Rɔmu Siè 10
10
1Kìe zɛ̀ɓɛ̀, hɔ̀ bòo lɛ ɛ́ nín cànkɛ àá niǹ tĩì míkùi àá hɔ́ lɛ ɛ́ nín hɛ̃nnin Dɔfĩn viì ɓɛ̀ Zuifuɓɛ bòo hũn iè bòo ɛ́ ń nɛ ɓɛ yí fuen. 2Ń dɛ̀ ɛ́ bie nɛ ɓɛ hɛ̀ can ɓɛ́ kuò hɔ̀ Dɔfĩn bòo hũn kɛ́ hɔ́ bɔ̀dũmunù ɛ́ temu mí peɓɛ̀ kuò canlɔ́ mu hũn wɛ̀. 3Ɓɛ̀ den yí dũ bòo lɛ ɛ́ Dɔfĩn wóò dàá wé ɓɛ́ nìnbirìe àá nì-cã̀aníriè, kɛ́ ɓɛ́ den ɛ́ cànkɛ ɛ́ ɓɛ cé ɓɛ́ kùrú yɛ̀rɛ́ cã̀anírɔ́ wṹn. Ɛ́ ɓɛ́ iè pe wo pɛ̃́ kɛ̀amu ɛ́ nɛ ɓɛ́ yá tɛ̀ Dɔfĩn bòo lɛ ɛ́ Hɔ́ wóò dàá wé ɓɛ́ nìnbirìe àá nìcã̀aníriè mí híɛhɔ́ wɛ̀. 4Iè hɔ̀ lɛ á Kirisa ɛ́ temu iè ɔ̀ Moyiize làndɛ́ ɲunù tíinílén, bòo lɛ ɛ́ wé ɛ̀ ɓɛ̀lɛ ɛ́ dũmuasɛ̃̀ àpe Kirisa ǹ ɛ̀ Dɔfĩn ɛ̀ wé ɓàasiè àá nìcã̀aníriè mí híɛhɔ́.
5Lɛ iè hɔ̀ bòo lɛ á Moyiize ɛ́ hàarí bie ɓɛ̀ nìnbirìe lɛ wóò nɛ ɓɛ́ bè hɔ̀ làndɛ́ máahṹ ɛ̀ dàá cã̀aní: À nìnbírɔ lɛ ɛ́ wóò wé hɔ́ làndɛ́ bòo lɛ ɛ́ hɔ́ khɛ́ ɛ́ ɓén yí mí mɛkɛ̃nì hɔ̀pe làndɛ́ sɔ bòo hũn. 6Kɛ́ hɔ́ bòo lɛ ɛ́ bie hɔ̀ cã̀anírɔ́ lɛ wóò yí hɔ́ ńdɛsĩ̀nlɔ́ hũn ɛ́ iè hɔ̀ lɛ: «Bí bie kɔ tĩì hũn nɛ: Á iè wie ɛ́ temu mii yòó vɛ hɔ́ hóohũn?» iè bòo ɛ́ ɓɛ́ nɛ: yòó vɛ lɛ́ à Kirisa à ɓen síɛ? 7Ɛ̀ kɔ̀ lò bí bie nɛ: «Á iè wie ɛ́ temu mii síɛ vɛ le sṹsùnù fìi hũn?» iè bòo ɛ́ ɓɛ́ nɛ: síɛ vɛ lɛ́ à Kirisa ɛ̀ vìé lé hɔ́ húmú hũn ɛ̀ ɓen yòó? 8Ɛ́ hɔ́ iè ńɓùo ɛ́ temu bĩniɛ bie? Hɔ̀ bĩniɛ bie ɛ́ nɛ: «Lè Dɔfĩn bienù ɛ́ wi kɔ sɛnù, lè wi kɔ ɲunù hũn, ɛ̀ lè wi kɔ tĩì hũn.» Lèpe ɛ́ temu iè pe ńdɛsĩ̀nlɔ́ bienù lɛ ɛ́ ké ɛ́ bòo bie ɛ̀ lɛ́ ɓɛ́ nìnbirìe ǹ. 9Kɛ́ kɔ́ ɓen tɛ̀ ɛ́ bie àá kɔ́ ɲunù ɓɛ̀ nìnbirìe yìe hũn nɛ Yiezu ɛ́ iè Ɲunsɔ, kɛ́ kɔ́ lò dũmuasɛ̃̀ kɔ̀ tĩì hũn nɛ Dɔfĩn vìeníɛ ɔ̀ ɛ́ líeniɛ hɔ̀ húmú hũn, ɛ́ kɔ́ ɓén fuen. 10Iè hɔ̀ lɛ ɛ́ nìnbírɔ iè piè tĩì á wóò dàá dɛsĩ̀, ɛ̀ Dɔfĩn dàá líi ɔ́ àá nìcã̀anírɔ. Ɛ̀ nìnbírɔ lò iè piè ɲunù á wóò dàa bie mí ńdɛsĩ̀nlɔ́ bòo ɓɛ̀ nìnbirìe yìe hũn, ɛ̀ Dɔfĩn ɛ̀ dàá fuení-ɛ̀ ǹ. 11Ɛ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: «Nìnbírɔ yée nìnbírɔ kɛ́ á dũmuasɛ̃̀ à ǹ, ɛ́ lùwiè ɛ́ yá dí ɓàasɔ wɛ̀.» 12Ɛ́ sí iè pe temu lɛ́ ɛ́ ńsankɛà ɛ́ dàa mínɛ ɓɛ̀ Zuifuɓɛ àá ɓɛ́ lɛ yí ɓɛ́ Zuifuɓɛ tĩ́ihṹ wɛ̀. Ɓɛ̀pe ɓɛ́kùi ɛ́ lɔ̀ Ɲunsɔ wìcóoní lɛ wóò wé mí sãamu àá ɓɛ́ nìnbirìe lɛ wóò vi-e ǹ ɓɛ́kùi. 13Iè hɔ̀ lɛ ɛ́ hɔ́ bie lè Dɔfĩn bienù vɛ̃hṹ hũn ɛ́ nɛ làa: «Nìnbírɔ yée nìnbírɔ lɛ ɛ́ Ɲunsɔ ɛ̀ venin ɛ́ ɓén fuen.»
14Ɛ́ ɓɛ́ nìnbirìe ɛ́ wo ɓɛ wiɛ dàá vi-e ǹ kɛ́ ɓɛ́ lò yí dɛsĩ̀-ɛ̀ ǹ? Ɛ̀ ɓɛ̀ wo ɓɛ wiɛ dàá dɛsĩ̀-ɛ ǹ kɛ́ ɓɛ́ lò ɛ́ yí ɲí kɛ́ ɓɛ́ ɛ́ piè bòo ɛ̀ bie? Ɛ̀ ɓɛ̀ wo ɓɛ wiɛ dàá ɲí kɛ́ ɓɛ́ ɛ́ piè bòo ɛ̀ bie kɛ́ nìnbírɔ dɔ̀ ɛ́ yí buie hɔ? 15Ɛ̀ hɔ̀ wo mii yí buie kɛ wiɛ kɛ́ nìnbírɔ dɔ̀ ɛ́ lò yí tɔn à vɛ buie hɔ? Kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn ɛ́ nɛ làa: «Hɔ̀ hɛ̀ iè tĩwiɛ̀ bòo cɛ̃̀un, lɛ ɛ̀ mì mi ɓɛlɛ ɛ́ lè Bentĩnu ɛ̀ buie kɛ́ ɓɛ́ ɛ́ ɓen.»
16Kɛ́ ɓɛ́ yí ɓɛ́pe ɓɛ́kùi ɛ́ temu tɛ̀ lè Bentĩnu sɔ bòo wɛ̀. Iè hɔ̀ lɛ á Dɔfĩn bɔ̀háanírɔ Ezayi ɛ́ hàarí bie ɛ́ nɛ làa: «Ɲunsɔ, à wieni ɛ́ temu dũmuasɛ̃̀ hɔ̀ bòo lɛ ɛ́ ké ɛ́ buie ǹ?» 17Ɛ́ kɛ̀amu, ɛ́ hɔ́ ńdɛsĩ̀nlɔ́ ɛ́ wóò lé hɔ́ bòo lɛ á nìnbírɔ wóò ɲí kɛ́ ɓɛ́ ɛ́ buie ǹ, ɛ̀ hɔ̀pe bòo sɔ lɛ ɛ́ ɓɛ́ ɛ́ buie ɛ́ iè ɔ̀ Kirisa Bentĩnu. 18Ɛ́ ń den zɔn ɛ́ dìe nɛ làa: Bòo ɛ́ ɓɛ́pe Zuifuɓɛ iè bìe ɛ́ yí ɲí lépe Bentĩnu sɔ yée? Kɛ́ wɛrɛ̀, ɓɛ̀ ɲɛ́ lé lò! Iè hɔ̀ lɛ ɛ́ hɔ́ den wɛ̃́ lé Dɔfĩn bienù vɛ̃hṹ hũn ɛ́ nɛ làa:
«Ɓɛ̀lɛ ɛ́ lè Bentĩnu ɛ̀ buie tɛmu ɛ́ ɲínin lè sṹsùnù míkùi lɔ̀n,
Ɛ̀ peɓɛ̀ biehĩ́ ɛ́ ɲínin lè dímíɲɛ́ míkùi hũn.»
19Ɛ́ ń bĩniɛ zɔn dìe ɛ́ nɛ làa: Ɛ́ ɓɛ́pe Yizarayɛɛle nìɛ iè bìe ɛ́ yí dũń pehɔ̀ ɲún? Kɛ́ wɛrɛ̀, ɓɛ̀ dũnɛ lè! Iè hɔ̀ lɛ ɛ́ hɔ́ hán bòo lɛ ɛ́ Dɔfĩn ɛ́ hàarí khɛ́ lɛ́ Moyiize ǹ á khie bie lɛ́ ɓà ǹ ɛ́ iè hɔ̀ lɛ:
«Ń ɓén lɛ́ ɛ́ mí yìi ɛ́ lé hɔ́ dàa dɔ̀ nìɛ ǹ, lɛ lò den yí dàa nìɛ àá bɔ̀bín wɛ̀.
Ɛ̀ ǹ ɓén lɛ́ ɛ́ mí tĩɛ̀ ɛ́ hĩ́ní hɔ́ dàa dɔ̀ nìɛ lɛ bɔ̀dũmunù mí ǹ.»
20Ɛ̀ Dɔfĩn ɛ́ lo ɓìɛ khɛ́ lɛ́ á Ezayi ǹ á hɛ̀ hɛ̃̀ mí tĩì à zɔn bie nɛ làa:
«Ɓɛ̀ nìnbirìe lɛ ɛ́ hṹn yá nìn cɛ̀ ɛ́ te nin mɔn,
Ɛ̀ ǹ zɛ̃́niɛ niǹte àá ɓɛ́lɛ ɛ́ yí hɛ̃un bòo dɔ̀ niǹ viì wɛ̀.»
21Kɛ́ ɓɛ́ Yizarayɛɛle nìɛ bòo hũn, ɛ́ Dɔfĩn ɛ́ den bie nɛ làa:
«Sṹnúhṹn àá mí wiɛhɔ́ míkùi, ɛ̀ ǹ cãaníɛ niǹ níhĩ́ niǹ nìɛ ǹ nɛ ɓɛ ɓen zɔ,
Kɛ́ ɓɛ́ den yí tɛ̀, ɛ̀ ɓɛ̀ ɛ́ pɛ̃́ niǹ bòo.»
Currently Selected:
Rɔmu Siè 10: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
