩn híɛhɔ́, ɛ́ den yí dàń hɔ́ ɛ́ yí wé wɛ̀. 32Ɛ́ iè ńɓùo? Iè hɔ̀ lɛ ɛ́ hɔ́pe cã̀anírɔ́ sɔ ɛ́ ɓɛ́ hṹn yá cɛ̀ àá ńdɛsĩ̀nlɔ́ wɛ̀, kɛ́ ɓɛ́ den hṹn lieníkɛ ɛ̀ ɓɛ̀ nɛ ɓɛ́ dɛ̀ hɔ̀ ɛ́ yí àá ɓɛ́ bɔ̀werà. Ɛ́ ɓɛ́ den wo kɛ̃nkɛ̃niɛ àá lé sɛ̃̀nlè lɛ ɛ́ wóò kuèníkɛ ɓɛ nìnbirìe, 33lɛ ɛ́ Dɔfĩn ɛ́ bie bòo mí bienù vɛhṹ hũn ɛ́ nɛ:
«Mì húi, niǹ bìsí lé sɛ̃̀nlè lɛ ɛ́ ɓɛ́ nìnbirìe ɛ́ wóo dàá kɛ̃nkɛ̃níkɛ hɔ̀ Siɲɔn lóo hũn,
Lè lɛnù lɛ ɛ́ wóò kùeníkɛ ɓɛ nìnbirìe.
Kɛ́ nìnbírɔ ɛ́ dũmuasɛ̃̀ lè lɛnù sɔ ǹ, ɛ́ lùwiè ɛ́ yá dí ɓàasɔ wɛ̀. # 9.33 Lè lɛnù sɔ lɛ ɛ́ ɓɛ́ ɛ́ bòo ɛ̀ bie iè Yiezu kirisa. »
Currently Selected:
Rɔmu Siè 9: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
