Rɔmu Siè 8

Ńwé lé mɛkɛ̃nì hũn àá Dɔfĩn Mɛkɛ̃ni pànkɛ́

1Ɛ́ kɛ̀a sáalɛ, ɛ́ ɓɛ́ nìnbirìe lɛ can ɓán àá Yiezu Kirisa ɛ́ lìe yá bĩní ɛ́ lè ɛ́ biení lɔ̀n wɛ̀. 2Iè hɔ̀ lɛ ɛ́ Yiezu Kirisa bòo hũn, ɛ́ lé Mɛkɛ̃n-Sãanu bòo lɛ ɛ́ Lé wóò wé, ɛ́ lɛ́ lé mɛkɛ̃nì mi ǹ ɛ̀ Lè lerɛ mi ɛ́ lɔ́ hɔ́ bɔ̀koohɔ́ àá hɔ́ húmú núnú hũn. 3Moyiize làndɛ́ ɛ́ yí dɛ̀ hɔ̀pe sí ɛ́ yá wé, hɔ̀ nìnbí-yáamu lɛ cũ̀kṹ mí bòo hũn. Kɛ́ Dɔfĩn pe ɛ́ wɔ́ hɔ́. Hɔ̀ tɔrɛ mí kùrú Zuú nɛ a ɓen wé nìnbírɔ, ɛ̀ léɓán àá ɓɛ́pe nìnbirìe lɛ iè ɓɛ̀ bɔ̀konwériè, ɛ̀ dàá fuení kie ǹ ɛ̀ lé hɔ́ bɔ̀koohɔ́ hũn. Ɛ́ sí iè pe ɛ́ Dɔfĩn ɛ́ yaakɛa hɔ̀ bɔ̀koohɔ́ lɛ wi ɓɛ́ nìnbirìe ǹ pànkɛ́ kɛ̀amu. 4Dɔfĩn ɛ́ wɔ́ hɔ́pe sí bòo lɛ ɛ́ wé ɛ̀ hɔ̀ làndɛ́ bòo lɛ ɛ́ hɔ́ bie ɛ́ ké dàń tíiní ɲunù, kèpe lɛ ɛ́ lé Mɛkɛ̃n-Sãanu ɛ́ te híɛhɔ́ dú, kɛ́ ké nìnbí-yáamu ɛ́ bòo mí wɛ̀. 5Iè hɔ̀ lɛ ɛ́ ɓɛ́ nìnbirìe lɛ ɛ́ wóò wé ɓɛ́ nìnbí-yáamu bòo ɓɛ̀ wé, ɛ́ wóò wé ɓɛ́ kùrú tĩɛ̀ bòo ɛ̀ ɓɛ̀ bè bòo hièní. Kɛ́ ɓɛ́lɛ ɛ́ iè hɔ̀ bòo lɛ ɛ́ lé Mɛkɛ̃n-Sãanu ɛ́ cɛ̀ ɛ́ ɓɛ́ wóò wé, ɛ́ pe wóò wé lé Mɛkɛ̃n-Sãanu tĩì bòo ɛ̀ ɓɛ̀ bè bòo hièní. 6Nìnbírɔ lɛ ɛ́ wóò wé mí nìnbí-yáamu bòo à bè bòo hièní, ɛ́ iè húmú wṹn lɔ̀n á wi, kɛ́ á lɛ ɛ́ wóò wé lé Mɛkɛ̃n-Sãanu bòo lɛ ɛ́ Lé ɛ́ cɛ̀ à bè bòo hièní, ɛ́ pe wòó yí lé mɛkɛ̃nì àá lé hũn-wiɛ̀. 7Ɓɛ̀ nìnbirìe lɛ ɛ́ wóò wé ɓɛ́ kùrú nìnbí-yáamu bòo lɛ ɛ̀ ɓɛ̀ bè bòo hièní ɛ́ iè Dɔfĩn ɓà ńbíyanliè; ɓɛ̀ yáà tɛ̀ hɔ̀pe Dɔfĩn làndɛ́ bòo, ɛ̀ ɓɛ̀ lò yɛ̀rɛ́ yí dɛ̀ hɔ̀ ɛ́ yá tɛ̀ wɛ̀. 8Ɓɛ̀ nìnbirìe lɛ ɛ́ wóò bè ɓɛ́ nìnbí-yaamu bòo hièní ɛ́ bòo ɛ́ yí dɛ̀ yá tĩìní Dɔfĩn wɛ̀.

9Kɛ́ mípe ɛ́ yáà wé mí nìnbí-yáamu bòo, kɛ́ lé Mɛkɛ̃n-Sãanu tĩì bòo iè pe ɛ́ mí wóo wé, iè hɔ̀ lɛ ɛ́ lé Dɔfĩn Mɛkɛ̃ni ɛ́ wi miɛ ǹ. Kɛ́ Kirisa Mɛkɛ̃ni ɛ́ mí-ɛ lɛ ǹ, ɛ̀ ɓàasɔ bòo ɛ́ yí sĩ̀-ɛ pe Kirisa ǹ wɛ̀#8.9 Mɛkɛ̃n-Sãanu àá Dɔfĩn Mɛkɛ̃ni àá Kirisa Mɛkɛ̃ni ɛ́ iè dìcóoní.. 10Kɛ́ á Kirisa ɛ́ ɓen wi miɛ ǹ, ɛ̀ hɛ̀rí kɛ́ hɔ́ bɔn kɛ́ mí tɛkɛ̀a ɛ́ pe wo ɓén hí hɔ̀ bɔ̀koohɛ̃ lɛ ɛ́ mí wɔ́ bòo hũn, ɛ̀ lè Mɛkɛ̃n-Sãanu ɛ́ ɓén lɛ́ ɛ́ mí mɛkɛ̃nì ɛ́ wé iè hɔ̀ lɛ ɛ́ Dɔfĩn ɛ́ wɔ́ miɛ àá nì-cã̀aníriè. 11Dɔfĩn ɛ́ vìeniɛ ɔ̀ Yiezu ɛ́ líeniɛ hɔ́ húmú hũn. Ɛ́ kɛ́ lépe Dɔfĩn Mɛkɛ̃ni sɔ ɛ́ ɓen wi miɛ ǹ, ɛ́ lépe Dɔfĩn Mɛkɛ̃ni sɔ lɛ vìeniɛ ɔ̀pe Yiezu Kirisa ɛ́ líeniɛ hɔ̀ húmú hũn ɛ́ ɓiɛ̀ ɓén lɛ́ lé mɛkɛ̃nì mì tɛkɛ̀a lɛ wóò hí ǹ.

12Kìe zɛ̀ɓɛ̀, ɛ́ sí iè hɔ̀ pe, ɛ́ ké mɛkɛ̃nì hũn ɛ́ ké sãawi ɛ̀ wé lé Mɛkɛ̃n-Sãanu bòo lɛ ɛ́ Lé ɛ́ cɛ̀, kɛ́ ké bí wé ké nìnbí-yáamu bòo wɛ̀. 13Iè hɔ̀ lɛ kɛ́ mí ɓen ɛ́ mì nìnbí-yáamu bòo ɛ̀ wé, ɛ́ mí ɓén ɛ́ hí. Kɛ́ mí den ɓen lɛ́ ɛ́ lé Mɛkɛ̃n-Sãanu ɛ́ yíiniɛ miɛ ɛ́ mí ɓɔ́ mí nìnbí-yáamu bɔ̀werà, ɛ́ mí ɓén yí lé mɛkɛ̃nì. 14Ɓɛ̀ nìnbiriè ɓɛ́kùi lɛ ɛ́ wóò lɛ́ ɛ̀ lè Mɛkɛ̃n-Sãanu ɛ̀ teń peɓɛ̀ híɛhɔ́ ɛ̀ dí ɛ́ iè Dɔfĩn nìɛ. 15Iè hɔ̀ lɛ ɛ́ lé Mɛkɛ̃ni lɛ ɛ́ Dɔfĩn lɛ́ miɛ ǹ ɛ́ yí Mɛkɛ̃ni lɛ mii wé miɛ àá wɔhĩ́ lɛ iè ɓɛ̀ ńzankɛbáa, kɛ́ Lé iè Mɛkɛ̃ni lɛ te miɛ wɔ́ àá Dɔfĩn nìɛ. Ɛ́ lépe Mɛkɛ̃n-Sãanu sɔ ɛ́ temu wóò lɛ́ ɛ̀ kè dàá zɔ bén hɔ́ Dɔfĩn nɛ: «Abba», iè bòo ɛ́ ké nɛ «kiè Yàá!» 16Ɛ́ lépe Mɛkɛ̃n-Sãanu míte ǹ ɛ́ zɛ̃́ní ɛ̀ lɛ́ ké hɛciri ǹ kɛ́ ké iè Dɔfĩn nìɛ. 17Ɛ́ hɔ́ lɛ ɛ́ ké iè Dɔfĩn nìɛ, ɛ́ ké ɓén yí ké hɔ́n hɔ̀ bòo lɛ ɛ́ hɔ́pe Dɔfĩn ɛ́ lɛ́ mí ɲunù nɛ mí ɓén lɛ́ mí nìɛ ǹ hũn. Ké ɓén páaní ɛ́ yí ké hɔ́n àá ɔ́ Kirisa; iè hɔ̀ lɛ kɛ́ ké ɓen lɔ̀n ɛ́ be àá ɔ́, ɛ́ ké ɓiɛ̀ ɓén páaní ɛ́ kań piè ɓàarɔ́ hũn àá ɔ́.

Hɔ̀ ɓàarɔ́ lɛ ɛ́ vaá-ɓen bòo

18Ń dũ kɛ́ lé lɔ̀nbiè lɛ ɛ́ ké wi hũn hɔ̀pe zoòni wihĩ́ lɛ hũn ɛ́ yí dɛ̀ ɛ́ yá mìí ɛ́ màaní àá hɔ́ ɓàarɔ́ lɛ ɛ́ Dɔfĩn ɛ́ ɓén lɛ́ ɛ́ ké ɛ́ wé hũn wɛ̀. 19Ɛ́ hɔ́ bòo lɛ ɛ́ Dɔfĩn ɛ́ mɛ́ míkùi ɛ́ hìé pɛ̀pɛ̀ ɛ́ nɛ ɓɛ ɛ̀ mi le pɛ̃̀hṹ lɛ ɛ́ Dɔfĩn ɛ́ dàa ɓén zɛ̃́ní mí nìɛ hɔ̀ ɓàarɔ́ hũn. 20Ɛ́ hɔ́pe bòo lɛ ɛ́ Dɔfĩn mɛ́ míkùi ɛ́ wo khie wɔ́ bòo lɛ ɛ́ ɲún mí wɛ̀. Hɔ̀ yí hɔ́pe bòo sɔ míte ǹ te hɔ wɔ́, kɛ́ Dɔfĩn ɛ́ te hɔ wɔ́. Kɛ́ Hɔ́ lò pɛ́wi lɛ́ tĩì bènlén hɔ̀pe bòo sɔ, 21lɛ iè bòo lɛ ɛ́ hɔ́pe bòo lɛ ɛ́ Dɔfĩn mɛ́ míkùi ɛ́ ɓén yí míte ɛ́ lé hɔ́ pànkɛ́ lɛ ɛ́ te hɔ́ ɛ́ yáakɛ núnú hũn. Ɛ́ hɔ́ wo ɓén teń míte ɛ̀ hɔ̀ lò ɓén yí hɔ́ ɓàarɔ́ lɛ ɛ́ Dɔfĩn ɛ́ ɓén lɛ́ mí nìɛ ǹ. 22Ɛ́ ké dũ kɛ́ hɛ̀rí kɛ̀a zoòni ɛ́ hɔ́ bòo lɛ ɛ́ Dɔfĩn mɛ́ míkùi ɛ́ ɲinikɛ ɛ̀ hɔ̀ lò lɔ̀n ɛ́ be kɛ̀a ie hṹnu lɛ ɛ́ te bòo sí. 23Kɛ́ hɔ́ yí hɔ́pe bòo lɛ ɛ́ Dɔfĩn mɛ́ mí dòonún, kɛ́ képe lɛ ɛ́ yú lé Mɛkɛ̃n-Sãanu lɛ zɛ̃́ní kɛ́ ké ɓén yí hɔ́pe bòo lɛ ɛ́ Dɔfĩn lɛ́ mí ɲunù nɛ mí ɓén lɛ́ kie ǹ, ké ɓiɛ̀ ɛ́ ɲinikɛ kè tĩɛ̀ hũn kɛ́ ké ɛ́ hìé nɛ Dɔfĩn ɛ̀ leń ké ɲún ɛ̀ víení, kèpe lɛ iè pehɔ̀ nìɛ. 24Ɛ́ Dɔfĩn ɛ́ fueniɛ kiè ǹ, ɛ̀ Hɔ̀ lɛ́ ɛ́ ké hɔ̀ bòo ɛ́ Hɔ́ ɓén lɛ́ kìe ǹ ɛ̀ hìé àá ńdɛsĩ̀nlɔ́. Kɛ́ ké hṹn loo hɔ bòo lɛ ɛ́ ké ɛ́ hìé, ɛ́ ké yá bĩní ɛ́ hìé hɔ́ lò. Iè hɔ̀ lɛ ɛ́ nìnbírɔ́ ɛ́ yáà hìé hɔ́ bòo lɛ á loo àá mí yìe wɛ̀. 25Kɛ́ ké ɓen ɛ́ hɔ̀ bòo lɛ ɛ́ ké yí loo àá ké yìe ɛ̀ hìé, ɛ́ ké den ɛ́ cɛ ke kuò ɛ́ dàá hìé hɔ́.

26Ɛ̀ bĩní páa yán, ɛ́ lé Mɛkɛ̃n-Sãanu ɛ́ wóò yíiní kie iè hɔ̀ lɛ ɛ́ ké pànkɛ́ ɛ́ mí wɛ̀. Ké den yí dũ Dɔfĩn lɛ wóò hɛ̃nnin àá mí híɛhɔ́ wɛ̀. Kɛ́ lé Mɛkɛ̃n-Sãanu míte ǹ ɛ́ pe wóò hɛ̃un Dɔfĩn ɛ́ lɛ́ kiè ǹ àá tɛmu lɛ ɛ́ nìnbírɔ ɛ́ yí dɛ̀ yá bie wɛ̀. 27Ɛ́ Dɔfĩn lɛ ɛ́ loo hɔ tĩɛ̀ hũn ɛ́ dũ hɔ bòo lɛ ɛ́ lé Mɛkɛ̃ni ɛ́ wɛ mii hɛ̃un, iè hɔ̀ lɛ ɛ́ lé Mɛkɛ̃ni ɛ́ wóò hɛ̃un Dɔfĩn ɓɛ̀ ńdɛsĩ̀riè bòo hũn kɛ̀a bòo lɛ ɛ́ hɔ́pe Dɔfĩn ɛ́ wɛ.

28Ké dũ kɛ́ bòo míkùi hũn, ɛ̀ Dɔfĩn ɛ́ wóò lɛ́ ɛ̀ bɔ̀tente ɛ̀ temu yí ɓɛ́ nìnbirìe lɛ ɛ́ wɛ hɔpe Dɔfĩn, ɓɛ̀pe lɛ ɛ́ Hɔ́ vɔn ɛ́ ɓáaniɛɓán àá bòo lɛ ɛ́ Hɔ́ wɛ nɛ hɔ wé. 29Iè hɔ̀ lɛ ɛ́ ɓɛ́pe nìnbiriè lɛ ɛ́ hɔ́pe Dɔfĩn ɛ́ sɛ̃̀nɛ́hã̀ dũnɛ, ɛ́ Hɔ́ sɛ̃̀nɛ́hã̀ munɛ nɛ mii lɛ́ ɛ̀ ɓɛ̀ dìń kɛ̀a mí Zuú, bòo lɛ ɛ́ wé ɛ̀ mí Zuú sɔ ɛ̀ wé ɓɛ́ zɛ̀ɓɛ̀ bìkuì ɓà kĩ́ì. 30Ɛ́ ɓɛ́pe lɛ ɛ́ hɔ́pe Dɔfĩn ɛ́ sɛ̃̀nɛ́hã̀ munɛ ɛ́ Hɔ́ lò ɓiɛ̀ ɛ́ vɔn; ɛ̀ ɓɛ̀pe lɛ ɛ́ Hɔ́ vɔn ɛ́ Hɔ́ lò ɓiɛ̀ lɛ́ ɛ́ ɓɛ́ wɔ́ nì-cã̀aníriè, ɛ̀ ɓɛ̀pe lɛ ɛ́ Hɔ́ lɛ́ ɛ́ ɓɛ́ wɔ́ nìcã̀aníriè ɛ́ Hɔ́ lò ɓiɛ̀ ɓàaniɛ nin.

Dɔfĩn wanminu dɛ̀bɛhɔ́ bòo

31Ɛ́ ké wo ɛ́ bĩní zɔ́ bie wɛrɛ̀? Kɛ́ Dɔfĩn ɛ́ ɓen wi àá kie, ɛ̀ wieni ɛ́ temu dɛ̀ ɛ́ sĩ́ɓán àá kie? 32Hɔ̀pe lɛ ɛ́ yí fùansí mí kùrú Zuú, kɛ́ Hɔ́ lɛ́ á ɛ́ ɓɛ́ ɓɔ́ képe kè kùi bòo hũn, ɛ́ ńɓùo temu mii lɛ́ ɛ̀ Hɔ̀ dàá bí páaní lɛ́ hɔ́ bòo míkùi kiè ǹ àá ɔ́pe mí Zuú? 33Ɛ́ wieni temu dɛ̀ ɛ́ bie nɛ ɓɛlɛ ɛ́ Dɔfĩn ɛ́ munɛ ɛ́ wɔ́ khɔn? Ɓàasɔ ɛ́ mí wɛ̀; iè hɔ̀ lɛ ɛ́ hɔ́pe Dɔfĩn míte ǹ ɛ́ te ɓɛ ɛ́ wɔ́ àá nì-cã̀aníriè. 34Ɛ́ wie temu dɛ̀ peɓɛ̀ lìe ɛ́ lè ɛ́ biení lɔ̀n be? Ɓàasɔ ɛ́ mí wɛ̀; iè hɔ̀ lɛ á Yiezu Kirisa ɛ́ húrun, kɛ́ hɔ́ lɛ ɛ́ pɔ́ hɔ míkùi, à ɛ́ vìé ɛ́ van yòó wi Dɔfĩn ńdóonín, ɛ́ Hɔ̀ hɛ̃nnin kè bòo hũn. 35Ɛ́ hɔ́ iè ńɓuò temu dɛ̀ kie ɛ́ fán ɛ́ lí-é Kirisa wanminu ǹ? Iè lè tĩyaarè íé, hɔ̀ hũn-yenkɛà íé, kè lɔ̀n lɛ ɛ́ ɓɛ́ ɛ́ biení íé, hɔ̀ hĩni íé, hɔ̀ ńwétaani íé, hɔ̀ mɛ̀rɔ́ íé, tàá kɛ́ hɔ́ iè hɔ̀ húmú? Hɛ̀rí bòo dɔ̀ ɛ́ yí dɛ kiè ɛ́ yá fán ɛ́ lé piè waminù wɛ̀. 36Ɛ́ hɔ́ ie pe wo dɛ̃̀ kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn ɛ́ nɛ làa:

«Kɔ̀pe kɔ̀ bòo hũn, ɛ́ ké wóo síɓán àá hɔ́ húmú fúu ɛ̀ lè wurù ɛ̀ vɛ tè.

Ɓɛ̀ wóò wé kie kɛ̀a ie pi-zàani lɛ ɛ́ ɓɛ́ dàa ɛ́ ɓɛ vɛ ɛ̀ ɓé.»

37Kɛ́ hɔ́pe sí míkùi hũn ɛ́ ké yú hɔ́ pànkɛ́ hĩ́ɔɔn iè ɔ̀pe lɛ ɛ́ wɛniɛ kie ɛ́ te hɔ wɔ́. 38Ɛ́ ń dũ sãàniɛ kɛ́ bòo dɔ̀ ɛ́ yí dɛ̀ kie ɛ́ yá fán ɛ́ lé Dɔfĩn wanminu ǹ wɛ̀. Hɛ̀rí hɔ̀ húmú, hɛ̀rí lè mɛkɛ̃nì, hɛ̀rí ɓɛ̀ mɛlɛkɛɓɛ, hɛ̀rí ɓɛ̀ pànkɛ́ ɓàasiè, hɛ̀rí ɓɛ̀lɛ dàa le ɲunù, hɛ̀rí hɔ̀ zoòni bòo, hɛ̀rí hɔ̀ yìrí bòo, 39hɛ̀rí hóohũn pànkɛ́a, hɛ̀rí sṹsùnù lɔ̀n pànkɛ́a, hɛ̀rí hɔ̀ bɔ̀míriè bɔ̀ɓuà dɔ̀. Hɛ̀rí bòo dɔ̀ ɛ́ yí dɛ̀ kie ɛ́ yá fán ɛ́ lé Dɔfĩn wanminu wɛ̀; lèpe wanminu lɛ ɛ́ Hɔ́ ɛ́ zɛ̃́niɛ àá kie kè Ɲunsɔ Yiezu Kirisa bòo hũn.

Currently Selected:

Rɔmu Siè 8: bwj

Highlight

Compare

Copy